بشرى يا مصريين البرلمان بادى بداية قوية .. و قريب اوى ح يتحل و الثورة ح تتسلم السلطة

إللى رقبته فى المشنقة الحمرا ده ميت مش نايم نسأل الله ان يتغمده برحمته
 و دى طبعا بداية خير و بتأكد ان النواب ح تنفذ القسم إللى حلفت عليه

: " اقسم بالله العظيم ان ارعي مصالح الشعب والوطن بس فى اوقات فراغى و بعد ساعات النوم الرسمية "

و المشكلة الحقيقية إللى بتواجهنى انا شخصيا ... هو فين الدستور إللى بيتحلف عليه ..  الأعضاء بتقسم على إيه ؟؟؟ انتوا ح تجننونى ولا ح تجننوا الشعب كله عشان تضمنوا انه عباسية - مش تحرير -... بتحلفوا على حاجة مش موجودة ... ح تحترموا كائن لسة ما اتولدش .. أكيد المشكلة عندى أنا مش عند المجلس ، أكيد الدستور اتعمل فى السر ، أو اتعمل لما كنت فى الكهف قبل ما الروح ترد فيا و ارجع للحياة من جديد

العضو الموقر بيأكد انه مش عارف ان كانت الدولة جمهورية و لا برلمانية ... ما يعرفش ان مصر جمهورية ... و دى حاجة برجلتنى احتمال مصر تبقى ملكية ؟؟؟؟... مبروك ، ألف مبروك علينا البرلمان .. فعلا بشرى ان الدستور ح يحطه علماء الوطن الأفاضل 

و لسة إللى جاى أحلى .. و ان شاء الله ح نقضى مع المجلس أحلى الأوقات لحد ما حد يرفع قضية تحكم ببطلان هذا المجلس إللى اعتمد على القوائم ، و الناس نزلت انتخبت إللى على رأس القايمة و بعدين اكتشفوا ان الاحزاب حطت ناس تانية ... زى ما حصل فى برلمان 90 ... ده غير الطعون و حكاية التسعة ميلون صوت إللى صوتت ببطاقات رقم قوم فيها مشكلة قانونية

اتمنى للمصريين أحلى اوقات مع الفقرات الكوميدية إللى ح تدخل السرور على النفس ، و تخليهم يقهقهوا من الفرحة و يستبشروا خير خير خير بأن الثورة مستمرة  .. و كل مجلس و انتوا طيبين و البقاء لله ، و كل من عليها فان 

و ده ليه ؟؟ لأن رغم كل فنون الابداع التى ظهرت فى ميدان التحرير ايام الثورة لكن انا ما شفتش عرض للأراجوز ، و ده سبب التفاف الناس حول الثورة ، و ده نفس سبب ابتعاد ناس اكتر عن اصحاب الكراسى... و  الأراجوز إللى قدم عرضه النهاردة ح يكون سبب فى انتصار الثورة

و أكيد الثوار بدؤا يخدوا العزاء بعد عرض الأراجوز   .. و بعد سرادق العزاء إللى حصل النهاردة 23 يناير ..  الثورة ح تستكمل اركانها ،  و تشكل حكومتها و تعلن رئيسها وفقا للماده 37 من الإعلان الدستورى إللى بتأكد انه " ليس من سلطة مجلس الشعب الحالى التشريع "

و الثورة ح تكمل مطالبها فى نقل السلطة للقيادة إللى هى - الثورة-  ح تختارها ... خاصة  بعد ما اكتشفت انه القوة المنتخبة و الممثلة للبرلمان  أقوى مما يتحمل الشعب ... و بما ان المجلس زى ما هو واضح ح يفرحنا و يزقططتنا و يضحكنا ... لكن الثورة عايزة مطالب تانية خاااااااااالص مالص لذلك الثورة مكملة مشوارها و هى إللى ح تتسلم السلطة