ما ينفعش نستنى أكتر من كدة .. بعد ما عدد مصابى التحرير وصل 1036 مصاب .. يتصابوا ليه ؟؟ عشان بيطالبوا بحقهم .. حقهم فى القصاص .. حقهم فى المحاكمة القتلة . حقهم فى بلد ترعاهم اتروت بدم ولادهم .
و المفروض نستنى لإمتى عشان نحاسب البهوات الكبار على المصايب إللى عملوها و لسة بيعملوها .. نستنى لما يخلصوا على الشعب كله .. و لا نستنى لما يتوبوا و يستغفروا و يندموا و يرجعوا يقتلوا و يتوبوا و يسغفروا و يندموا .. ما هو إللى قتل المتظاهرين يوم 28 يناير ح يفرق معاه إيه انه يقتل أهلهم و أسرهم يوم 28 يونيو .. طول ما احنا حاسين ان العدد فى اللمون و الشعب ما بيخلصش ، يبقى إيه يعنى كام واحد يروح ، يبقى عمرنا ما ح نحاسب القتلة و لا ح نعرف و نحس بأهمية القصاص
إللى حصل يوم 28 يونيو هو جزء من حلقة فى سلسلة طويلة ، و لو ما قطعناش ديلها ح تطول كمان و كمان لحد ما تتلف على رقابينا كلنا .. طول ما احنا ما طهرناش البلد من اتباع النظام القديم ح تفضل حالة الإحتقان شغالة و موجودة لأن الناس حاسة انها كدة كدة ح تموت .. بالشكل ده ح تقرر تموت بشرف أحسن ما تموت فيران .. و ده مش معناه ان الطريق مسدود ، لأ الطريق مفتوح لكن مالوش غير سكة واحدة و هى " المحاكمات العاجلة و سرعة تحويل كل المتورطين فى قتل المتظاهرين لمحاكمة عسكرية و يتضاع عليها كل من تعرض لأسر الشهداء فى يونيو ، و تكون المحاكمة حالا و فورا .
ولا فى حد عنده رأى تانى بعد رئيس الوزرا ما قال ان عنده سبع وزراء مش محتاجهم لأنهم ما بينفذوش مطالب الثورة ، و عنده 10 لواءات من قيادات الشرطة يجب احالتهم للتقاعد لأنهم متورطين فى قتل المنظاهرين .
المفروض نستنى إيه بعد ما البلطجية بدأت تضرب أهالى الشهدا بعد ما ساهمت مساهمة واضحة فى موقعة الجمل و كل موقعة جمل مستجدة و ح تستجد .
مش فاهمة المفروض نستنى إيه بعد الاتهام إللى وصل للنائب العام بيتهم فيها " الغير مبارك " و شهرته المخلوع بالخيانة العظمة .. مش فاهمة المفروض نستنى إيه عشان نتخلص من بطئ التقاضى فى محاكمة المخلوع وكافة رموز الفساد
بعد ما كنا نازلين يوم 8 يوليو عشان نأكد على ان الدستور اولا ، دلوقتى الكل ح يعتصم فى الميدان من النهاردة للمطالبة بسرعة الحكم على الغير مبارك و العادلى ، إقالة كافة المتورطين فى أحداث 28 و 29 يونيو، الاعتصام ح يكون مفتوح لحد ما يتم تطهير وزارة الداخلية من مديرى الأمن وقيادات حبيب العادلى وإعادة هيكلة الوزارة ومحاكمة المتطورين فى قتلة شهداء 25 يناير ، وتطهير وزارة الداخلية من الضباط الفاسدين ومحاكمة قتلة الثوار. . الإعتصام مش بس عشان تطهير الداخلية لأ و كمان للمطالبة بحرية الإعلام والصحافة
احنا فى شرعية ثورية و لازم نطبق قوانينها .. و اول قوانينها تطهير الداخلية .. و تعليم باقى الموجودين بهذا الكيان ان دور الظابط يقف عند تطبيق القانون و ليس خرقه و الاستعانة بالبلطجية .. لازم ظباط الداخلية الجديدة يكونوا على دراية بالقانون و يعرفوا يطبقوه بنفس قدرتهم على استخدام العنف اللى اتعودوا عليه ، الظابط الجديد لازم يتعلم التعامل مع المواطن المحترم أكثر من التعامل مع البلطجية، الظابط الجديد لازم يعرف انه بيتعامل مع بنى آدم له حقوق آدمية و دور الظابط انه يجيب حق المجتمع بالقانون ، مش يجيب حقه الشخصى بالبلطجة .. الظابط الجديد لازم يتمتع بعقلية علمية و إدارية تتمتع بالرؤية المستقبلية أكثر من إستخدامه لأسلحته أو قوته الجسمانية و العنف و أدوات التعذيب
و ما تنسوش المقولة إللى بتقول الثورات كسمك القرش كلما رأت الدم توحشت
ودي مطالب اهالي الشهداء اللي كانوا بيوزعوها فى الميدان:
1- مطلوب ضم جناية حسني مبارك وجميع جنايات قتل المتظاهرين واصابة الثوار بالقاهرة الكبرى لجناية حبيب العادلي الى القضية رقم 1227 لسنة 2011
2- مطلوب تفرغ هيئة المحكمة المختصة بقضايا قتل واصابة الثوار بعد ضمهم ولحين الفصيل فيهم
3- حبس جميع الضباط وامناء الشرطة المتهمين بقتل اواصابة الثوار احتياطيا لوقف تأثيرهم على الشهود
4- مطلوب توسيع دائرة الاتهام بقتل واتصابة الثوار لتشمل:
- احمد نظيف رئيس مجلس الوزراء السابق
- انس الفقي وزير الاعلام السابق
- طارق كامل وزير الاتصالات السابق
- حاتم الجبلي وزير الصحة السابق
5- مطلوب نقل وقائع جلسات المحاكم مباشرا على التلفزيون المصري لما له من اهمية
- تحقيق لمبدأ الشفافية
- المردود الايجابي على الاقتصاد المصري
- انهاء حالة الاحتقان الشعبي في هذا الشأن
6- صرف معاش استثنائي فوري لجميع مصابي الثورة مع علاجهم على نفقة الدولة بالداخل والخارج
المشاركات
