قالتله يا سعد يا عباس انا ما بادفعش رشوة قالها يبقى ما تشتغليش مع صوت القاهرة
فضيحة جديدة تضاف لشركة صوت القاهرة و العصابة الحاكمة .. بس حد قالى لأ الفضيحة لعبس و أخوه .. خبير تالت عالم بشئون الفساد فى ماسبيرو قالى لأ ، الفضيحة الحقيقية لسهير حجازى ... خبير رابع قال الفضيحة لماسبيرو كله لأنه أصلا " متعودة دايما - على رأى سرحان عبد النصير فى مسرحية شاهد ما شفش حاجة "
ووقفنا مبهوتين ، مين سهير حجازى ؟!!!! يطلع مين هذا الكائن ؟!!! .. قالك دى اللهو الخفى فى صوت القاهرة ... اللهو اللى بتمشى النصوص الفسدانة و تجيب موافقات على الدراما العيانة ، و تنفخ عجل كاوتش أى نص ما ينفعش يركبله عجل ، و تعرف امتى تقول للى بيقرا وافق على النص لنحط السيخ المحمى فى صرصور ودنك .. و يبقى كل الموافقون على النصوص شاهد ما شفش حاجة ... ده بالنسبة للنصوص العيانة ، لكن ده ما يمنعش ان فى نصوص بتبقى جيدة و بيجى عليها الموافقات من غير ضغط الست سهير اللى بتستغل فيها ظروف النقاد و تضغط عليهم بالشيك اللى ح يتصرف حالا لو وافق دلوقتى على الورق ده و النص ده .... لكن يا ترى النصوص الكويسة و اللى مش محتاجة اى ضغط من سهير بيتعمل فيها ايه ؟؟ ده اللى ح نفهمه من حدوتة المؤلفة اللى ما بتدفعش رشوة .
بس يا ترى قصة المؤلفة إللى ما بتدفعش رشوة دى ح تتضاف للراجل إللى كان رئيس أمن التلفزيون و سرق شرايط التلفزيون و لما اتكشف ما قدروش يفصلوه و قرروا يركنوه و فى صوت القاهرة رموه .. و كان نايب لرئيس الشركة و بعدين لما جه التطهير ، قال إيه قام المزعوم اترقى بقدرة قادر .. اترقيت يا دعبس و بقيت رئيس الشركة ... هلب و سلحب على كيفك
و لايا ترى الحكاية دى ح تنضم لباقى قصص انحرافات محمد زكى رئيس قطاع الإنتاج السابق المسؤل الأول عن كل الإنتاج المفحفح بريحة خراب العقول ... و دراعه اليمين سهير احجزلى او سهير حجزله أو سهير حجازلى أو سهير حجازى .. الغريب ان محمد زكى خرج من صوت القاهرة بعد مظاهرة العمال ضده فملقاش غير انه يهرب من الشركة و ما يرجعلهاش تانى أبدا ، لكن سوسو أثبتت انها اشجع و قررت استكمال المسيرة .
الحكاية تبدأ ان فى مؤلفة ودت إللى ألفته لصوت القاهرة بتاريخ 23 يناير2011 ... و كانت كل شهر تتصل عشان تسأل على الإجراءات و ان كان النص الخاص بيها راح للقراءة او الرقابة خاطرها .. و فضلت سهير احجزلى تتهرب كل ما المؤلفة تسأله يا ترى مسلسلى وصل لفين ، و سهير ترد : " لسة ، بعدين ، كمان شوية ، كمان شهرين "... و الزحلقة شغالة على ودنه .
و فجأة عرفت المؤلفة ان النص بتاعها متوافق عليه و تقرير الموافقة خرج من الرقابة لصوت القاهرة بتاريخ 9 يونيو 2011 .. و سهير مصرة ان الدنيا واقفة ... و المؤلفة كانت ح تتجنن ، و مش فاهمة سهير خبت عليها ليه ؟ !!!!! هى طبعا عارفة ليه ؟؟ بيحاولوا يبتزوها ، يقولوها فتحى مخك و شخشخى جيبك ، و يصروا يأخروا نصها غى القراية و لما يجى ماحدش يقولها ، و لما تعرف التقارير تتخبى عنها... و عشان كدة حاولت تتصل بعباس ابن فرناس اللى كان المفروض يطير لكن اترقى ... لكن عباس عرف ان المؤلفة شريفة و ما بتدفعش ، فصدر لها الطارشة و بلغ السكرتير يزحلقها
و لأن المؤلفة مؤمنة بالثورة و مصدقة ان الفساد مالوش مكان بعد النهاردة ، فبعتت رسالة لعباس و قالتله " مش ح ادفع رشوة لإدارة النصوص " و طلبت فى الرسالة معادعشان تشرح للرئيس المسئول ازاى هما بيبتزوها ... المسكينة ما تعرفش ان عباس ابن فراس تبع عصابة على بابا ، لأن العصابة باسم على بابا مش باسم دعبس المنحرف ولا عباس ابن فرناس .
و كان رد عباس صدمة على المؤلفة و سألها بكل فجاجة : " دفعتلهم رشوة ؟"
قالتله انا ما بأدفعش رشوة و عشان كدة شغلى بيقف
_ قالها خلاص يبقى مالكيش شغل فى صوت القاهرة
طيب يا سادة يا إللى مالكمش أى سيادة ، مش لما تجيبوا ناس بالشكل ده و تعينوهم فى مناصب قيادية تكملوا الشكل النهائى للعصابجية .. و تحطوا تسعيرة الرشوة ، أو حتى تضيفوها على الاجر و تبقوا تحصلوها من المنبع ، بما أن القيادات بقت بالشكل ده بتطلب الرشوة ببجاحة ... و بيقرروا ان فلانة او فلان مش ح يشتغل تانى فى الشركة بكل صفاقة .
بصفة إيه عباس ابن فرناس يقرر ان فلان ح يبقاله شغل فى شركة قطاع عام من عدمه ، حد قاله ان الشركة من ميراث السيد الوالد .. الشركة دى من أموال الشعب .. و لا هو عنده أوامر لتخريب ممتلكات الشعب ؟؟ و يا ترى مين إللى أدى الأمر ؟؟
سؤال نرسله لأى حد معتبر نفسه مسؤل عن الإعلام فى بلاد الأدغال ، إللى بقت بتآكل العيال
المشاركات
هناك تعليق واحد:
أعرف صديق لى صاحب مسلسل قضية رأى عام اسمه أحمد مصطفى مؤمن وشهرته أحمد الخيال أخذ منه المسلسلى بعد تقديمه تم سرقته ودخل فى قضية مع العدل ومش فاكر التفاصيل بالظبط بس المحكمة كانت طلبت منه ايداع مبلغ نصف مليون وطبعا مش معاه حاجة زى كده ولم يأخذ حقه حتى الآن
إرسال تعليق