خرج علينا " تمورة " امبارح و هو يقول مؤكدا ان المصريين محتاجين يسمعوا خبر يفرحهم .. و شهقت ، و بتهيقلى ان أمر هذه الشهقة قد تكرر فى الكثير من البيوت المصرية ؛ و أقسم للجميع انها شهقة لا علاقة لها بتطهى الملوخية قد مالها دعوة بالملوخية الإعلامية .
انت يا تمورة إللى ح تفرح المصريين ، انت ؟!! ايها الفسل .. و ده خبر إيه ده إللى حيرضى انك تقوله و هو عارف انه ح يفرح المصريين .. دى الناس العاديين فى الشارع ما يعرفوش حاجة عن تطهير الإعلام غير ابعادك عن الشاشة انت و الحلو التانى ابو ضحكة جنان ، المبتسم بمناسبة و بدون مناسبة .. و مصر يعمل نفسه أبو وش بشوش .
و إليكم الخبر اللى ح يفرح المصريين و يحسسهم ان الثورة انتصرت على الفساد فى كل مكان .. هاه ؟!! كله مستعد .. انت يا اللى هناك : حط إيدك على قلبك انت و هو لقلبك ينط من فرخته ، كله يقصقص ريش فرخته قبل ما تطير و تطير عقله .. أن أن آآن .. تمورة يعلن ان عامل البوفية الذى يتعامل مع برنامج "مصر أول أمبارح " باقى و ح يفضل يقدم الشاى لباقى فريق العمل المستمر غصبن عن عين الإعلاميين المتظاهرين جوة ماسبيرو و برة كمان . . يا خراشى هو الأتوبيس إللى خد فريق الخبرا الروس بتوع برنامج " من قلب مصر " ما فهوش مكان لنفر نفر نفر اسمه تمورة .افرحى يا مصر عامل البوفية ح يفضل فى منصبه ؛ يمارس مهامه و ح يقدم الشاى لتمورة قبل ما يطل علينا بطلعته البهية و يعلى الضغط عند ديه و ده و دية .. لأ و تمورة بيفسر فى وشى و ببيعلن الخبر على الملأ مؤكدا بكدة ان فرح 100 ألف أسرة على قيد الحياة بعد ما كانت تنوى الإنتحار فى حالة وقف برنامج التوك توك شو إللى بيقدم التلفزيون المصرى صاحب الشيزوفرنيا الحصرى .
مش عيب يا تمورة ، انت عارف كويس ان الثورة و الثوريين ما تقصدش عامل البوفية الطيب الأمير ، مش وقت دروع بشرية يا ابو التوم ، و عيب تتحامى فى عامل الشاى و هو برضه الغلبان ده قدك .. بلاش طريقتك اى .. انت عارف ان زمايلك عايزين يطهروا الإعلام من الإعلاميين الموجودين على كل الموائد ، اللى مالهمش موقف و شعارهم الوحيد أبجنى تجدنى .. الإعلاميين الثوار عايزين يطهروا ماسبيرو من الفساد الإعلامى ، الفساد المهنى إللى ضيع البلد و لسة بيضيعها و عشان كدة
لاع يعنى نو : للإع الإعلامى
لاع يعنى نو : لك انت ، لاع لطمورة ، ويحيا عامل البوفية .. على الأقل عامل البوفيه ما بيحرقش ده المشاهدين و يخليهم يلعنوا فى التلفزيون إللى بيدفعلك مرتبك بالملايين من ضرايبهم .. يا طمورة انت ح تكون سبب رئيسى ان الناس تبطل تدفع ضرايب ، و الشركات تبطل تعلن فى التلفزيون عشان ما تلاقيش تقبض و يمكن ده يخليك تحل عن الشاشة . .. انت ح تكون عامل اساسى فى نقص السيولة فى التلفزيون .. ارحم عامل البوفية و باقى فريق " مصر اول امبارح " إللى انت مستخبى فيهم و عامل نفسك حاميهم .. ارحمهم قبل ما وش الحقيقى يتكشف و الأشكيف يطلع عليهم و يفضح امرك الإعلاميين الشرفاء و يقولوا نعم لعامل البوفية و فريقه و ليرحل تمورة و خيرورة و اى حد بيآخد فلوس الكوادر و المواهب إللى مالهاش وسطة و ما بتدفعش رشوة و لا بتقبل باهانة كرامتهم عشان فرصة من آلاف الفرص اللى انت خدتها
لأ و إللى يغيظ ان تمورة مش بس طالع يقولها عينى عينك بكل عدم احساس بالمسؤلية ، بيقولك إيه المأسوف على شبابه : " انا عارف انكم ما تقدروش على فراقنا عشان كدة ح نفضل فى أربيزكم
لأ و كمان بيطلع لنا لسانه و هو بيقول " لا للوساطة " .. يا ناس ، حد يحدفه بمرايا يبص فيها .. أمال انت موجود فى مكانك باسم إيه : باسم جنكيز خان و لا باسم بسبس خان ، خان مهنته و خان تاريخه و خان بلده من يوم ما مرضى قعدك مكانك.. و ان شاء الله تتحقق مطالب الثورة و يبقى : " لاع يعنى نو " للوساطة و
لاع يعنى نو للتوريث الإعلامى
ولو عندك قدر من المهنية زى ما انت بتقول لنفسك ، اعرض نفسك على أى قناة فضائية بعيد عن الوسطة و الفساد المهنى عشان تعرف سعرك الحقيقى
و ليسقط تمورة و يحيا اعلام الشعب
المشاركات
ليست هناك تعليقات:
إرسال تعليق