حوار بينى و بين واحد عنده اصرار على تشويه الشعب المصرى و ثورته :
و بدأ هو الحوار و قال :
ممكن كل عبقري مصري يسأل نفسه السؤال ده لو أنا مكان المجلس العسكري كنت هعمل ايه فيما يلي ؟؟؟ -
شعب قام بثورة ولم يتفق على أي شيء غير اسقاط النظام أما أي شيء آخر فلا يتفق عليه اثنان من المصريين .
و اتغظت جدا منه و قلتله :
الكلام ده مش حقيقى لأن انت إللى عايز تشوف الإختلاف رغم ان عندك اجماع حول :
1. اقالة الحكومة
2. تفعل قانون الغدر و محاكمة القيادات الفاسدة إللى دمرت البلد و لسة بتدمرها سوا كانت فى السجن او برة
3. عودة الشرطة و إللى مش ح ينزل يشتغل يتم تحويله لمحاكمة عسكرية تبعا لقانون الداخلية
4. تفعيل القانون لكل من يسئ أو يتعرض لأى منشئة دينية او عسكرية او مصرية بصفة عامة
5. .منع قيادات الحزب الوطنى من ممارسة العمل السياسى لمدة خمس سنوات
6. اقلة المحافظين
7. اقالة رؤساء الجامعات
هنا اعتبر نفسه ما سمعش حاجة و قال نقطة تانية لا تحمل غير رغبته الاصيلة فى تشويه الشعب المصرى
و قال : هو المجلس العسكرى ح يعمل إيه مع شعب كان يعيش بالكامل على الرشاوي والنفاق والوساطة والمحسوبية والكذب والنصب والسرقة والمعاكسات والتحرش .... الخ الا من رحم ربي ... وفجأة وبقدرة قادر اتحول كله لملائكة رحمة يريدون الكمال التام في كل شيء ويحاسبون المجلس العسكري والحكومة على كل لفظ وكل تنهيدة وكأنهم كانوا ملائكة وليسوا من هذا الشعب بما فيه من أمراض وعيوب وعفن ولدوا وتربوا عليه من عشرات السنين .
الاجابة اللى أحب أقوللها الافندى ده إللى بيشوه شعب كامل بصفات مش فيه ، أحب أقوله ان الرشوة دى إللى نشرها النظام الفاسد إللى حللها على لسان بعض شيوخه ... و المحسوبية و الكذب الشعب ما عرفهاش غير على إيد نظام بائد فاسد عميل كان هدفه قتل البلد ..و لأن الشعب المصرى شعب أصيل رفض كل الصفات إللى حاول نظام " الغير مبارك و اعوانه " زرعها فيه و قام بثورة ... ثورة عظيمة العالم كده بيتكلم عنها و بيدرسها ... و على ذكر النصب إللى انت بتوصف بيه شعب من أشرف شعوب الأرض ، افكرك انها من اهم أدوات النظام الفاسد و بيها قدر يسرق فلوس الشعب اللى مش عاجبك و اراضيه و دخل لنا المبيدات المسرطنة و جرف الاراضى و سرق ارواح المصريين و تسبب فى فقرهم
لو انت ما تعرفش مين شعب مصر روح اقرا التاريخ يمكن تتعلم حاجة ..... بطل تروج كلام الصهاينة و تصف شعب مصر باتهامات أكيد هى فيك انت لوحدك و فيمن يحيطون بك و فيمن تدافع عنهم من امثال تربية المخلوع ، لكن شعب مصر مش كدة ... و اتباع النظام الفاسد و الفلول مش هما شعب مصر
ساب الكلام ده و دخل على نقطة تالتة قال فيها :
و السلفيين الذين يرون ان المجتمع بعيد عن شرع الله ويجب تطبيق الشريعة مهما كان الثمن وحسب رؤيتهم هم لما يعتقدون أنه لا مجال للتفكير فيه أو النقاش حوله بما في ذلك ضرب السياحة والفنون والتعليم والاعلام .... الخ
و ما عرفتش الراجل ده أهبل و لا بيستهبل : لأن أى اختلاف يكون علاجه الحوار ، و خاصة لو الإختلاف كان دينى يبقى الإسترشاد بالقرآن و السنة مش بالقمع زى ما عملت انت ونظامك الفاسد .. و ترجع دور الازهر اللى انت و نظامك البائد و اتباعك عطلوا دوره و هدموه .
الغريب انه ما كانش بيرد و بينقل على نقطة تانية ، و بدأ يقول " و العلمانيون يرون أن الدولة يجب أن يحكمها المنطق والعقل وأن تساير المجتمع الغربي وتأخذ منه كل ما فيه من مزايا وعيوب ولو أدى ذلك الى موالاة اسرائيل وذبح الفلسطينين وتدمير أخلاقيات المجتمع وقيمه وعقيدته والتخلي عن كل ما هو اسلامي وأخلاقي لصالح الحرية والتحرر .
لكن يرد و لا ما يردش احب اقوله ان مافيش موالاة لإسرائيل زى اللى حصلت ايام مبارك و اتباعه و كل من تربى على ايديهم و لسة موجودين فى مناصبهم و الوحيد اللى عايز يشيلهم هو الشعب المصرى اللى مش عاجبك يا خسيس الشعب المصرى برئ من امثالك و خاصة الاغلبية الصامتة اللى انت بتوصفهم بافظع الالفاظ عشان تنتصر لفئة قليلة لا يميزها غير الجهل و الجبن ... فالشعب المصرى هو من رفض التوريث بينما من تدافع عنهم انت رضيوا بيه و سبحوا بحمده و تركوا حذاء جمال مبارك فى افواههم
ملكش دعوة بالاغلبية الصامتة و ما اسمحلكش تقول عليهم اغلبية خرساء عمياء عرجاء فقراء جهلاء عاملين زي الاطرش في الزفة وزي قطيع الغنم بيجروا على حسب صافرة الراعي يمين يمين يسار يسار ... انت اللى عديم الفهم لأنك ما تفهمش حكمة هؤلاء الذين يحملون سمات حضارة عمرها أطول من خايبتك انت و من تدافع عنهم
واضح ان ده رأيك الشخصى فى شعب مصر العظيم العبقرى ، لان ماحدش شايف شعب مصر بالوصف إللى انت بتتكلم فيه ده غيرك ايها الغبى ... و العدو إللى انت خايف منه ده مرعوب منك فبطل تصور لنفسك ان الصرصار ديناصور و توهم الناس بكذبة فى خيالك لأنك تعانى من الجبن ، يا مدعى يا من يجهل دينه .. دور فى أحاديث السيرة و النبوة عشان تعرف رسول الله قال إيه عن المصريين خير أجناد الأرض .
و لم ينتهى هذا المشوة إلا بالكلام عن العدو الماكر المخادع المتربص و المستعد لحرق مصر في أي لحظة ويسلط مجموعة من كلابه داخل الوطن لحرق مصر وتدميرها وليأتي هو بعد ذلك ليحتل ما بقي منها ... احب اقولك انت و عدوك جاتكو خيبة فيك و فى عدوك
العدو الماكر ده فى خيالك انت ... حزب الله ما يجيش 1% من جيش مصر و مخلى عدوك الماكر يلف حوالين نفسه .. بطل توهم نفسك ، و خليك راجل ... الرعب و الخوف من صفات عدوم مش من صفاتك ، و لا نت العدو و انا مش واخدة بالى .. المصريين إللى قال عنهم الرسول الكريم خير أجناد الأرض و لا دى كمان ح تشكك فيها ...
_________________________________
و هنا سابق كل ما سبق ليقفز إلى مشكلة المطالب الفئوية فقال عنها
6- مطالب فئوية توقف العمل في مصر كل يوم وعدوى تنتقل مثل انفلونزا الخنازير بين كافة فئات الشعب المصري لنيل مصالح شخصية وعدم وضع أي اعتبار لصالح الوطن وحمايته والتحمل للخروج من هذه المرحلة فلا يضعون أي اعتبار لذلك أبدا .
و ردى كان :
المطالب الفئوية دى اللى خرجها النظام البائد عشان يقتل الثورة و يصورها على انها مجرد مظاهرة هدفها رفع مستوى المعيشة ... النظام خرجهم و الاعلاميين الفاسدين صوروها و جسدوها و ما كانوش يعرفوا ان السحر ح ينقلب على الساحر .. لتصبح المطالب الفئوية هى استكمال حقيقى للثورة بعد ان قررت كل فئة ان تلفظ الفاسدين فيها و تطهير كل المؤسسات من اعضاء الحزب المنحل اللى كانوا السبب فى كل فساد من اول ما ظلمتوا العاملين فى الدولة و استمرئوا هذا الظلم
و انهى الكائن العجيب كلامه قائلا : " أسألكم بالله أريد أن يرد على أحد العباقرة ليقول لي ماذا يفعل المجلس العسكري أو الحكومة أي رئيس أو برلمان سيأتي في مجتمع بهذا الشكل
وياريت نسمع اقتراحاتكم "
ده ردى على هذا الخايب و لو أى حد تانى عنده أى اقتراحات أو رد ياريت يقوله أرجوكم .. ف هذا هو اختصار ردى عليه :
· اقالة الحكومة
· تفعل قانون
· عودة الشرطة و إللى مش ح ينزل يشتغل يتم تحويله لمحاكمة عسكرية تبعا لقانون الداخلية
· تفعيل القانون لكل من يسئ أو يتعرض لأى منشئة دينية او عسكرية او مصرية بصفة عامة
· منع قيادات الحزب الوطنى من ممارسة العمل السياسى لمدة خمس سنوات
· اقلة المحافظين
· اقالة رؤساء الجامعات
· عقد جلسات عمل مع الأحزاب السياسية و القوى الشعبية لوضع اطار تشريعى للانتخابات فى الفترة الإنتقالية
· و الأهم عمل جدول زمنى بكل التفاصيل ... لازم كل خطوة تكون مرتبطة بمواعيد ده لو كنتوا صادقين مش مدعين
المشاركات
