يعيش الغباء السياسى .. شكرا " حستى "

ميدان التحرير أثناء حذر التجول
بعد معركة جمعة التطهير

سمعت كتير و قليل عن الغباء السياسى ، لكن دى اول مرة اتعرف عليه و أقيم ابداعه بنفسى  .. هو فى كدة ؟؟ ده  حزب الكنبة لو وقف على رموش عينيه عشان يسد الشق إللى كان بدأ يظهر بين الثوار و الجيش بسبب جمعة التطهير ما كانش قدر يلحمه اللحمة أم  بهريز إللى قام بيها التسجيل الصوتى لـ "حستى "   على القناة السعودية  .

اهووه بكدة يا ثوار ما لكوش حجة ؛ الثورة المضادة بتبذل كل جهدها لمصلحتكم ، الأول معركة الجمل و بعدها الإنفلات الأمنى ، و لوقتى خطاب مشفى معفى منى تدخلا خارية غير الدولة الشقيقة السعودية ..  ماحدش يشوه سمعة الثورة المضادة و يقول انها ضد البلد و الثوار و الجيش زى ما طلع علينا آخر بيان .

تصقيفة حلوة بقى لبتوع الحزب الوثنى و رئيسه ، إللى  لو  حبوا  يقفوا مع الثوار أو خططوا لإنجاح الثورة ما يعملوش عمايلهم دى،  بس احنا إللى ما بنقدرش .. ده يا دوبك " حستى "  حس ان الشعب و الجيش ح يبطلوا يبقوا إيد واحدة ، و الجيش قرر  يآخد السبابة و الإبهام و الخنصر من الإيد الواحدة  ، و  يسيب للشعب البنصر  : قام طلع طلعة جوية على الفضائية السعودية الى اسمها العربية الكارو .. و أذاع بيان .. مش مشكلتى بقى ان كان بيقوله عشان يمحر وشه  و بعد المحارة يبيضه ، و لا عشان يصعب علينا و نحل عنه و عن أهله ، المهم انه  طلع علينا عشان يوحد الشعب و الجيش .. و زى ما طلع علينا ؛ بكرة ح تطلع على روحه الشلة إياها بتاع آسفين يا " حستى " و تقف عند مصطفى محمود عشان يحققوا الآية الكريمة إللى بتقول " و يخلق ما لا تعلمون "

.. هو صحيح أنا قلبى  واجعنى على مصطفى محمود ، و إللى بيحصل عنده .. لكن ح نقول إيه ؟!!!
 مانقولش غير سؤال وحيد  ل "حستى " قبل ما يقف قصاد النائب العام ؛ إيه إللى طلعك على قناة " عربية كارو " ؟؟
 بقى  اسمه كلام يا راجل انت ؛ يبقى  تلفزيون البيادة موجود و تتطلع تتكلم برة ، و ما تخترش غير قناة سعودية ، عايز توحى انك مش فى مصر .. قصدك تحرج مين ؟؟

ح امشيها انك قاصد تحرك تلفزيون البيادة ، بعد رفضوا يذيعولك كلمتك إلا لو اعتبرتها اعلان  .. و تلاقيهم غلوا عليك سعر الإعلان ،طبعا عرافين ان الحزنة فيها 70 مليار .. لأ بصراحة  مافيش ذوق .. عرفاهم ماديين ، و لا بيراعوا ظروف بلد و لا ظروف محاكمة و فلوس متهربة .. عرفاهم ح تقولى عليهم .. بس انت إللى غلطان كان ممكن تفهمهم ان ده مش اعلان عن عيلتك و أهلك ، و تقنعهم ان ده تحليل لمبارة العسكر و الثوار إللى حصلت فى التحرير يوم جمعة التطهير  . . و إللى كان من اهم نتائجها انك خرجت من تحت اللحاف و قررت تعلن للجميع انك زهقت و عايز تتحاكم .. حرام عليكم  يا ناس ؛ الراجل زهق من التباطئ فى محاسبته و عايز يخلص زينا .

انا مش عايزة الزقطتة تخدنى و يفوت عليا طريقة وصلوا تسجيلك للعربية الكارو اللى سيقاها السعودية .. هو ده مش خرق برضه للاقامة الجبرية ؟؟ و دى من اهم شروطها منع الاتصالات .. معلش يا جماعة اعذرونى فى سؤالى الساذج أنا برضه عمرى ما كنت رئيس نادى و لا حرامى دولى ولا قاتل للمتظاهرين عشان أعرف  القواعد الرئيسية  للاقامة الجبرية ، انا إللى اعرفه عن الست  الجبرية انها بديل للحبس الاحتياطى فى السجن ، يعنى المفروض ماحدش يقابل حد الا بإذن النيابة العامة .. يبقى إزاى اسمه إيه قدر يتكلم للعربية .. مش بأقولكم هو قاصد يحرج حد .

نمشيها انه قاصد يحرج تلفزيون البيادة ..و عشان كدة ح يخرج علينا مسؤل تلفزيونى مرموق و يقولنا ان التسجيل الصوتى اتحط على  النت ؟ و العربية عملتله دون لوود الأول عشان بيصحوا بدرى و بيصلوا الفجر حاضر .. حاضر ، نمشيها ان التسجيل كان على النت .. هى  النت دى مش وسيلة اتصالات و كانت محطولة على قائمة اول حاجة لازم تتقطع عن الثوار فى أول أيام  الثورة مع  الماية و النور و الموبيل و النت .  

فى النهاية نحمد ربنا إللى مسخر دماغ حزب الفساد على نفسه .. و بكدة تم رفع الحرج عن أى مجلس   كان بيحاول لآخر وقت يراعى العيش و الملح ، لكن الصوت إللى طلع م العربية مش ح يسبله أى مبرر لأى حل وسط  ، ولازم  يثبت ان الإقامة الجبرية لسة ليها المفهوم المتعارف عليه ، و تبدأ رحلة المحاكمة و ريح قلب الشعب.

 فعلا للثورة رب يحميها .. شكرا يا " حستى " فانت متعاون متعاون لأبعد الحدود