أى مصالحة هذه اللى بتتكلموا عنها .. و مصالحة مع من ؟؟ مصالحة مع من اختصر مصر العظيمة فى اسرة بدون ضمير قررت استعمار البلد و محو تاريخ امه بأكملها و قتل مستقبلها . و قبل وضع العفو ولا المصالحة فى حجمها الحقيقى و التسفيه منها ليا سؤال عند
إللى عايزين يتصالحوا مع الفاسدين : عندكم توكيل من شهداء الثورة وشهداء طابور العيش و شهداء العبارة و
شهداء قطار الصعيد و مرضي الكلي والسرطان
اللي شربوا مايه مجاري واكلو محاصيل مسرطنه لحد ما ماتوا .
و على فكرة إللى رافضين العفو معاهم توكيلات من الشهدا ،
و التوكيلات موثقة و معتمدة
و إللى مش مصدق يسأل اهل الشهدا .
و إللى شايف ان المصالح كريم خصوصا بعد ما شجرة الدر اتنازلت ولا لسة ح تتنازل عن ممتلكاتها للدولة .. أحب أقوله ده انت كدة مش كريم ده انت عبيط .. لأن شجرة الدر كانت مجرد جارية فى بيت الحاكم ، لا شغل لها و لا مشغلة غير غسل المواعين و الطبيخ و غسل الهدوم و عدم تربية الأولاد عشان كدة طلعوا حرامية و ما بيستطعموش غير المال الحرام .. زعلان أوى انى قلت على حضرتك عبيط ، مش ح أسحبها إلا لما تقولى شجرة الدر جابت ممتلكاتها دى منين .. لأ و البجاحة انها ح تنازل عنها .. بقى الحرامى لما يرجع اللى سرقه يبقى اسمه تنازل ، و لا السرقة تبقى ردت لصاحبها و يجب إيداع اللص طرة للرجال و القناطر للنساء . . و بعدين هو مش كان ط الغير مبارك " طلع على قناة العربية و قال ان ماعندوش ثروات و أملاك .. دلوقتى ح يتنازل عنها .. عرفت بقى يا حضرة ان المسامح مش كريم .. المصالح عبيط .
و اللى يغيظ و يتسبب فى رفع ضغط الدم ان "الغير مبارك " قرر يتكرم و يتعطف و يتنازل ــ لأ المرة دى مش عن المتتلكات ــ يتنازل و يعتذر عن الإساءة .. هو المتنحى فاكر نفسه وقف شتمنا فى الشارع و عايز يعتذر على تسرعه فى شتيمتنا بالأب و الأم مع ان الموقف ما كانش محتاج غير نظرة تحقير بس .. و لا المتنحى فاكرنفسه خد مكانى فى اتوبيس زحمة و لما عرف انى مرآت صاحب إللى بيت إللى ساكن فيه قالك إعتذر أحسن تطلب الأجرة فى معادها .. أنا مش قادرة اصدق ان هذا القدر من الغباء موجود فى الدنيا .. و لا هو إللى فاكرنا اغبية .. أنا ما شفتش استفزاز بهذا الحجم .
طيب ده احنا صابرين على محاسبة المتنحى أو المتخلى و مكتفيين بموضوع محاسبته ماليا فقط للظروف اللى بتمر بيها البلد من ناحية الإدارة ، لكنى اتوقع ان بعد الانتخابات الرئاسية و وصول رئيس منتخب بشكل حقيقى ستتم محاكمة المتنحى عن فساده السياسى و مخالفاته القانونية على كافة المستويات و جرائم قتله المتعمد لأبناء الشعب المصرى على مدار 30 سنة : و كفاية بس نوقف سكان العشوائيات فى المحكمة و جمبهم مرضى الفشل الكلوى سواء كان سبب فشلهم تلوث مياة الشرب او مياة الصرف الصحى المستخدمة فى الرى .. و على شمال سكان العشوائيات إللى بيعيشوا اموات ، تدخل المحكمة كل مصرية تم انتهاك عرضها فى أقسام الشرطة .
و قبل صدور الحكم فى هذه القضية نفتح ملف الفتنة الطائفية إللى انتهجه "الغير مبارك" و طبقه بشكل أفضل بكتير من تطبيق المستعمر للحفاظ على سلطانه على مصر. .. و أخيرا نزفه لقبره و معاه ملف قتل المتظاهرين السلميين .
إللى فات ده كله كانت جرائم قتل للشعب .. لكن لما يوصل الموضوع لقتل مصر و دورها فى المنطقة .. فقد سلخت مصر عن افريقيا و أهمل ملف ماء النيل و رفض مد يد العون لأصدقاءنا و أهلنا فى أفريقيا .. يا ترى المتنحى ح يعتذر لأفريقيا عن الحرب إللى شنها ضد أوغندا اللى كانت بتبحث عن تمويل للتنمية و وقف قدامه و حاربه ، و لا ح يعتذر للسودان إللى ساهم فى تقسيمها و رفض يساعد السودانيين إللى اعتصموا فى شارع جامعة الدول العربية .. و لا ح يعتذر للفلسطيننين إلى ماتوا بسبب الانقسام بين فتح و حماس ولا عن الجدار العازل الفولازى .
أنا ح أتججن ، ده عايز يعتذر عن إيه ؟!! .. طيب بقى بنفس المنطق احنا كمان نحكم علي " المتنحى " بالسجن فى قضايا الكسب غير المشروع و بعدين بالقتل فى قضية قتل المتظاهرين .. و ممكن بعد اعدامه نبقى نقدمله اعتذار انه ممكن يكون اتوجع أثناء القتل .. ده مافيش لون من ألوان الفساد إلا و عمل " الغير مبارك " على توفيره بالأسواق .. دمر التعليم ، خرب الذم ، نشر الرشوة ، خصخص المصانع ، اهدر كرامة المصريين برة و جوة . . المصرى إللى كان بيخرج للعالم العربى أستاذ و عالم ، قرر المتنحى تخريجه فى شكل خادمات .. قرر قتل كل موهبة فى أى مجال و بحث عن الفشلة و أجلسهم على مقاعد المناصب القيادية ليتمكن من قتل مصر و إلى الأبد .
 |
| مش حزين غير على البدلة إللى مكتوب عليها اسمى الفار فى طرة كل كمها |
و غير مقبول ان حد يقولى ان مستشاريه استغفلوه .. ف كل شئ تم بمعرفته و بإرادته و الدليل هزاره عن العبارة إللى بتغرق ، و معرفته بموضوع الضرايب العقارية و الخصخصة ، و ملف التوريث إللى كانت بيحضرله من سنة 97 .. و أخيرا اعترافه انه قد توقف عن ممارسة مهام الدولة منذ وفاة حفيده .. و ده أعتراف كفاية لتقديمه للمحاكمة ، لأنه كان بيتعامل مع الجمهورية على انها مملكة سعادته ، و على الشعب أن يتقبل الخدعة إللى قامت بيها شجرة الدر لما خبت خبر موت الملك عشان ينتصروا فى الحرب .
و لأن شجرة الدر كان هدفها توريث الحكم عشان تفضل على العرش أكبر وقت ممكن ؛ فغير مقبول ان نعفو عن شجرة الدر و لا عن زوجها حتى لو أقسم انه ح يعيش على معاش 200 جنية زي باقى المواطنين على المعاش ، حتى لو أقسم انه ح يقف فى طابور العيش و ح تعذب و هو بيدور على أنبوبة بوتجاز ، و ح يعيش على الأغذية المسرطة و المسقية بماء المجارى .
لذلك : أنا اعلن عن رفضى لهذا العفو بصفتى مواطنة مصرية و اتهم كل من يشارك فى هذا القرار انه يجهض الثورة و يعادى الشعب ، و يهدر دم الشهداء ، و يدعم الفساد و يعمل على نشره فى كل رقعة بمصر .. و أؤكد ان اول قرار سيطالب به الشعب فور الإنتخابات الرئاسية القادمة هى محاكمة المتنحى و كل من ساهم بالعفو عنه لإنه يتحايل على القانون و يلتف على الثورة .. و هذا يعنى ان من سيتخذ قرار العفو فمن المؤكد أنه شريك للمتنحى فى فساده و يخشى ان يفضح أمره .
ان عفوتم عن المتخلى اعفوا عن كل فاسد و سارق و مرتشى و منحرف و منحل فى البلد و قاتل و جاسوس و اتركوها غابة .. و لبدأ مع كل المجرمين و البلطجية و المنحرفين و الفاسدين صفحة جديدة .. يا العفو يشمل الجميع ، او القانون يطبق على الجميع و بشكل عادل كما يرضه الله.. و لا تنسوا ان العدل أساس الملك .
المشاركات
ليست هناك تعليقات:
إرسال تعليق