 |
| رجب طيب اردوغان - اهلا بيك فى مصر فأنت رجل مشرف |
للى عايز يعرف يعنى ايه راجل دولة صاحب رؤية يبص على سياسة اردوغان اللى شايل بلاده فوق كتافة و رافض يحطها فى الارض زى عبد الفتاح القصرى اللى بيحكم و يا ريته عارف يحكم ....خايب و مالوش كلمة و كل مرة كلمته تنزل الأرض و يقولك بكل فخر معلش ح تنزل المرة دى
سلام لنورمندى توو اللى بيبنى الجدار العازل عشان يحمى سفارة الصهاينة ، و لا يمكن يكون عنده رؤية مش باينة دلوقتى و ح تظهر اول ما الجدار يخلص .. مش يمكن قصده اللى ما تقدرش ترميه فى البير ارمى عليه البير ؟؟؟ و الفكيك بتاع الجدار مش قادر يرمى اسرائيل فى البير فقرر يبنى البير حوليها
و لحد ما تظهر عظمة الرؤية اللوزعية دى خلونا ندخل دنيا الفرسان مع اردوغان العظيم ، العظيم بجد ، عظمته حقيقية مش صينى و مالهاش ضمان زى بتاعة " القصرى " اللى بيحكم
اردوغان راجل عظيم بجد و التاريخ ح يكتب اسمه بالدهب لأنه راجل و الرجال قليل ، و لأنه شرف بلده و صان ماء وجه المنطقة كلها و المسلمين خاصة بدل ما احنا مفضوحين فى كل حتة باسم العلاقات الدبوماسية و معاهدة " معسكر ديفيد "
اردوغان راجل عظيم بجد و التاريخ ح يكتب اسمه بالدهب لأنه راجل و الرجال قليل ، و لأنه شرف بلده و صان ماء وجه المنطقة كلها و المسلمين خاصة بدل ما احنا مفضوحين فى كل حتة باسم العلاقات الدبوماسية و معاهدة " معسكر ديفيد "
رسالة منى لكل واحد قاعد على كرسى أكبر منه ، أو قاعد على كرسى ما يستحقهوش ، أو فجأة لقى نفسه فوق كرسى و ما يعرفش مين إللى حدفه عليه و كل شوية يسمع كلام مش فاهم معناه و هو :
- مسؤل صاحب رؤية
- وزير صاحب رؤية ساسية
- قيادة لها استراتيجية
- الوطن
يا ريت المسؤل ده اللى سعده زمانه و خلاه عايش ايام اردوغان يذاكر مواقف اردوغان عشان يعرف يعنى ايه كرامة الوطن و كرامة المواطن .. يا ريت القائد إللى مسمى نفسه قائد و لا مسمينه قائد الفرقة النحاسية يقعد يذاكر رؤية أردوغان عشان يعرف ان المجتمع الدولى ما بيعترفش بالدول الضعيفة إللى ماشية جمب الحيط ، لأنهم بعد شوية ح يحطوه جوة الحيط و هو حى
كفايانا خنوع يا تربية المخلوع
و يعنى إيه كوك زيرو : يعنى جنودنا تنضرب بالنار فى سينا .... و اردوغان يطرد السفير الصهيونى ابن اللذين
و لولا انى مصرية حتى النخاع و ما يعجبنيش غير ان المصرى هو إللى يحكمنا عشان كدة خلعنا المخلوع لما إتأكدنا انه صهيونى ... خلعناه لما اكتشفنا لأنه مش مصرى حتى و لو معاه بطاقة متزور فيها انه مصرى ..... لولا كدة كنت قلت معلش يا تركيا ممكن نستلف اردوغان منكم 4 سنين بس
يا ريت السادة البلاليص يتعلموا الكرامة ؛ و لو مكسلين يبصوا على تركيا ، يقدروا يبصوا على الشعب المصرى صاحب الكرامة و يتعلموا منه .. شوفوا شعبنا الكريم بيحتفل إزاى بأردوغان بعد ما طرد السفير الصهيونى و بعد اسطول الحرية و معاه حراسة كمان
و بعد ان اعلنت الاذاعة التركية خبر اعتزام اردغان زيارة مصر يوم 12 سبتمبر ظهر الموقع ده
لكن اللى ما عندهمش كرامة و بيتمحكوا فى أى حاجة و بيتمسحوا فى أى أسباب باقولهم عيب عليكم ، بقيتوا اضحوكة و فضايحكم بقت مكشوفة و ريحتكم بقت لا تطاق
المشاركات
ليست هناك تعليقات:
إرسال تعليق