" لاع للمتحولون" و ماسك عمو صلاح

شئ لا يصدكه عكل ــ على رأى شويكار ــ حسنى مبارك بعد ما قولناله " امشى ارحل " .. رجعلنا بعد شوية و رشح نفسه مرة تانية كرئيس جديد للجمهورية .. قال و معاه بيان بطلبات الثورة عملها برنامجه . . قال و كمان ايه ، عمله صفحة ع الفيس بوك مسميها " حركة أصلاح مصر "

ده الواحد يقوله إيه ده ؟!!

أكيد فى الحالة كلنا نغنى نشيد : " جوة البيت برة البيت خد الشبشب معاك .. لما تلاقى فى بجاحة ؛ وقاحة ، طرقع و أنا وياك  .. شبشب خل و ملح و فلفل و شبشب بطعم فراخ .. بالشبشب طرق  لأى ما كان ، طرقع فى كل مناخ ... و للمحللين إللى بيظهروا على الفضائيات و بيسألوا عن موضع الطرقعة ؛نحب نوضح ان مكان الطرقعة يتوقف على طبيعة الشخص إللى بيتطرقعله

بقى الإعلاميين الثوريين و الإعلاميين الشرفاء طالع روحهم ما بين مظاهرات و اعتصامات و اضراب عن الطعام تسبب فى نقل تلاتة للمستشفى .. و دعوا لمظاهرات عامة ضمت كافة قطاعات ماسبيرو و معاهم السينمائيين و الصحفيين و مجموعة من 6 ابريل و لإئتلاف الثورة .. و كمان قدروا يتصدوا للثورة المضادة إللى بدأت  برسائل سب و قذف على موبيلات الاعلامين الثوريين ، و تشويه للسمعة ، و تأجير  من يندس بينهم لتهبيط همامهم ، و الظهور عبر الفضائيات بصورة ضعيفة توحى بأن هؤلاء الإعلاميين لهم مطالب فئوية ... و خلافه  لزوم الثورة المضادة

 و رغم كل ده لكن برضه الإعلاميين الشرفاء مستمرين فى التصعيد لحد تطهير الإعلام .. و  هى تطهير الإعلام دى حاجة عيب .. الكل بيماطل فى تنفيذه .. و لا يمكن  حاجة غامضة ، طب اسألوا أى مواطن فى كى جى وان و هو ح يقولكم ان تطهير الإعلام يلزمه إزاحة كل القيادات ماسبيرو و رؤساء القنوات و رؤساء الشبكات الإذاعية و نوابهم .. واضح ، مش كدة ؟؟ ولا الحكاية دى فيها أى لماضة .

و الإعلامين  الثوريين ما بيقولوش ان القيادات الفاسدة دى ماعندهاش أى فكرة عن المهنة و شرف المهنة لأن الكل عارف ان دى الحقيقة ، و لا قالوا ان القيادات دى وصول لمناصبهم عن طريق الرشوة و المحسوبية  لأن الكل عارف ان دى الحقيقة ؛ و لا برضه قالوا انهم فقدوا شرعية وجودهم فى مناصبهم بسبب ان اللى قعدوهم على كراسيهم  موجودين دلوقتى فى السجون ، و لا قالوا كمان ان التقارير الأمنية هى اللى جابتهم  و خاصة اللى كانوا بيكتبوها فى زمايلهم لأنهم كانوا جنود لأمن الدولة ، يعنى مش تقارير الكفاءة 
و رغم ان ملف هذه القيادات مليان بالسواد لكن برضه الثوار ما جبوش سيرة لأى فضيحة من دى  .. ولا جابوا سيرة الفساد الإدارى و المالى المتورط فيها  معظم هذه القيادات ، مع ان الموضوع ده حدث ولا حرج فيه بحسب كم ما يرد للنائب من قضايا و ملفات .

 

كل إللى الاعلاميين الثوريين قالوه انه يجب اقالة قيادات ماسبيرو بسبب الفساد الإعلامى إللى مارسوه من أول يوم للثورة ، و لسة بيمارسوه لحد النهاردة .. و سموا الحالة دى بالفساد الإعلامى و الجرائم السياسية بسبب التضليل الذى مارسه رؤساء القطاعات المسؤلين عن وضع السياسة الإعلامية بالإشتراك مع نوابهم و رؤساء القنوات و رؤساء الشبكات الإذاعية و نوابهم   .. و ده مش محتاج لت و عجن منى ، كفاية نظرة واحدة للجهاز إللى انت دافع تمنه من دم قلبك و حاطة فى أحلى مكان فى بيتك و هو المدعو " المذياع ـ مرئ أو مسموع ــ ما تفرقش  .. عيزاك تقف قصاد التلفزيون و تبدأ تبصله شذرا و تفتحه و تجرى  تقعد بعيد و تسمع الكلام إللى ح يطلع من الجهاز ده  أو من أخوه الصغير حلاوة : المشهور باسم الراديو .. فجأة ح تلاقى نفسك نازل الشارع و انت بتهتف و بتقول :

 "لا خيول ولا جمال..ياما بوستو أيد جمال "

و يا حلوتك و انت بتنط فى ميكروباص رايح التحرير و مع ذلك لسة بتزعق لتلفزيون بيتكو و بتقوله : " صدعتونا بالرياده.. وانتو كدابين بزياده "

" فى التحرير الدم يسيل ... و انت بتصور لى النيل " 

و فجأة و انت فى طريقك للميدان ح تلاقى صوت هاجم عليك بيقولك " سامع ام شهيد بتنادى .. المناوى قتلى ولادى "

هنا ح تقرر ان مظاهرة النهاردة مش ح تكون فى التحرير ، لأ ، المظاهرة ح تكون عند التلفزيون ، ماسبيرووووووووووو

و تبدأ تندمج فى المظاهرة و تهتف " الجدع جدع ، و الجبان جبان .. و احنا يا جدع ، ح نطهر الإعلام "

" الشعب يريد تظهير الإعلام "

" الحرامية فوق و الأحرار تحت "

و فجأة و بقدرة قادر تلاقى الحرامية نازلين المظاهرة و بدؤا يهتفوا معاكم .. تبصولهم باستغراب و دوا عاملين نفسهم و لا هما هنا ، تناحة تناحة صحيح

و تعمل إيه  لما تعرف ان القتلة عاملين حركة مسمينها " حركة عمو صلاح و طنط اصلاح لصالح ماسبيرو  "

هنا بقى الهتافات لازم تبقى " يا أم الشهيد صوتى مرتين ، مش عارف اودى وشى منك فين "

 البجاحة  زادت ووصلت لحد ان من أفسد هو إللى بينادى بالإصلاح .. يا لهوووووووى ، حد يحجزلى فى عبارة السلام عشان ناوية انتحر فطيس .. و قبل موال  الولولة ما يآخد حدها معايا حاولوا تقوية حاسة الشم عندكم عشان  نعرف ريحة العطانة و البجاحة دى جاية منين .. طيب هو إيه اللى جد عشان القيادات اللى المطلوب إقالتهم بيلبسوا ماسك و بيحطوا وش عمو صلاح و طنط اصلاح فاكرين انهم بكدة ح يخبوا حقيقتهم .. طيب و الريحة ح يروحوا منها فين .. دى ريحتهم طالعة ولا فسيخ بايت من شم النسيم إللى فات ، و كل خطوة فى خطواتهم بيظهر فيها الفساد الفساد الفساد على طول الخط

لكن ده ما يمنعش اننا نفتش عن سبب بجاحة هؤلاء المتحولين و إيه إللى خلى عودهم  يشد و يحاولوا يقودوا المظاهرة إللى اتعملت ضدهم .

و احنا بندور و نفتش ما نلاقيش غير ان الجمل نخ و ما قدرش يشيل ملف الإعلام و تحديدا  ماسبيرو ، و هنا اضطرت الحكومة تبعت لجنة تقوم الجمل من وقعته .. و العيال شافوا اللجنة جاية قاموا و لبسوا أسود .. و قفلوا العزا .. و قالوا عزا ولادنا ما يبقاش بإيد دول .. و الحكومة تحاول تنصاحهم و تفهمهم يا ولاد دول لجنة الحكما إللى ح يدوا ماسبيرو ابر تقوية عشان تقوم ماسبيرو من كبوته.. و الإعلاميين الثوريين مصرين ان كل حكيم من دول معاه ابرة هوا جايبها عشان يموت ماسبيرو و يخلص على المعتصمين و أى حد يعرفوا انه شريف .. طبعا خايفين أحسن ملافات كل حكيم من دول تتفتح و يحصل الشيخ و يتآنس بأنس
و رفض الإعلاميين الشرفاء اللجنة عدا الست الطيبة بنت الراجل الطيب عمو فؤاد دى الوحيدة إللى حملوها بمطالبهم .

و قالوا لا يعنى نو : للجنة إللى نص اعضاءها سرقوا المبنى ، و ضيعوه إداريا و ماليا .. و أخلاقيا .. يا لهووووى كمان أخلاقيا ، إللى مش مصدق يسأل أمن ماسبيرو ، خليهم يطلعوا الملفات و يودوها لحكومة شرف  

الثوريين قالوا لاع يعنى نو : للجنة إللى قتلت مواهب الإعلاميين أيام ما كان كل حكيم منهم له كرسى جوة  ماسبيرو

لاع يعنى نو : للتلفزيون و الإذاعة إللى ما ذعتش بيان للثورة العظيمة مع انهم طول النهار بيذيع فى بيانات بتخوفنا ــ  الشعب ــ و ترعبنا  بفلوسنا 

لاع ييعنى نو : للبلطجة الفكرية

لاع يعنى نو : لحركة صلاح و اصلاح إللى بيتزعمها الفاسدون .. وكافية اوى  السيرة الذاتية بتاعتهم خير دليل على فسادهم   

مش بأقولكم الماسكات مش كفاية ، لأن الريحة خير دليل و ريحة الفاسدين ضيعت كل إللى ممكن يعمله أى ماسك ، لأن دول ولا ينفع معاهم ألف ماسك و لا ينفع معاهم مليون حمام تلات

إذا هى الحرب .. الحرب على الماسكات و شعارها لاع للماسكات إللى بيلبسه المتحولين و المتحولات حتى لو سموا نفسهم عمو صلاح و طنط إصلاح