كاميليا شحاتة ما بين الوهم و الحقيقة

تخرج علينا اصوات و تجمعات تؤكد بوجود كاميليا شحاتة كمحتجزة داخل السجون الكنيسية ، و الحقيقة ان هذه الأصوات موجودة من قبل الثورة .. لكن الغريب انها ظهرت فجأة و بدون مبررات بعد الثورة .. طيب كان إيه سكتهم قبل الثورة ، و إيه إللى رجعهم تانى بعد الثورة ؟؟!!!!

بقى ده يا جماعة كلام ينفع برضه .. نبقى عارفين و متأكدين ان فى ست مخطوفة و بتتعذب و محبوسة فى الأودة الحديدية جوة الكنيسة الفولانية و سيبنها .

يعنى حتى ما نكلفش خاطرنا نعمل محضر بالواقعة ، نثبت فيه : مين إللى خطفها و دوافعه و مين إللى شافها و هى بتتخطف و سكت ليه ، يكون اتخطف معاها هو كمان .. و لا خبر الخطف ده جاله اس ام أس .. لازم كل الحاجات دى تتعرف

و لا موضوع كاميليا ده مش متأكدين منه و الحكاية ملخصها ان فلان سمع من فلان سمع من علان أخد عن ترتان ان فى شخصية اسلمت محبوسة جوة الكنيسة .. طيب حد معاه شهادة اسلامها .. اللى هى شهادة اشهار الإسلام ، بتتجاب من الأزهر ، و بيتسجل فيها بيانات السيدة و الشيوخ إللى أخدت عنهم دينها و بيكون فى شهود كمان على الشهادة دى .. و لا  أختنا كاميليا  اسلمت سرا .. طيب لو أسلمت سرا وصللنا موضوعها إزاى ، يعنى الناس إللى واقفة فى المليونية دى عرفت منين بموضوعها ..  و لا  هى ماأسلمتش و كانت لسة ناوية تسلم و فجأة أهلها منعوها عشان كدة مافيش شهادات  اسلام .

يا جماعة فين أول خيط حكاية كاميليا عشان  نتحرك على اساسه .

بيقولوا الشيخ إللى ساعدها على الإسلام هو إللى بيأكد انها محبوسة .. و الشيخ ده عرف يوصلها إزاى و هى محبوسة جوة  أودة العفاريت فى الكنيسة .. يمكن حد من الكنيسة قاله .. ولا يمكن شيخ مكشوف عنه الحجاب .. ده مش كلامى ده كلام حد بيحاول يقنعنى انى ضعيفة الرؤية  .

و لأن حكاية كاميليا ملهاش قوام ، و مالهاش راس و لا رجلين ـ فنرجو ان كانت خيال وفروا على الناس المجهود إللى بيضيعوه فى الهوا ، خلوهم يوفروه للدعوة ، يوفروه للعبادة ، يوفروه للعمل .. و لو مصرين على عمل مليونية يطلعوا مظاهرة مليونية تخدم الوطن ، تخدم العمال إللى مش ح تلاقى تلآكل .. أنا مش ضد المظاهرات و لا الإعتصامات ، لكن ضد اهدار الطاقات و تكدير السلم العام و ترويع الآمنين

و ده كمان كلام القانون

 لكن ان كانت  كاميليا حقيقة  موجودة ، الله يخليكم مسكونا طرف الخيط ، فهمونا اشمعنا كاميليا شحاتة هى اللى محبوسة مع ان فى مئات بيشهروا اسلمهم سنويا و ارجعوا للأزهر .. يا ريت  اللى عارف ومتأكد من اسلام  " اختنا كاميليا "  يقدم مستنداته ، أى مستند على انها أسلمت  ... طب اشهرت اسلامها على إيد مين ؟ و اتعرف منين انها اتحبست ؟ و محبوسة فى  أى كنيسة ؟

 حد يجمع الورق ده و يروح بيه للنائب العام يقدم بلاغ ... لو النائب العام ماخدش إجراء ..  مصر كلها ح تطلع تنادى على كاميلا ... يعنى إيه واحدة مصرية تتخطف و ما نعرفلهاش مكان  جرة .. و مش مصر بس ، ده احنا ممكن نلملكوا دول الجوار ، كانت اسلامية أو عربية ، و نطلع قرار بوقف مؤقت للثوارت المجاورة بحثا عن أختا كاميليا .. و ندخل منظمات حقوق الإنسان معانا . . دى الست بقالها أكتر من سنة فى الأودة الحديدية بالكنيسة ، و احنا متأكدين انها بخير و بنطالب اننا نآخدها .. يبقى واجب بعد ما نآخدها نقدم جواب شكر للى حافظوا عليها .. و لو عرفنا انهم عذبوها ، نقدمهم  للمحاكمة ، و طرة يساع م الحبايب ألف و مستشفى السجن بتتوضب ، يعنى مالناش حجة .

لكن لو الحكاية تأليف و خيال يبقى الكلام ده كان ينفع قبل الثورة ، لما كان فى أمن دولة ، و عايزين نشغل الناس عن ملف التوريث ، فنخترع لهم مرة موضوع طائفى و مرة موضوع ماتش كرة و فى الحالتين نهلل عشان نمتص طاقتهم إللى ممكن يكون باقي منها حاجة  بعد جرييهم  وراء  الأتوبيس الصبح و لقمة العيش الضهر و المغرب و العشا .. لكن دلوقتى احنا فى مصر الجديدة .. مصر بعد الثورة .. يعنى إللى كان نايم أيام الثورة ، ما يصحاش دلوقتى يعمل فيها سبع المبرمة ، بعد ما قلك الخروج على الحاكم حرام ، عايز يعمل فيها اعتصام .. الله !!! هو مش الحاكم ده هو إللى كان حابس اختنا كاميليا ولا احنا كنا جايبين حاكم أجنبى .

سؤال للعقلاء فى هذه المليونية " من اجل أختنا كاميليا "

و ان لله و ان إليه راجعون

اللهم أأجرنا فى مصيبتنا و اخلفنا خير منها