اوعى تشيل الفساد

جمعة انقاذ الثورة

ميدان التحرير - جمعة الانقاذ

لو كل واحد عزل  عشان   ساكن تحته  رقاصة البلد كلها ح تبات فى الشارع يا سعادة البيه .. بنفس المنطق قال أحد الضباط للاعلاميين الثوار المتظاهرين أمام ماسبيرو لإقالة القيادات الفاسد : " ما نقدرش نشيد الفساد من البلد كلها مرة واحدة ، البلد تقع "


الراجل ده عايز حد يقوله " من أنت ، من أنت " ... هو اللآفندى ده ما عندوش خبر ان  البلد كانت واقعة  ؟؟ و لا هو يقصد أن البلد تقع فوق الوقوع إللى كان واقع قبل كدة  ، يعنى نبقى عاملين زى إللى بيفحت لفوق .

ماحد يبلغ الناس إللى ما كانتش هنا ان البلد كانت خرابة و مش ح تتعمر إلا لما نشيل الفساد ، و لا انتم عجبكم الفسـ        ــــــــــــــــــــــــــــــــــــــــــــــــــــــــــــــاد إللى مريح فى كل مكان .

هو  حضرة المنظم ولا  المنظر إللى خايف يشيل الفساد للبلد تقع ، ما يعرفش ان تلت تربع القيادات فى معظم المواقع  موظف بدرجة حمار  أأقصد الناحية الإدارية و المهنية ، الفساد المالى ده خليه فى مقال تانى .. فنحن بصدد الموظف إللى بدرجة حمار .. الحمير كان سوقها ماشى  قبل 25 يناير ..  و أى نوع تانى كان مرفوض و بشدة .. و كانت المناصب تنادى على حميرها بكل اشتياق ، فقد كان اختيار سياسى فى المقامى الأول ان تكون قيادات المواقع فى يد  حمار نقاوة ؛ عشان يتقاله شى تبقى شى ، حاااااا تبقى حااااااااااا .. ما يقدروش يجيبوا واحد يقولوله شىىى يقوللهم هسسسسسسسس  .. و كلنا عارفين ان القيادات دى بتتعين بناء على توصيات من أمن الدولة إللى كان بيدعم الحمير بشكل قوى ، و كان اول ما  يتعرف ان فلان الفلانى  عنده ملامح حصان ؛ كان يتريث فى تقريره للتأكد ان كانت تلك الملامح  شكلية فقط ام عن قناعة  .. و كان الحصان يمر باختبارات عديدة للتأكد من درجة حمريته و التى قد تؤهله للفوز بالمنصب الفلانى  .. كما يصرون على إلحاق الحصان  بدورات تدريبيه للرجوع بعقليه  إلى الخلف در و تقمص دور حمار  عن جدارة ، لكن ده ما يمنعش انه طول الوقت يفضل تحت المراقبة  عشان يتأكدوا من قدرته الفائقة  على بلع التبن مهما كان مسرطن .. لكن  فى  حالة ان أثبت التحريات ان الحصان فارس أبا عن جد كانوا يلجئون لتشويه سمعته بدعوة انه بغل على علاقة بقطة.

فتلك مواصفات القيادات الفاسدة بمعظم المواقع .. هما دول إللى خايفين تشيلوهم من مناصب أحسن البلد تقع . . وما حدش يقولى  أصل مافيش بدائل .. بدائل إيه يا سيد ، بأقولك حمار ، حماااااااار ، إإإإإإإإإإإإإإإإإؤؤؤؤؤؤؤ يعنى الساعى إلى على  باب مكتبه بيفهم زيه بالظبط

يرجع الفلفسوف يقول : " بس ح نجيب منين ناس تحل محل الفاسدين دين دول .. هنا يشيط عقلى و يرتعش جسمى و أقوله و انا راسمة ابتسامة بلهاء على وجهى "  اعمل اعلان طلب فاسدين جدد يا أخى ، هى مشكلة ".

يعنى لما تشيل رؤساء القطاعات فى ماسبيرو ، هاتوا النواب بتوعهم او رؤساء الشبكات الإذاعية او رؤساء القنوات التلفزيونية .. لما تشيلوا رؤساء الجامعات جيبوا اى حد عضو فى الحزب الوطنى ، عشان نضمن ان الفساد باقى و البلد ما تقعش .. احنا برضه كلنا هدفنا البلد .. يعيش الفساد إللى شايل البلد

 لما تشيلوا أمن الدولة انشروا عناصره ما بين الأمن العام و الأمن الوطنى .. و اوعوا تحاسبوا الفاسدين إللى فيهم ، دول هما  إللى ح يطلعونا كوادر جديدة من الفاسدين و تضمن ان البلد ما تقعش على مدى القرون الجاية .. و أهو نلاقى حاجة نسبق فيها دول العالم الأول .. بدل ما احنا متأخرين فى كل حاجة كدة .

و بعدين نحل الحزب الوطنى ليه ؟!!!  هو احنا عايزين حياة ديمقراطية ولا حاجة كفى الله الشر  .. لأ احنا عايزين ناس تآخد فلوسنا و تدلس علينا و تلبسنا العمة ، و أول ما  العمة تقع من على راسنا و نمسكها فى إيدينا نعرف انها " السلطانية " .. هما يآخدوا السلطة و احنا السلطانية .

فى اوروبا و الدول المتقدمة التى يأكلون فيها الكباب مع الطحينة ، ممكن يحلوا الحزب النازى و الحزب الفاشى لكن الحزب الفاسد : لاع

ـــ  ليه يا ولد الفرطوس ؟؟؟

ــ أحسن البلد تقع

لكن لأن صاحب فكرة اوعى "تشيل الفساد أحسن البلد تقع" من وقت للتانى ساعات ضميره يصحى ، فيهب متحمسا  ليقول : " لو عندك اى شكوى قانونية ضد حد او معاك ورق يثبت فساد فلان الادارى او المالى قدمه للنائب العام  "

الراجل عداه العيب أهوه ، عايز القانون يآخد مجراه و المجارى تتبع شبكتها المسئولة عن الصرف الصحى  .. و المهم بقاء الفساد على ما هو عليه و على المتضرر اللجوء للقضاء .. و مالوش دعوة هو ان كان فى ثورة ولا مافيش .

صحيح الراجل معاه حق ، مش يمكن الثورة ما قامتش .. لتكون الثورة قامت فى دماغى أنا بس ، يعنى كل إللى عشته ده كان هلاوس سمعية و بصرية باعانى منها .. ولا تكون الثورة اللى قامت دى انا شفتها  فيديو  .. و الشهدا إللى قاموا بدور البطولة الحمد لله على قيد الحياة  .. و الدم إللى غرق الشوارع  كان صلصة ......... كل ده كاتشب .

يرد عليا صاحب فكرة " اوعى تشيل االفساد للبلد تقع و يقولى " لا طبعا الثورة قامت ، و الدليل بيانات الجيش كلها بتقول ثورتنا المجيدة  ، مطالب الثورة ، تحية للشهدا .. كل بيان للجيش بيأكد ان الثورة قامت ..  ثم يستكمل كلامه قائلا : الثورة  قامت إلا حتة .

 لاع للحتة و المحتتين و المنحطين .. عشان كدة احنا نازلنا يوم واحد ابريل لإنقاذ الثورة .. و ح نفضل فى الميدان حتى النصر .. فى التحرير حتى التحرير

  لاع يعنى نو : لأى مسوفين ، متواطئين ، و مع الفساد متضامنين

لاع يعنى نو : للى طول النهار يغنوا علينا و يقولنا .. السح الدح أمبو .. فاسد أهوهه ، حييوه .... ياعينى ، فى فاسد عيط ... ان كان عطشان اسقوه ، و على كرسيه ، سيبوه

بنقولهم : نو ، نو ، نو .. و بالعربى لاع

و   لاع يعنى نو