مبروك للمصريين الثورة رجعت لأهلها .. و المدعين خرجوا منها

مليونية جمعة الغضب الثانية 27 مايو

نجاح جمعة الغضب الثانية ، مش بس نجاح للارادة الشعبية المصرية ، لكن كمان نهاية لفرقة الإخوان الكذابين المسرحية .. و أأقصد هنا كل الكدابين سواء كان لهم فصيل سياسى او كانوا معدومين

و تأكد للجميع ان الشارع المصرى لا يحركه غير ارادة المصريين ، و خرجت الناس لميدان التحرير فى القاهرة ... و نجحت جمعة الغضب التانية رغم الرعب إللى حاولت معظم  وسائل الاعلام بثه فى نفوس الثوار من البلطجية و من أعداء لثورة  إللى ح يتواجدوا فى الميدان .. وصل الخطاب لأعلى مستويات الرعب ، لدرجة انهم أكدوا ان الميدان ماحدش ح يحمى ، و كل واحد مسؤل عن نفسه .. لكن اكتشفنا ان للميدان رب يحميه

نجحت جمعة الغضب الثانية رغم حرارة الجو المرتفعة ، لكن اصرار المصريين على توصيل مطالبهم و اصرارهم على قهر هذا الجو بالماية و التلج و الكاسكتات و الشماسى ، و الخل إللى كانوا مستعدين يستعملوه لو جالهم ضربة شمس ، هزم كل التوقعات
.. و لأن ربنا عالم بصدق نية إللى خرجوا و بقوة ايمانهم منع عنهم الحرارة و خلى الدنيا تمطر و تندع.. و بقى الجو  فى التحرير لصالح الثوار فى التحرير بالعند فى الكدابين

نجحت جمعة الغضب الثانية رغم اتهام الثوار باتهامات باطلة ،  اتهامات حقيرة ، أولها ان الثوار خونة و لا يههمهم مصر و لهم مصالح شخصية و اخيرا اتهموهم بانهم كفرة و ملحددة .. و نجحت جمعة الغضب التى بدأت بصلاة الجمعة فى الميدان اللى شاف خطبة جلجلت مصر كلها

1st collector for و نجحت جمعة الغضب الثانية
Follow my videos on vodpod

و خرجت المظاهرات فى الإسماعيلية و الإسكندرية و الدقهلية و الغربية و سوهاج و السويس و طبعا مش ح ننسى مظارهات سينا و تحديدا ً شرم الشيخ ، إللى وصلت لمستشفى شرم الشيخ الدولى و هناك انضم بدو سيناء للشباب و هاتفوا بضرورة نقل " الغير مبارك" لمستشفى حكومى ، فملنا نصرف عليه من اموالنا اللى نهبها

يا ريت البنى آدمين إللى كانوا ضد جمعة الغضب التانية يكونوا فهموا حاجة ، و عرفوا ان الشعب المصرى مش طالب غير محاكمة الفاسدين و سرعة الحكم على رؤس النظام السابق .. مش فاهمة الحكاية دى مزعلاكم فى إيه ، خايفين رجلكم تيجى فى حاجة .. أكيد ..  ماهوو مافيش تفسير تانى ، ده انتوا مصرين تشوهوا سمعة الثوار  زى ما عمل النظام السابق

لكن فى النهاية لأنه ما يصحش إلا الصحيح ؛ خرجت المظاهرات فى معظم محافظات مصر ، و اهم محافظة كانت الإسكندرية و محافظة السويس حيث تجمع تلت تلاف متظاهر عند قسم  الشرطة و تجمع مجموعة أكبر عند قسم الأربعين و رغم ان ماكنش فى ولا عسكرى جوة المدينة و الكل خرج برو المحافظة ، مع انهم كانوا المفروض يحموا المنشئات ، الا ان شعب مصر الأصيل قرر يحمى ممتلكاته و منشئاته ، و بدأت اللجان الشعبية تحمى قسم الشرطة ، ده اللى حصل فى السويس الباسلة رغم كل المحاولات لإجهاض المظاهرة فى خطبة الجمعة فى مسجد حمزة و إللى سعته 7000 مصلى ..

نفسى أسأل كل إللى حرموا نزول ميدان التحرير بكل حجة و أى حجة ، هو لما تظلموا الأقلية : مصر ح تبقى إسلامية ، و لو كلنا عشنا فى آمان مصر ح تبقى بوظية ــ من البوظة ــ

و زى ما يكون إللى نزلوا التحرير بيطالبوا بحاجة ضدكم  ، مش فاهمة انتوا منزعجين ليه ؟ مزعلكم فى إيه اننا نحاكم الفاسدين ، مش ح تلاقوا حد تشتغلوا معاهم

..  ولا هو العبد لما بيآخد حريته ما يبعرفش يعمل بيها إيه !! و بسرعة يجرى يدورله  على سيد .. يا ناس يا مؤمنين ؛ إللى فى التحرير دول موجودين عشان يساعدوكم و يساعدوا مصر ، بيحبوكم و بيحبوا مصر .. مش زى ما بيقولكم الكذابين انهم ضدكم .. و بتهيقلى بجمعة الغضب التانية   فرقة الكذابين المسرحية ظهرت على حقيقتها  ..  يا كل المصريين حطوا إيدكم فى إيد أولادكم و بناتكم و اخواتكم إللى نزلت التحرير عشان يتحقق الإستقرار ليكم و للبلد و لأولادك كلهم

.. إللى نزلوا التحرير طالبين محاكمة روموز الفساد و التصدى للانفلات الأمنى ، حد قال مش عايزين ، و لا على الكلام ده احنا متفقيش

رسالة للسادة الكذابين ، إللى حطين بالبنط العريض على موقعهم الرسمى خبر فشل جمعة الغضب التانية ، أحب أقولكم فعلا هى فشلت  و إللى وصلوا التحرير كان نص مليون واحد يس ، و الساعة ستة المغرب المعاد الرسمى لفض المظاهرة كان فاضل 150 ألف واحد .. و الساعة 12 و نص بعد نص الليل العدد 15 ألف .. و طول اليوم الهتاف كان :

مافيش أحزاب ولا أخوان .. الميدان مليان مليان ..

من غير عسكر و لا اخوان  ..  الميدان مليان مليان

الثورة من غير معاد .. مش محتاجة مكتب ارشاد

الناس وصل عددها لنص مليون رغم الارهاب اللى حصل قبل جمعة الغضب سواء ارهاب إعلامى او أمنى أو حتى دينى .. يعنى الحصار كان من كل مكان ، و مع ذلك صوت الحق ملا الميدان ... و نص مليون مع كل الرعب إللى عملتوه كان ممكن يوصل لخمسة مليون .. و بعد فضح كذبكم ، ان شاء الله المرة الجاية ح يوصل  

و بيوم 27 مايو يبقى المصريين حطموا اسطورتين خلال خمسين سنة الأخيرة ، الأولى اسطورة جيش اسرائيل الذى لا يهزم سنة 73 ، و التانية اسطورة قوة الإخوان فى الشارع .. انتهى زمن الإساطير و الدليل ميدان التحرير

و بنجاح جمعة الغضب التانية تبقى الثورة رجعت للثوار .. و الثورة ح ستستمر و ستنجح رغم أنف المنتفعين ،  قطر الثورة انطلق و إللى فاكر نفسه هو إللى سايق و افتكر انه لما يتأخر ؛ القطر ح يستناه ، بنقوله " هاهاهأة سعيدة ، يا ابو فكرة بليدة  .. فكرة لقيمة .. بس خلاص ، احنا صاحيين  لكل لقيم ، و خليه يكتشف انه لوحده على الرصيف ...

الثورة دى فتات الكذابين المدعين يمكن يلحقوا إللى بعدها .. هاهاهاها .. و كل ثورة و و مصر و الثوار بخير و طيبين

و عاشت مصر حرة مستقلة

و الله الموفق