عملا بالحكمة إللى بتقول " ماما زمنها جاية – جاية بعد شوية ـ جاية شايلة اتهامات "
تم تأجيل مظاهرات يوم الجمعة 15 ابريل حتى اشعار آخر .. و هذا يسع لنا الوقت أن " نطمئن سيدة رابطة السجينات الأولى" على الأخوين الحلوين إللى فى طرة محبوسين و نقوللها انهم فى الحفظ و الصون و المأمور بيسمع كلامهم و مشغل المساجين عند أهلهم إللى هو حضرتك و الطاير المطير الطيار .
فمن حيث الملبس :
الحمد لله تم تلبيس الأخوين الحلوين البدلة الميرى للسجن بعد فشلهم فى الحصول على هدوم خاصة ؛ و بكدة أضطروا يلبسوا زى باقى اوباش الحكومة .
و من حيث المأكل :
أكدت إدارة السجن انها كانت يا دوبك قدارة على توفير الحلاوة على قد الحكومة السابقة المنتشرة بأرض طرة ، لكن بدخول الأخين الحلوين للحبس ح تضطر للسحب من مخزون الاستراتيجى للحلاوة . و لحد ما الموضوع ده يآخد إجراءته فمافيش مانع يجيلهم أكل من برة ان شا الله من فندق سبع نجوم ، على ان يكون مع كل وجبة كم وفير من الفاكهة يدخلون بها فى عربة أيس كريم لكى تتناسب و حرارة الجو إللى بدأت تآخد حدها ، و بكدة يدخل السرور على باقى مساجين طرة لمجرد رؤية عربية الجلاتة الشهيرة فى الوسط الراقى باسم ايس كريم " ، و خوفا من طمع السجناء فى الأيس كريم إللى فى ايد الأخين الحلوين قام مأمور السجن الهمام بتوفير حراسة مشدة ترافق الأخوين من ساعة خروجهم من الزنزانة بالأيس و لحد دخولهم تانى .. و ما بيمنعش عنهم الأيس كريم غير ساعة الزيارات الشخصية أو لما يقروا كل الجرايد إللى جايبة سيرتهم او بتنشر عنهم أى حاجة بداية من ميكى و سمير و كابتن ماجد
تحية لمأمور طرة إللى مش حارم الأخين الحلوين من حاجة .. مردودالك يا سيادة المأمور .
و ده ما يمنعش اننا من وقت للتانى نطمن على بابا و ماما و جده و تيتة و نتأكد انهم ح يآخدوا أحكام تتناسب و ما أجرموه فى حق شعبنا العظيم و الله الموفق .
و قبل ما نقفل و نمشى بنوصى الديب انه يشد ديله و ما يعملش مع أباهم ــ أبو الأخين الحلوين ــ إللى عمله مع ابن طلعت مصطفى و يجبله اعدام فى قضية الكسب غير المشروع ، ركز يا ديب و خلى الحكم ده فى قضية قتل المتظاهرين .
المشاركات
ليست هناك تعليقات:
إرسال تعليق