المتابعون

إجمالي مرات مشاهدة الصفحة

Subscribe Now: standard

Translate

click

الثلاثاء، 26 يناير، 2016

افصلوا اعضاء كل النقابات لينصلح الحال

اتعجب بشدة ممن يعلقون المشانق للممثل الشاب أحمد مالك و المراسل شادى حسين ، و ارى ان فى تشنجهم ضعف و قلة حيلة و اكتئاب يتمنوا ان يطول الجميع .... فاصحاب المشانق لديهم رغبة شديدة فى ان تستمر الناس فى كبت حريتهم  و لا يعبروا عن نفسهم حتى بنكتة – و على فكرة انا هنا مش  فى موضع تقيم النكتة -



لكن ان اطالب بقتل شخص لمجرد ان قال نكتة فده امر غير طبيعى ... و من يطالب به ايضا شخص غير طبيعى ... ف الأمر فى الآخر مزحة او نكتة يا تعجبك يا متعجبكش ... لكن لأنك - يا من رضى  بتعليق المشانق لمالك و شادى - عارف انك رضيت بكسر رقبة حضرتك و رضيت بوضعها حت نعال كل من يحكم لذلك انت ترى فى فيديو مالك و شادى ابعد من مجرد نكتة ... و تطور الأمر معاك و أخد ابعاد نفسية و اخلاقية قررت معها تدمير مستقبل  الشابين ... و السبب : مجرد نكتة ما عجبتش حضرتك

 الحقيقة لو صاحب المشنقة كان شخص طبيعى و لا يعانى من ازمات نفسية زى القهر و الاكتئاب و عدم القدرة على التعبير عن نفسه  كان اعتبر الفيديو نوع من انواع التعبير عن النفس  ، أو كان اعتبرها  نكتة بايخة أو حتى نكتة قبيحة  و عدت





كان اجدر باصحاب المشانق ان يجعلوا الفيديو يمر لكن كان الله فى عونهم فقد رضيوا بالقهر و  يرون فى أى شكل من اشكال التعبير و لو حتى كان بابتسامة قهر لهم ... انا متعاطفة جدا مع اصحاب المشانق  لأنهم اصبحوا يرون فى النكتة – سواء جيدة او بايخة – قهر زائد لهم  يذكرهم بضعفهم المستمر و  يزيد من اكتئابهم و يحول هذا الاكتئاب الى تشنج يصل الى الصرع

اتعجب بشدة ممن يرى ان شادى و مالك قد خدش حياءهم و احنا طول اليوم نسمع الفاظ بذيئة فى الاعلام و من كل طوائف الشعب و ممثليهم ، ده غير الشتامين و المنحرفين و المتحرشين الموجودين فى كل مكان
اتعجب بشدة مما وصلنا اليه من افورة ، لحد ما اصبحنا فى زمن الأفورة


و اخير اتعجب بشدة من النقابة التى اهملت حقوق اعضاءها لتتفرغ للاجراءات السياسية و كأن مجلسها عين بامر الحاكم و ليس بجمعية عمومية انتخبها الأعضاء .... اتعجب من نقابة تركت حقوق اعضائها ضائعة عند اتحاد الاذاعة و التلفزيون لتتفرغ لفصل الأعضاء

اعتقد ان مجلس النقابة يعانى ضغط فوق طاقته ما جعله حتى لا يستطيعون فصل عضو مرة و الطلب بحق آخر مرة  ... لكنى اعتقد ان هناك ضغط  ما واقع عليهم يدفعهم لفصل الاعضاء فقط

صحيح القهر يحكم المدينة ،  لكن فى النهاية اى قهر يولد انفجار ... كل العلوم تؤكد ان زيادة الضغط تولد الانفجار ... و زيادة عدد المقهورين يزيد من سرعة و قوة هذا الانفجار

و نحن فى انتظار ايقاف المزيد من اعضاء النقابات ليست الفنية فحسب و لكن كل النقابات  فى كل المجالات و على مستوى الجمهورية لعل هذا يعجل بصلاح الأحوال و توليد قوة انفجار  و طوفان لا يقدر عليه أحد و لا يقدر  أحد على فصله او ايقاف تصاريحه

فوزى العوامرى كتب على صفحته يسأل : ﻭﻓﻴﻦ ﺣﺴﺎﺏ " ﺟﺪﻉ ﻳﺎﺑﺎﺷﺎ " ﻭﻓﻴﻦ ﺣﺴﺎﺏ ﺍﻟﻠﻲ ﻗﺘﻞ ﺍﻟﻤﺘﻈﺎﻫﺮﻳﻦ ﺑﺈﺧﻔﺎء ﺍﻷﺣﺮﺍﺯ ﻓﻲ ﻣﺬﺍﺑﺢ ﺍﻟﻘﻨﺎﺻﺔ .. ﻓﻴﻦ ﺣﺴﺎﺏ ﺍﻟﻤﻘﺘﻮﻟﻴﻦ ﻓﻲ ﻣﺬﺑﺤﺔ ﺍﻟﺠﻤﻞ .. ﻓﻴﻦ ﻗﺼﺎﺹ ﻓﻘﻊ ﻋﻴﻦ " ﺟﺪﻉ ﻳﺎﺑﺎﺷﺎ " ﻛﻤﺎﻥ ﻣﺴﺘﻜﺘﺮﻳﻦ ﻋﻠﻰ ﺷﺎﺑﻴﻦ ﻋﺎﻳﺸﻴﻦ ﻓﻲ ﻣﺴﺘﻨﻘﻊ ﺍﻟﻈﻠﻢ ﻭﻣﺴﺘﻨﻘﻊ ﺍﻟﺒﻘﺎء ﻟﻸﻇﻠﻢ ﺍﻥ ﻳﻨﺘﻘﻤﻮ ﺑﺎﻟﺸﺘﺎﺋﻢ .. ﻓﻴﻦ ﻗﺼﺎﺹ ﻓﻘﻊ ﻋﻴﻨﻴﻦ " ﺟـﺩﻉ ﻳﺎﺑﺎﺷــﺍ " ﻓﻴﻦ .

نوارة مراد : اللي شايفين انهم قليلين ادب .. يركن علي جنب شويه بقي .. العيال دمها خفيف و بتعبر عن اللي هيه حاساه بجرأه و بلطف و مش فارقلهم حاجه .. و لا حتي رأينا
و علي فكره دي اقل هديه تتقدم للشرطه ف عيدها



باسم يوسف علق على  بيان ابلة فاهيتا حيث كتب عبر حسابه الشخصي على موقع التواصل الإجتماعي”تويتر” : “إخص على الرخص وقلة الأصل


الكاتب الروائية سعاد سليمان  كتب تقول : احمد مالك الواد الجدع اللي دايما كان واقف معانا في كل الميادين اخر وقفة ليه كان معانا في وقفة شيماء الصباغ ــ

المخرج عمرو  سلامة  في تدوينة له عبر حسابه الخاص بموقع التواصل الإجتماعي “فيس بوك” :” لم نحاكمهم على الجد فحاكمونا على التهريج

و ده رد شادى حسين اللى ما ينفعش نقول اى كلام بعده :
ايه ؟ قفشتوا ليه ؟ انا بهزر...ده انا حتى مفقعتش عين متظاهر ولا سحلت بنت في قلب الشارع وعريتها...ولا هو يعني كان لازم اغتصب بنت في كمين علشان الموضوع يهدا ؟ طب ليه منعتبرش اللي صورتهم في اخر فيديو دول حزب الله وحماس ولابسين ميري زي قبل كدة ؟
في وقت صغير انا بقيت محبوب من أغلب الناس علشان كنت بقدم تقارير في برنامج تلفزيوني محتواه ساخر...كانت اغلب الوقت السخرية وراها معنى...الناس كانت بتستظرفني علشان كنت بضحكهم على الواقع اللي احنا فيه...بس برضه كانت بتشتمني بحجة اني بفضح صورتنا قدام العالم الخارجي..وكنت بصراحة بتفاجئ انهم مش مستوعبين ان العالم الخارجي يعرف بلاوينا قبلينا واحنا بس اللي عاملين مش واخدين بالنا.
شاركت في ثورة يناير زي ما كتير من المصريين شاركوا فيها...وعمري ما هندم على مشاركتي فيها...الحقيقة اني بعتبر نفسي محظوظ اني شاهد على اغلب احداث الثورة من أولها لاخرها...شوفت كتير زي ما كتير شافوا
...
شفت سحل وقتل في عز الظهر من قبل "رجال" الأمن...وبشكل شخصي تمت ممارسة بعض الانتهاكات معايا في احداث الثورة من ال3 فصائل اللي حكموا من بعد الموجة الاولى من الثورة.
عشت في حالة اكتئاب طويلة مع مرور الأحداث وسط عجز تام وعدالة ملهاش وجود...واخيرا...اتمنعنا حتى من ابداء رأينا...ممنوع تعمل مظاهرة وتعبر فيها عن رأيك والا هتتسجن او تتقتل...أغلب الأصدقاء بطلوا الكلام في السياسة وبيحاولوا يتناسوا الثورة علشان التشوه اللي أصيبنا بيه من اللي شوفناه.
لكن الحقيقة انهم مش ناسيين ومش هينسوا ومش هيعرفوا...محدش عارف يتكلم كله ساكت كله خايف ومرعوب وانا أكترهم.
في ذكرى 25 يناير 2016 بقى في تواجد أمني رهيب في الشوارع مع تهديدات ووعيد لمن ينزل يتظاهر...محدش فعلا نزل وكله مقهور وكله استوعب اننا مش عارفين ننسى...طيب خلاص...انتو فعلا معاكم سلاح ومعاكم السلطة والقانون...بس كل اسلحتكم ديه احنا هنعمل منها نكت , كوميكس او فيديو صغير وكدة كدة انتو تقدروا تخطفونا من بيوتنا وتقتلونا في عز الظهر...بس مش هتقدروا تنكروا وجودنا ولا هتقدروا تنكروا انكم نكتة...بس نكتة سخيفة.
كلام جميل والبعض هيعتبره شجاعة ناس هتشوفني بطل وناس هتشوفني خاين واستاهل الدبح...بس الحقيقة هي اني واحد عادي كل شوية بيتصنف على حسب مزاج الناس...
انا واحد عادي بيهزر وبيسخر وبيخاف كمان...من مشاركتي لأحداث الثورة لحد التقارير الساخرة انا خايف وبزداد خوف يوم عن التاني
وعلى قد ما انا خايف بس بحاول اتمسك بأفكاري ومش بفهم لما حد يقولي كفاية بقى واهدى شوية...مش بفهم لأن ده انا واحد بيخاف بس بيعمل اللي في دماغه.
الخوف دلوقتي مبقاش على نفسي...لأن التهديدات خلت عيلتي كمان عايشة في رعب...بيدفعوا تمن حاجة انا اللي عملتها...كتير بيشتموني بأهلي على انهم ربوا واحد زيي...بس اللي اغلب الناس متعرفهوش ان والدي من زمان بيصدق النظام وبيأيده...وعلى فكرة هو ده احنا...افكارنا غير اهالينا.
اخيرا...شعور غريب انك تبقى محبوب في يوم وتلاقي كل الاعلام مقلوب عليك وعايزينك معاهم علشان انت موهبة واليوم اللي بعده تلاقي في حرب عليك من كل الاطراف بمجرد انك قولت اللي انت عايز تقوله مش اللي هم عايزينك تقوله.
...
ممكن اكون كنت بخاف زمان...بس دلوقتي انا مرعوب...بس هفضل بعمل اللي في دماغي حتى وانا مرعوب
ضحكتوا ؟ وقعتوا على ضهركم من الضحك ؟ اقولكم حاجة بس متتخضوش...انا مكنتش بقول نكت وكنت بستغرب لما بتضحكوا على التقارير اللي كنت بعملها قبل كدة.
حاسس ان ايامي معدودة برة القفص...ولما ادخله مش هخرج منه قريب بس لو ديه النهاية خلوني اقولكم اني مبسوط بأصدقائي الكتير اللي ديما كانو بيقفوا جمبي وساندوني في مواقف مختلفة رغم اختلافهم معايا في بعض الاحيان.
خلوني اقولكم اني محظوظ اني اعرفكم وآسف على قلقكم الدائم عليا واسف لصديقي مالك لتوريطه معايا فيما لا احد يستطيع ان يتحمله...هفقد حاجات كتير بحبها اصدقائي واسرتي اولها...وشكرا لمساندة كل واحد ميعرفنيش...اشوفكم في عالم اخر يا احبائي نكون فيه احرارا نضحك دون أن نُسجن


الثلاثاء، 15 ديسمبر، 2015

من أجل شطب أحمد موسى من نقابة الصحفيين لانتهاكه ميثاق الشرف الصحفي



من أجل شطب أحمد موسى من نقابة الصحفيين لانتهاكه ميثاق الشرف الصحفي


 ندعو كل الزملاء الصحفيين إلى التوقيع على هذا البيان الذى نقدمه لمجلس نقابة الصحفيين لإحالته للجنة التحقيق..
وهذا نص البيان:
الأستاذ نقيب الصحفيين
الزملاء أعضاء مجلس النقابة
تحية وبعد..
يطالب الصحفيون الموقعون علي هذه المذكرة باتخاذ إجراء نقابي ضد الصحفي والإعلامي أحمد موسى عضو نقابة الصحفيين.
إذ دأَب المذكور علي استخدام المنبر الإعلامي الذي يطل منه على الجمهور في سب الناس وانتهاك حياتهم الشخصية، وتمادى في الأمر حتى وصل لحد عرض صور خاصة وشخصية قال إنها للمخرج خالد يوسف، وذلك علي شاشة قناة صدى البلد التي يعمل بها.. رغم قوله أنه غير متأكد من صحة هذه الصور.
وكان موسي قد سبق وسب بشكل علني شهداء ثورة 25 يناير، بعد أن تجاوز عشرات المرات في حق رموز الثورة وشهّر بهم وأهانهم واتهمهم بتُهم باطلة، وهو الأمر الذي يخالف ميثاق الشرف الصحفي، ومدونة السلوك الإعلامي التي أقرتها النقابة منذ أيام، بل وينال من قيمة ومكانة العمل الصحفي والإعلامي بشكل عام.
إن الموقعين علي هذه المذكرة يطالبون باتخاذ إجراءات نقابية وقانونية فورية ضد أحمد موسى عبر إحالته للتحقيق النقابي، ويطالب الموقعون نقابة الصحفيين بالتنسيق مع غرفة صناعة الإعلام في اتخاذ إجراء يمنع موسى من الظهور علي الشاشة ما دام يواصل انتهاكاته لحياة الناس الخاصة، وما دام يواصل إهانته وهجومه علي ثورة يناير ورموزها.

اسماء بعض الموقعون حسب الترتيب الأبجدي:
أبو المعاطى السندوبى
أحمد رضوان
أمنية إبراهيم
أمنية حسنى كُريم
احمد جمال الدين حسن احمد
تامر المهدي
سلوى عثمان
شيماء عادل عطية حافظ
علي راشد
عمر سعيد
فيولا فهمى
محمد سعيد عبدالغني
محمود نجم
معتز الشناوى
منى عزت
نبيلة صبيح
ولاء البري
وليد صلاح
ياسمين منير


وصلنا للقاع بالدخول فى الحياة الشخصية - من مصلحة من ابتزاز خالد يوسف ؟!!!


اعتقد  أن خالد يوسف قرر ان يكون له رؤيته الخاصة فى البرلمان و يفرض رؤيته  و يشكل معارضة حقيقية داخل البرلمان  ... و هذا ما رفضه  آبانا الذى يملى قرارته على البرلمان و أعضاءه ... و عندما فشل مع خالد قرر ان يلفق له صور اعتقد انها اضعف من ان نقول عليها وقائع و حقائق نقوم بتفنيدها او مناقشة ابعادها




و قبل ما اقول كلمتين لآبانا أحب أقول لخالد استمر على موقفك – التى قد اختلف معها مستقبلا زى ما اختلفت معك فى بعض المواقف سابقا  - و لا تخاف من تلفيقاتهم فهم هش و هياكل آدمية ، انهم خيالات ظل تتحرك على الأرض ... فقد تخطى الاعلام المعايير المهنية و القانونية بالدخول فى الحياة الشخصية – ده لو فرضنا ان الصور حقيقية و غير ملفقة -

أحب اقول لآبانا :

آبانا انت بقيت فاشل فى كل حاجة حتى فى تلفيق الصور ... انت لازم تآخد كورس تدريبى عند الجماعة الارهابية عشان تتعلم تلفق الصور بشكل متقن و تظهر حقيقى
على فكرة انت ممكن تلاقى
#‏خالد_يوسف عند مادة    material افضل لخالد و هو بيجسد بعض المشاهد وقت البروفا و بيوجهه الممثلين على أساسها قبل التصوير



آبانا الذى يحرك الاعلاميين : انت تخطيت كل المعايير الاخلاقية و القانونية فليس من حققك التوغل فى الحياة الشخصية لأى مواطن بحق القاتون الذى يكفله الدستور



مادة 57 من الدستور المصري:
للحياة الخاصة حرمة، وهى مصونة لا تمس. وللمراسلات البريدية، والبرقية، والإلكترونية، والمحادثات الهاتفية، وغيرها من وسائل الاتصال حرمة، وسريتها مكفولة، ولا تجوز مصادرتها، أو الاطلاع عليها، أو رقابتها إلا بأمر قضائى مسبب، ولمدة محددة، وفى الأحوال التي يبينها القانون
#‏حاكموا_احمد_موسى




و اليكم بيان جبهة الابداع ونقابة المهن السينمائية :


لصالح من التحريض والتشويه واستباق التحقيقيات مع النائب خالد يوسف؟
=================================================
بعيداً عن كل معايير موضوعية الإعلام ... وافتقاراً لأية مهنية في التعاطي مع قضية لم يبدأ تحقيقاتها النائب العام... وتأخيراً للصالح الوطني العام في مقابل تقديم الضجيج الإعلامي... وسعياً لتحقيق فرقعات إعلامية على حساب وطن يعاني من مخططات التفريق والتفتيت .
عرض المذيع أحمد موسى عبر برنامجه على إحدى الفضائيات الخاصة، صوراً مشوشة يظهر فيها أحد الأشخاص المشابهين للمخرج والنائب خالد يوسف وبرفقته إحدى السيدات، مُعلناً إنه (يملك الكثير من الصور التى يظهر فيها المخرج والنائب خالد يوسف)، قبل أن يطالبه بالظهور ليُعلن حقيقة هذه الصور.
وإن هكذا تصرف على الساحة الإعلامية في هذا التوقيت الدقيق من عمر الوطن، وعلى أعتاب بلوغ أولى جلسات البرلمان المصري 2015م، لا يمثل إلا استهدافاً لشخص واحدٍ من رموز الفن المصري الفاعلة، التي ساهمت في صناعة ثورتي 25 يناير و 30 يونيه، ولا يعبر إلا عن حالة استهداف حقيقي لمن تبنوا خطاب الثورة من اليوم الأول، وأعلنوا عن رفضهم لعودة مصر التي كانت قبل 25 يناير 2011م، ولا يمكن قراءة هكذا تصرفات إلا عبر زاوية التهديد والتلفيق والتشنيع ضد كل من يتوقع انتصاره للإرادة المصرية في مواجهة نظامي مبارك والتنظيم الإخواني، من قبل بعض وجوه أبت إلا الفصل بين ثورة مصر بجولتيها (25/30)، سعياً لاستعادة مراكز قوى أسقطتها إرادة الشعب وكان النائب خالد يوسف من أوائل الذين بشروا بتهالك نظام المخلوع وقادوا دفة المواجهات حتى إسقاط نظام المعزول.
وإن مبدعي مصر يوجهون بلاغاً للنائب العام المصري، يطالب بضرورة التحقيق في البلاغ المقدم ضد النائب خالد يوسف، على أن يتضمن التحقيق ما تم نشره عبر برنامج المذيع المذكور، ليكون القضاء هو الفيصل بين من اِدعى ومن أُدُّعيَّ عليه، تماماً كما يكون الحاكم لكل من تسول له نفسه الدخول على خط العدالة بما يحمله في نفسه من أغراض، وبما يسوق له من حملات تشويه وتشهير .
التوقيع
جبهة الابداع المصرية
مصر مصرية
نقابة المهن السينمائية

الثلاثاء، 1 ديسمبر، 2015

اعتذارللأستاذ / اسامة انور عكاشة عن جريمة الحلمية الجزء6 - الجزء الزومبى



اعتذارللأستاذ / اسامة انور عكاشة عن جريمة الحلمية الجزء6 

معذرة يا استاذ فقد اصبحنا فى أسوأ حالاتنا الانسانية و الأخلاقية

معذرة يا استاذى فلم تنفع معنا كل محاولاتك لبث الاخلاق و المبادئ و القيم و رفعنا  كلنا الراية البيضاء للفساد و الإفساد و اصبحت لدينا قدرة غريبة على التعايش معه و تبرير مواقفه
معذرة يا  عميد الأدب الدرامى فقد اصبحنا نبيع كل شئ – المبادئ و القيم و التاريخ و التراث ... اصبحنا بلا قيم و لا مبادئ ... اصبحنا بيت دعارة كبير نبيع لمن يدفع المال ... بكرة يعرضوا الهرم للبيع  ، بكرة يبيعوا النيل و ابو الهول و يفرطوا فى الحدود المصرية و  تراب الوطن  

خلاص يا استاذ اسامة قدرنا نبيع جنسيتنا للى يدفع أكتر و نبيع افكارنا للى يدفع أكتر ... اصبح لدينا قدرة غريبة على التعايش مع الفساد و تقبله و مصادقته و الآكل من أكله و لما حد يكون عنده بوادر شرف يسألنا بتعملوا كدة  ازاى ؟!!  نقوله  بثقة " اصل ربنا مش ح يسيب الفاسد "

معذرة يا استاذ اسامة اننا وصلنا للسطو الفنى  ... و هذا ان دل على شئ يدل على الافلاس الفنى و الانحدار الاخلاقى ... وصلنا للسطو الفنى و الكل صامت
#‏اسامة_انور_عكاشة_ماماتش_عشان_يتسرق
#‏لا_لسبوبة_ليالى_الحلمية6
حتى الغاضبون منا يرون انه ليس من مصلحتهم التحدث فى الأمر حتى لا يغضب المنتج و يمكن ما يجيبهمش فى شغل جديد ... و الكارثة الأكبر في من هم موافقون على منطق هذا السطو و يبرروه و يتناسون حق الملكية الفكرية و يتحدثون عن الابداع على انه شئ يباع و يشترى ... يعنى بكرة ندفع للورثة حق محو اسم صاحب الابداع الأصلى لنضع اسم من يدفع أكثر
بكرة نرفع اسم جهات الانتاج المصرية لنضع مكانها اسم جهة تدفع اكثر





لقد وافقنا على مبدأ السطو ، و المبرر انهم دفعوا ... معذرة يا استاذ اسامة فمن يدفع يكون له حق التصرف و العبث و المحو و الاضافة و السرقة .... إلخ
معذرة يا استاذى  ليس من حقنا ان نسأل عن تاريخ و ايدوليجية من سيكمل عملك لأنهم دفعوا المقابل المادى ... استاذ اسامة ليس من حقنا ان نسأل عن هؤلاء الذين سيسطون على ابداعك
و اليك ارآء بعض الشرفاء الذين يحاولوا تنبيه البعض للانحدار الاخلاقى الذى وصلنا له :
مروان هادى – محامى بالنقد - يقول
" منتهى الفشل و الافلاس الفنى ان يتم كتابه جزء سادس من ليالى الحلميه على يد عمرو ياسين الممثل الفاشل و ايمن بهجت قمر..!!!!ايه الاستفزاز ده و ما علاقه هذا الفاشل بكتابه السيناريوهات او بالكتابه اصلا.. ولماذا لم يتحفنا بعمل درامى من كتابته قبل ذلك؟!!! هبل وخبل و خللل...!!!! ليالى الحلميه مرتبطه بوجدان الملايين باعتبارها عمل ملحمى و رمز من رموز الدراما المصريه والعربيه....لماذا التشويه و التخريف لعمل كتبه عملاق الدراما المصريه اسامه انور عكاشه رحمه الله!!!! و كيف وافق ورثته على هذا العبث ؟ !!!!!!!!!!!!

ماجدة خير الله :
حكايه الجزء السادس من ليالى الحلميه لاتجوز،لان فيه حاجه اسمها ملكيه فكريه وادبيه ،ولايجوز لاى مؤلف معاصر ان يقدم عمل عن احفاد سليم البدرى ونازك السلحدار وسليمان الغانم ،ولا يجيب سيرتهم من اصله ،لان تلك الشخصيات ومايخرج منها من شخصيات ملك اسامه انور عكاشه! ولايحق الاى شخص الاقتراب منها من بعيد او قريب ،الا بموافقه من الكاتب نفسه"وقد توفاه الله"،او ورثته مجتمعين!
وفى الحقيقه انا مستغربه ،لان يقوم ايمن بهجت قمر بتضيع وقته فى محاوله تقديم جزء سادس محكوم عليه مسبقا بالفشل،وفرق كبير بان يقوم والده بهجت قمر بعمل مسرحيه عن ريا وسكينه بعد فيلم صلاح ابو سيف الذى يحمل نفس الاسم ،لان ريا وسكينه شخصيات حقيقيه من التاريخ ومن حق اى حد يتناول تلك الشخصيات فى اعمال فنيه،لكن الشخصيات الروائيه ملك مبدعها فقط !..
انتهى كلام السيدة / ماجدة خير الله
_____________________________
و أعود لأوضح و اقول اننا بصدد الحديث عن مبدأ

و المبدأ ليس له علاقة باشخاص و لا عبادة الأصنام ... لا يجب ان يسطو شخص على  ابداع أى شخص .... ان السلم  الموسيقى سبع نغمات لكن ان تصادفت مازورة موسيقية مع  مازورة مؤلف موسيقى لشخص آخر يجعل من هذا الموسيقى  سارق  ... فما بالكم بمن يسطو على  الخط الدرامى و رسم الشخصيات و الابعاد الاجتماعية و العلاقات و الحبكة ... و اسم و نجاح عمل الغير ....
فى الفن ما ينفعش حد يستولى على مجهود حد ... و فى الابداع ماينفعش حد يستولى على ابداع حد .... ان الفن رؤية و وجه نظر ... و  ايمن بهجت قمر من مدرسة مغايرة  لمدرسة عمنا اسامة سياسيا و فنيا ... و ليالى الحلمية عمل سياسى اجتماعى ابداعى ... تحفة فنية ما يصحش يبقى سبوبة
و إللى بيردوا و يقولوا ان المنتج دفع للورثة أحب قولهم انى مش باتكلم على الحقوق القانونية  - اكم من جرائم ترتكب باسم القانون - باتكلم على الحق الابداعى ... مش من حق آخر السطو على ابداع حد ، و اللى بيسطو ده ايه تاريخه عشان يآخد عمل بقامة ليالى الحلمية .... و لما يكون شخص مش من نفس مدرسة اسامة انور عكاشة الفنية و لا السياسية يبقى ليه بيختار عمل مش على نفس ايدولوحيته ؟؟

لو تم  دعم فكرة السطو و تعميم المبدأ يبقى كل عمل متاح السيطرة عليه من أى حد ... معروف - نكرة - مصرى - عربى - صينى - تركى 
بعد #‏الاستيلاء_على_ابداع_ليالى_الحلمية
كل عمل درامى عرضة للاستيلاء عليه
و كل سيناريست - يبلغ وصيته للورثة

عشان ما يبعوش القضية و يقبضوا نصيبهم

نداء لكل السينمائيين الشرفاء و الممثلين الشرفاء لا تشركوا فى هذه الجريمة التى تهدر حق الابداع و حق الفنانين  ... لا تشركوا فى هذه الجريمة احتراما لإبداع استاذنا اسامة انور عكاشة ... لا تشاركوا فى هذه  الجريمة التى هى بداية لتجريدنا من مبادئنا و شرفنا و تراثنا و تاريخنا

التنازل هو بداية الانحدار الفنى و الاخلاقى 
ارجوكم انتصروا للحق و للمبادئ 
حدث خطأ في هذه الأداة

yahoo search

Custom Search