لاع ـ ” لقمع الحريات “

 

توفيت اليوم 23 مارس إلى رحمة الله تعالى السيدة ” إليزبيث تيلور ” و لم يذكر التقرير الطبى ان كان الموت بسبب إطلاعها على الأحوال المصرية و تحديدا خبر تجريم المظاهرات و الإعتصامات ؛ أم انه موت قضاء و قدر زى إللى نزل على راس طلبة كلية اعلام ، بعد ما الشرطة العسكرية بدأت تفض اعتصامات طلبة إعلام بالقوة مستخدمة العصا الكهربائية … و الغريب فى الأمر ان قرار الحكومة بهذا الخصوص كان مجرد مشروع قانون حتى عصر اليوم  ،  لكن ما نعرفش إزاى خد موافقة و بدأ ينزل للتنفيذ المغرب .. و حجة المسؤلين ان القانون خاص بعجلة الإنتاج و دعم الإستقرار فى البلاد ؛ طيب و هما طلبة اعلام جم جمب العجلة ولا حتى شافوها .. و ماحدش يقولى ان نص القرار مش كدة ، لأ بقى انا متأكدة و حاطة القانون قدام عينى عشان ما أنساش و لا أفترى على حد ، و إللى مش مصدقنى يراجع ورايا النص ده :

“  وافق مجلس الوزراء فى اجتماعه على اصدار مرسوم بقانون يتضمن تجريم بعض حالات الاعتصام والتجمهر والاحتجاج اذا ادت الى تعطل الاعمال سواء العامة او الخاصة والتأثير على المال العام او الخاص ”

و بعدين حكاية “بعض حالات الاعتصام و التجمهر” المذكورة فى المرسوم توحى بان فى خيار و فاقوس .. طيب و حد بلغ عن طلبة اعلام و قال عليهم فاقوس؟؟ .. و يا ترى القانون ده يتناقض مع الكلام  بتاع لو عملنا حاجة ما عجبتكوش روحوا التحرير ، هو ميدان التحرير ح يروح فين ؟ أكيد ح يروح فى حتة يقابل فيها  البيان الدستورى الأول للجيش إللى أعلن فيه حماية الثورة و تنفيذ طلباتها .. و الثورة بتطالب بسقوط النظام ، و المظاهرات بتطالب برحيل ذيول النظام و القادة الفاسدين فى كل المواقع .. يا ولاد الحلال إللى يلاقى ميدان التحرير يبلغ المتظاهرين ،يا ولاد الحلال إللى يوصل للتحرير يقول من هناك 

لاع يعنى نو NO    

لاع يعنى نو : لأى حد يحاول يشكك فى ذكاء الجيش ، فى الوقت إللى حس فيها ان الشعب بدأ يتفرق قرر يجمعه و طلع قانون تجريم الإعتصام و حول مظاهرة صغيرة جوة كلية اعلام و مكونة من 60 طلب لإعتصام ضخم  يضم 2000 شخص من مختلف  الكليات

لاع يعنى نو : للى يحاول يوقف عجلة الإنتاج و يزعزع الاستقرار ، هو فى احلى من الأستقرار فى حضن الفساد .. و بعدين لازم نرحم الحكومة يا جماعة ، الست مش قادرة على الحمار و عمالة تعض فى البردعة ؛ مش قادرة على الفساد فقالت للعمال و الموظفين و الطلبة ما تتظهروش ، و اللى مش عاجبه يسافر يتظاهر برة

لاع يعنى نو : لأى حد يطلب اننا نجبله كوفرتينا فى الصباحية ، نجبلك كوفرتينا منين و أى عامل مرتبه 400 جنية و لو اتظاهر عشان يبقوا 700 ح يدفع غرامة نص مليون جنية ، استنى لما ندبر فلوس الغرامة و بعدين نعمل جمعية لتوفير تمن الكوفرتينا

 انسى يا عمرو ، انسى اى مظاهرات او اعتصامات ؛ حتى لو كنت بتموت من الجوع او تعانى من السرقة بسبب الفساد ؛ فلا مجال لأى اعتصامات او أى مظاهرات و لكن من الممكن ان تشاهدها على قناة نايل كوميدى بشرط ان تكون المشاهدة بعيدا عن الثكنات العسكرية  و مراكز الشرطة أو  حتى المقارات الحكومية من اى نوع .. فالتاريخ سيسجل أن يوم الأربعاء 23مارس 2011 قررت حكومة الثورة و التى اتت بسبب الاعتصامات و المظاهرات قررت ان تجرم المظاهرات و الاعتصامات ، أو يمكن للتاريخ ان يسجل هذا اليوم على انه يوم عالمى لحماية الفساد و تجريم المظاهرات و المتظاهرين و الإحتجاجات الفئوية ويغرم المعتصمين ، و عقبال عند الدول إللى احنا مش طيقنها يصدر عندهم قانون مثيل ، قال إيه حبس سنة و غرامة نص أهيف و الله ولا فى اهيف.

طيب عشان الواحد ما يكونش سئ الظن و ما ينساش شرف إللى ادى كلمة شرف قبل ما يقول القسم قصاد المشير، و قال لو ما قدرتش أحقق طلبات الشعب ح أجى أقف معاكم فى التحرير ..مش يمكن الحكة قصدها ان الحد الأنى لأى مظاهرة يبقى نص مليون شخص ، و كل واحد يتبرع بجنية لزوم الحالة الإقتصادية المتردية فى البلد .. أه ، أكيد ده قصد عصام شرف ، ظلمنا الراجل حرام عليكو ..جزات الراجل انه عايز يصيطكم بين الدول و تبقى أقل مظاهرة طالعة فى وشه  عددها نص مليون ، و بعدين ما انتوا سبب الوحى  اللى نزل عليه ؛  مش كل ما تتزنقوا تقولوا يلة مليونية مليونية  .. و الراجل قالها صراحة :” انا استمد شرعينى من التحرير ” و اتكسف يقول شرعينى ووحيى

و بخصوص الناس إللى ح تنزل المظاهرات النص مليونية و مافيش فى جيبها غير جنية يتيم بسب انتشار الفساد ، ح نعمل صندوق لدعم المظاهرات ، و اول ما يبقى فيها ما يغطى سبع مظاهرات ؛ ح نعلنها ثورة .. و بكدة تبقى أتحلت .

و الناس إللى قاعدة زعلانة و شايفة ان إللى بيحصل دى خطوة نحو الديكتاتورية لأن التظاهر و الإضراب و الاحتجاج حق دستورى تكفله كل مواثيق حقوق الانسان العالمية ، باقولهم القانون ده فى صالحنا لأنه ح ينفذ طلبتنا بشكل حاسم و سريع ، فبدل ما التظاهرات ح تنادى سلمية سليمة ، ح تبقى انتحارية .. لأن قرار تجريم الإعتصامات ح يحول كل مظلوم بيطالب بحقه عن طريق التظاهر و الإعتصام ؛ ح يتحول لقنبلة موقوتة .. لأنه ح يكون مظلوم مرتين .

يا رئيس الوزراء نحن فى انتظارك فى ميدان التحرير  كما وعدت و لا تخشى قانون تجريم الاعتصامات ، فهو قانون معيب يقصد بقاء الفساد على ما هو عليه و على المتضرر الفرار من البلاد ، و البلد دى بلدنا مش بلد الفاسدين ..انضم للمتظاهرين يا دكتور شرف و متخافش ، المصريين هزموا قوانين مش  مجرد مرسوم  ، و أسأل  قانون الطوارئ إللى عمره أكتر من 30 سنة و كان بيمنع التجمهر و التظاهر إلا بتصريح و مع ذلك الثورة قامت ..و كل قانون و الشرفا طيبين .