اعزلوا اسامة هيكل و حاكموه بتهمة القتل العمد و نشر اكاذيب يعاقب عليها قانون الطوارئ

احذركم من اسامة هيكل إللى بدا فى نشر اخبار غلط على لسان مذيعين ماسبيرو ، و ادعى ان فى تلاتة قتلى فى صفوف الجيش ... اسامة هيكل بتصريحاته يهدد أمن و سلامة الوطن ... ده مش دفاع عن المذيعين المتواطئين مع تصريحات هيكل ، لكن كمان مش ح نسمح ان هيكل يآخدهم ساتر و درع واقى ... زيه زى  البلطجية إللى الأمن بيستخبى وراهم ... و الاتنين لا يهدفون غير ضياع مصر


يا ايها المجلس العسكرى : اسامة هيكل مش بس حرض المصريين على قتل بعض لكن كمان بث الرعب بين صفوف جنودكم .. و الكارثة الأكبر انه بيكشف جبهتكم الداخلية .. ففى المرة القادمة إذا استغاث الاعلام لصالحكم لن تجدوا أحد ، لأن الكل كشف كدب هذا الإعلام و عرف هدفه فى تمزيق مصر و حرقها و قتل المصريين لبعضهم .. فطبيعى ماحدش  يستجيب لهذا الإعلام الفاسد .


اعلام اسامة هيكل تعمد الكدب على المصريين ، لكن المرة الجاية الكذبة مش ح تنفع .


و المشكلة الأكبر لو  دخل عدو بجد يقصد مصر بجد ، مين إللى ح يخبر الشعب بواجباته فى الوقت ده و قد فقد الثقة فى الإعلام الحكومى و كشفوا اسامة هيكل على حقيقته ، و عرفوا انه يقصد ان المصريين تموت بعض .


و المصريين مش ح يموتوا بعض خصوصا بعد إللى حصل يوم 10 أكتوبر و نتج عنه 25 قتيل مصرى 
.. اسامة هيكل مش بس قدر يرعب المصريين فى الشارع المصرى ، لأ ، ده وصل نفس الرعب للعساكر المنتشرين داخل ماسبيرو .. هو ده الوزير العالم لشئون الإعلام و الخبير بالأمن القومى ، ده و لا يعرف فى الأمن الغذائى و لا الأمن الصحى ... و الدليل الخبر اللى نشره على قنواته و قال فيه " نقل تلت حلات وفاة من جنود القوات المسلحة و عشرين مصاب الى المستشفى"
و نفاجئ ان كل القتلة مدنين ... لصالح من هذا التضليل ؟؟!!! ليه عايز تقنع الناس ان فى خطر على القوات المسلحة ؟ مع ان ده ما كانش حاصل
و يجى اسامة هيكل يصحح الموقف فيقولك ، التلت حالات وفاة تم شفائها ... فى حاجة فى الدنيا اسمها نقل 3 حالات وفاة إلى المستشفى ثم تم علاجها ... هى الوفاة بتتعالج ؟؟ ماكانش حد غلب

تصريحات احدى مذيعات التلفزيون المصرى على التويتر

اسامة هيكل لازم يتحاكم بتهمة القتل العمد و ماحدش يقولى ده حرض على القتل و بس .. اسامة هيكل عايز يحرق البلد بنشر اشاعات ... اسامة هيكل لازم يحاكم تبعا لقانون الطوارئ الذى يطبق على كل من ينشر اكاذيب مغلوطة .. اسامة هيكل تعمد زرع الفتنة بين الشعب و الجيش .


 حاكموا اسامة هيكل اللى بيسعى ان كل القنوات الفضائية تبقى نسخة من ماسبيرو و تعمل على تضليل الشعب ... هو مش عايز حد يقول الحقيقة عشان كدة عامل لجنة للتقيم الإعلامى للقنوات الفضائية ... هيكل عايزنا نعرف أخبارنا من الإذاعات الاجنبية ، تانى يا هيكل بتعيد اعلام 67 ... هو ده الأمن القومى إللى انت درسته

هيكل يشكل لجنة للتقيم الإعلامى الرسمى و الفضائى - اضغط لو عايز تشوف الخبر و تصوت -

                                       


طيب إبدأ بتقيم اعلامى للمضلل الرئيسى فى قتل المصريين الـُعزل .. ابدأ بتقيم سياستك الإعلامية القائمة على الغدر بالمصريين و هدفها ضياع مصر ... ايوة ضياع مصر ، انت عارف يعنى إيه لما تروج ان فى حد بيشتبك مع الجيش و الناس تنزل للدفاع عن الجيش و بعدين يكتشفوا ان ماحدش تهجم على عسكرى واحد ، ودى بشهادة كل المحايدين إللى كانوا واقفين قدام ماسبيرو و كمان إللى كانوا خارجين من ماسبيرو .
ولا التقيم الإعلامى للقنوات الفضائية مقصود به معاقبة القنوات إللى ما قلتش ان فى تلاتة جنود قتلة ... و بعد ما الناس تموت بعض ، نقول هههههههههههههه عليكو واحد ، القتلى من الجنود طلعوا عايشين


هيكل يصطنع فجوة انسانية بين الجيش و المصريين .. و هنا أنا باتكلم عن الجيش مش عن المجلس العسكرى .. هيكل يعزل الجبهة الداخلية عن حماية الجيش .

و افتكر يا هيكل حكاية راعى الغنم إللى كان بيصرخ و يقول الديب أكل المعيز بتاعتى إلحقونى ، و لما الناس راحتله اكتشفت انه كداب ، فلما استغاث بجد والديب جاله بجد ماحدش صدقه ... انت بتلعب لعبة خطيرة يا هيكل ، ما تروجه قادر يخلى الناس تتخلى عن حاجات كتير لأنها ح تفتكرها مدرجة تحت بند الكدب ، و بكدة ح تضيع بلدنا

هى الوفاة بتتعالج يا اسامة عبد الدايم ؟؟... هى الوفاة بتتعالج يا محفوظ هيكل ... هى الوفاة بتتعالج يا محفوظ عبد الدايم يا بتاع القاهرة 30 .. هى الوفاة بتتعالج يا اسامة هيكل يا بتاع 2011



و فى النهاية لازم أقول ان ماسبيرو  يهدد سلامة الوطن .. و عشان كدة تطهير الاعلام الحكومى أصبح مطلب استراتيجى