لاع لدعم الست ، و تفضل أفلام الشباب مستقلة

سمعت عن  واحد من بتوع الحزب الوثنى بيقول : " أصل الثورة لمت " .. و استغربت جدا ، لأن الثورة مش بتاعت حد ، دى ثورة المصريين كلهم ، لكن لما شفت المتحولين و لمحت المنتفعين و خبطت فى المنافقين ، و مسكت واحد م إللى للموجة راكبين ، فهمت ان التعليق ده جاى من واحد كان عايز يركب الموجة بس واحد م إللى معاه فى نفس الحزب شده وقعه عشان يركب مكانه  على موجة الثورة  .

من الواضح ان التورتة مغرية أوىىىىىىىىى و كل من هب و دب عايز حتة  ، و المشكلة مش فى الحتة ان كانت شيكولاتة ولا شانتيه إللى عايز يآكلها  .. لكن المشكلة ؛ كل المشكلة : ان الأكيل  ما عندهوش مانع يقتل أى حد بيشاورعليه و يقول بتاع التورتة أهوه .. عشان  ده  رافع شعار " دعونا نآكل فى صمت " .

من الأشكل المرعبة للمستغلين  و التى ظهرت على السطح  كانت فوق عمارة الفن .. فقد شاهدت و لأول مرة برومو لا يقل رداءة عن بروموهات  بيع الثورة جملة و قطاعى تحت مسمى : رنات الثورة ، حمل ــ أغانى الثورة ، حمل ـ لحاف الثورة ، اتغطى .. لكن الجديد إللى معانا النهاردة افلام شباب الثورة ،  اول مرة أشوف برومو  لشركة فنية  ما بيقولش حاجة غير " نحن ندعم "  ، طيب يا سيدى نشكركم جدا انك ح تدعم ومش ح نقدر نقولك لاع .. بقى فى يا ناس حد يقول لاع لواحد ح يدعم ده  ساعتها يبقى هو اللى  شخصية لاع لاع لاع .. و يستهله لاعين تلاتة على خده .

تخيلوا كدة معايا الحالة ، الواحد يبقى  قاعد لا بيه ولا عليه و فجأة يلاقى ظهرله برومو بيقوله " احنا ح ندعم "  ، المفروض الواحد ده يفرح و يزقططت و يطرقع رقبته و يسبها تشرئب ، و يطرطق ودانه عشان يكمل باقى البرومو ، مايلاقيش .. بخ .. كل الحكاية احنا ح ندعم ، بس انت روح هناك و احنا ح ندعم .. أيوة يا جماعة يعنى ح تعملوا إيه .. انت مافيش مخ ، بنقولك " أحنا ح ندعم " .. البرومو  ما بيقولش غير ابعت أفلامك انت بس على عنواننا عشان نختار منها تلاتة ، و فجأة يقولك بس خد بالك لو تعذر او توقف التنفيذ مش ح نكمل الدعم ، اه احنا مش هافية ، أدينى حذرتك أهيه ، و قد أزعر من زرزر .. فتلاقى نفسك واقف  قصاد البرومو تنظرله ببلاهة شديدة لدرجة تخليك تشك فى قدرتك على التقيم .. طبعا أى حد متهور يقولك طيب نسأل صاحب الشركة ، يمكن البرومو ح يكلفه و هو بيحاول يوفر .. أقولك الاعلان محطوت على النت فى حتة  ببلاش كدة .. و لأن البرومو أو الإعلان اتخانق معاك بدون سبب فأحذر انك تبعت وتسأل العباقرة الى عملوه ، اوعى تسألهم  انتوا ح تدعموا الآفلام المستقلة إزاى و هى بتطلع بمجهود أصحابها .. اوعى تسألهم ولا انتم عايزين افلام روائية ؟ يبقى هنا فين الدعم ، ولا انتم بتستعبطوا و مش قصدكم على الأفلام المستجلة جلة جلة .. ليه بأحذرك تسألهم ، لأن وقتها ح تسمع تنهيق بيقولك ، الجلة دى بتاعة الفلاحين ، و الفلاحين دول بيمثلوا 50% من مجلس الشعب ، و احنا مالناش دعوة بمجلس الشعب .. تستغرب ، لكن عشان تمشى حالك تقول يمكن عشان الأفلام مستقلة و هما نزلين تبع حزب  الريح ما يودى الريح ما يودى .

نصيحة أخوية لو مصر تتعامل مع الشركة صاحبة البرومو  حاول يبقى دمك خفيف و ابعت قولهم نحن فى انتظار برومو رقم 2 أو الإعلان رقم 2 او البيان رقم2 الخاص بمشروع " احنا ح ندعم " و مش ح نزهق حتى يستكمل مسلسل " احنا ح ندعم " .. و بلاش حد يقرب من البرومو ولا يجيب سيرته ولا يقول انه ضعيف فنيا مع انه المفروض برومو خاص بشركة انتاج فنى ، و حذارى حذارى  حد يقول ان البرومو بيوحى برغبة فى استغلال الشباب و البلطجة عليهم تحت مسمى " أحنا ح ندعم " ..

و اوعوا حد يجبلهم سيرة ان الأفلام المستقلة مش محتاجة دعم لأنه مستقلة  ، لأنهم وقتها يرموك بالقلة قلة قلة 

تحذير أخير ماحدش ينتقد البرومو لأن إللى عملوه ح يقلبوا الطرابيزة عليك و اللى فيهم ح يجيبوه فيك و كل واحد م اللى بيمسح جوخ ولا ما بيشتغلش ح يقف ينافق أصحاب الشركة على امل يرموله عضمة .. و أصاحب الشركة ح يلاقوا المعركة سخنت ف ح يعملوا نفسهم مش واخدين بالهم غير ان الكلب قليل الأدب اللى مش عاجبه البرومو العبقرى بيقول عليه برمو مش برومو ، بيضم الراء مع انه المفروض يحط  واو ، قليل الأدب كل الواو ، ما هو ما اترباش تربية فرنساوى .. و كل ده عشان ماحدش يفتح بقه و يجيب سيرة عن محاولات بعض شركات الانتاج السطو على ابداع الشباب الذى يعمل دون الحاجة لتلك الشركة التى لا شاغل لها سوى اجهاض المحاولات القيمة للشباب ، عشان يفضل سوء السينما لا يسوده غير البلاهة و التفاهة و السطحية .

و رغم ان أفلام الشباب المستقلة لديها القدرة على التواجد بنجاح  بدون أى دعم من شركات الإنتاج الهابط .. لكن لأن الشركة تعانى من كساد سوقها فى هذا الموسم فقررت السطو غير المسلح على افلام الشباب المستقلة متبعة منطق شلح و انا شلح و سيب و انا اسيب ، و قررت الانقضاض على أفلام  السينما المستقلة و بكدة تكسب من كل النواحى ، اولا تضمن انتاج أفلام قليلة التكاليف ، ثانيا تتأكد من كسب جمهور عريض من الدعاية اللى ح يقوم بيها الشباب لأفلامهم بكل الوسائل ، و طبعا التوزيع ح يبقى على ودنه  لأنها ح تتقمص دور تسويق الثورة المصرية زى لحاف الثورة و أغانى الثورة و مشاط الثورة و فليات الثورة ، و كله حتى مسمى احنا بنعمل افلام مختلفة الله يباركلكم  .. و بكدة تحقق الربح المالى التى ترجوه فى موسم شعاره الخسارة جيالك جيالك .. و لأن الشباب أخضر برئ نظيف لا يفهم تلك الالاعيب  قرر ان يصنع من تلك الشركة مناضلة و ثورجية من الطراز الأول .. و اللذيذ فى الموضوع ان المناضلة كشفت نفسها بمجرد ان وضعت البرومو المعلن عن دعم الأفلام المستجلة جلة جلة " على المواقع الإجتماعية وجدت ترحاب شديد عدا من شخصية وحيدة فريدة مسكينة معهاش سكينة نقدت البرومو المعروض بشكل ساخر ، هنا تجولت الأفلام المستقلة  إلى رمى بالقلة قلة قلة ، و  كشفت المناضلة على وجهها و بانت الحقيقة  ، صحيح كاد المريب ان يقول خذونى ، تقريبا و الله أعلم الست الشركة حست ان  نقد البرومو يفضح مخططها للاستيلاء على أفلام الشباب ، مع ان الناقدة ماكانش ده مقصودها خالص  .. لكن فى ثانية ماسك الشركة الشريفة التى  تعمل من أجل الشباب اتشفط  .. و اعلنت عن رفضها لأى نقد ، طبعا ما هى ما تسوعبش يعنى إيه شباب ، و إلا كانت فهمت انه من حق الشباب ان يقول رأيه و يسأل و ينقد .. و ان كنتى ايتها الشركة تناضلى من أجل الفن كنتى عرفتى ان الفن يعنى التمرد على الواقع .. لكن ربنا يكون فى عونك فى مصر الجديدة و انتى ما تعرفيش كثير عن الفن ولا عن الشباب  .. و الدليل افلامك السابقة .. يا خسارة كشفتى عن وجهك بدرى  و انضملك بعض المنتفعين معتقدين انك ممكن تبصيلهم حتى و انتى بتآكلى من التورتة  .. الشركة الفنية و أصحابها رفضوا يسمعوا نقد واحد وحيد للبرومو إللى مقدمينه رغم انع سئ على المستوى الفنى و على مستوى المضمون ..  ده كله ما همش الشركة إللى أوصت فى جلستها الختماية ان البرومو اسمه برومو بالواو مش برمو بضم الراء ، لازم تحط واو يا جهلة .. فعلا و نعمة الفن و المفن و الفنانين و المتفننين

لكن برضه لازم نلتمس لهم العذر لأنهم أكيد ما يعرفوش "اينشتين" إللى قال : " افكارى زى الجاكيت أقلعها لما اشوف أفكار الآخرين "  .. بس واضح ان افكار حضرة الشركة "ملابس داخلية" عشان كدة اتنرفزت لما حسيت انها ح تفقدها  

     الاارفضوا هذا الاعلان العار ..ارفضوا كل ما هو عار ,,, لا لكل ما هو عار .. و لاع لكل ما هو سيئ ، ارحمونااااااااااااااااااااااا بقى مش كل حاجة لازم تبقى سبوبة .. سيبوا حاجة تعدى من غير سمسرة