رفض عام لإختيار " يوم 13 ابريل " يوم للشماتة فى المخلوع و اهله .. و يفضل ان لا يحدد يوم بعينه حتى لا تقيد حرية الست شماتة . .. نفرح أه نشمت لاع لاع لاع ولعلع ، و لاع يعنى نو .. خلونا متربين مش زى ولاد المخلوعين ، و كفاية ان احنا الشعب الوحيد إللى ح يحتفل بيوم 13 ، و أى 13 ح تقابلنا ح نزقطتت بيها ، ماعدش فى حاجة اسمها تشائم ، التشائم ح يعرفه المخلوعين الفاسدين الهاربين المهربين و الدليل طرة و اللى فيه محبوسين .
و بدل ما نضيع وقتنا فى المطالبة بيوم للتشفى ، خلونا نطالب ان التحقيق و المحاكمة تبقى علانية : لضمان الفافية او المصداقية او لتحقيق للشعب فقرة كوميدية .. أصل المخلوع قال فى التحقيقات : " انا عرفت بأخبار المتظاهرين فى التلفزيون ، و عزمى قالى انهم طالبين تغير الحكومة "
يا حييييييييييييييينى ، المخلوع كان لا يعترف بنفسه رئيسا ، كان يا حرام بيتعامل زيه زى أى واحد فينا و بيرضى على نفسه يعرف أخبار البلد من التليفزيون ، هو مش كلنا بنعرف الأخبار من التلفزيون يا ولاد يا ولاد .. و ماحدش يقولى امال الديوان الطويل العريض و السكرتارية و الملط : كل دول بيعملوا إيه ؟
بيقلبوله المحطات ، شوفوا عندكم كام قمر صاعى و طبيعى و كل قمر شايل كام تهمة اتنقلت لعيلة المخلوع و شلته ، ده غير طاقم الموظفين اللى بيقولوله مش ح تقدر تغمض عنيك ، و طقم تانى بيعليله صوت التلفزيون و يوطوه .
ف إذا كان التلفزيون هو سبب الكارثة اللى البلد فيها ، و خبى على المخلوع معاناة الشعب يبقى على الأقل يصلح غلطته و ينقل التحقيق على الهواء مباشرة .
و ما حدش يقلق أو يخاف ، ف نقل التحقيقات مش ح يزود الكراهية و الغضب و القرف و الإحتقان و لا ح يقلقه ؛ لكن احتمال ينتج عنه زيارة للمستشفى و معانا البيض ، و مش أى بيض ده بيض ملون ، بيض شم النسيم عقبال عند الحبايب .. و نقل المحاكمة ح يريح الناس و مش ح يخليها تعلق المشانق .. لأننا سايبين موضوع المشانق دى لعائلات و أسر شهداء العبارة و الدويقة و قطار الصعيد و شهداء الثورة من 25 يناير و لحد امبارح .
يهمنا نشوف رد فعل المخلوع لما يعرف ان مراته احيلت لجهة سيادية عليا لفضحها "سر شويبس" .. و بعدين يعرف انه "بخ " و مافيش تحقيق ولا دياولوا و دى اشاعة رغم ان سجن القناطر أعلن انه بيجهز نفسه لإستقبال مجموعة نسائية على أعلى مستوى .. لكن ده مش موضوعنا ، الموضوع ان المحاكمة العلنية ح تخرس الألسن إللى زعلانين من اقتراح دخول المخلوع و زوجته زنزانة واحدة ، معلنين رفضهم " للحب فى الزنزانة " .. فمن المؤكد تغير موقفهم بعد عرض التحقيقات بشكل علنى ، لأنهم وقتها يتأكدوا ان الراجل كبير و محتاج إللى يخدمه و دماغنا ما تروحش لإحتمالات فيها قلة أدب ، و ما نعتبرهاش خلوة شرعية ولا حاجة .. و بكدة الناس إللى بتطالب بوجود رئيس سابق مش رئيس سوابق تعرف تحدد موقفها .
و أهو لسة واصلنى أخبار عن أن التحريض على القتل عقوبته الإعدام ، يا ترى مين إللى ح يبلغ عن التانى .. يهمنا نشوفه و رجالته بيبيعوه ، و بعدين هو بيبيع زيكووووو .. رغم ان آخر اشاعة بتقول انه اغمى عليه اول ما عرف بالقبض على زيكو ..
لكن كل ده ما يعنيش غير حاجة واحدة ، ان أى حد معاه ورق تدين المخلوع أو ولاده يسارع بتقيمها للنائب ، خوفا من الدخوول فى الحلقة قبل الآخيرة من مسلسل ريا و سكينة ، قبل ظهور فتحى العبد الوهاب .. أى حد عنده ورق او اتهام ضد المخلوع بسرعة يقدمه للنيابة ، قبل ما العصابة تستف الأوراق و ما يقدرش أى وكيل نيابة على تكيف القضية و سجن العصابة ، ارجوكم ساعدوا " فتحى عبد الوهاب " فى القبض على الرئيس ــ رئيس العصابة
ملاحظة : محاكمة المخلوع يوم ١٦ ابريل .... للاستعلام 01524882868 / 0171651365
المشاركات
ليست هناك تعليقات:
إرسال تعليق