 |
| الألتراس هو ضمير الثورة |
يعنى إيه وزير الرياضة يطلع يقول لعيبة الدرجة التالتة مش ح يلاقوا يآكلوا لو بتوع الدرجة الأولى ما لعبوش الدورى ... يعنى إيه العامرى فاروق طالع يقول السياحة ح تتأثر لو ما لعبناش الدورة
و بيقول لأسر الشهدا إللى اتوفى 70 شهيد و لا داعى انهم يبقى مليون لو الدورى مش ح يتلعب
هى قد كدة المكافأة و الحوافز اللى طالعة لمكتب الوزير و رجالته كبيرة لدرجة انه يقول كلام غير حقيقى ... سياحة إيه إللى ح تتأثر بالدورى المصرى ... انتوا لسة بتكلموا الشعب على انه اهبل و بريالة ........
واضح ان النظام إللى تربى سياسيا على يد نظام مبارك عارف ان الإلهاء هو الحل .... و شايف ان لا مجال للالهاء غير الكرة و الحشيش .
و قرر الاخوان يبدؤا بالكرة لأن الحشيش خلى الناس تتكلم فى السايسة ع المكشوف و من غير ما تعمل أى حسابات .
أحب اقول لحكومة الاخوان ان ملف شهداء الرياضة هو إللى ح يرجع الثقة للملاعب ... لأن الناس مش ح تبعت أولادها تموت فى الملاعب زى ما حصل فى بورسعيد يا حاج ... احنا مش بنطالب الوزير الحاج بحق شهدا محمد محمود و لا ماسبيرو ، احنا عايزين حق شهداء بورسعيد
لكن ح نقول إيه ؛ فمازال الفساد يحكم مصر ....و الدليل ان فى مصر فقط تزال المكتبات، وتترك القمامة في الشوارع ...... و رغم استمرار منظومة الفساد التى قررت اهدار أهداف الثورة ف احنا بنأكد ان الثورة مستمرة حتى تحقق اهدافها و مطالبها و لأن الألتراس هو ضمير الثورة فنحن معاه لآخر الخط
و ح انهى كلامى بالجملة إللى قالها كمال خليل :
الى شباب الالتراس نور مصر وضيها كل مطالبكم عادلة وهى فى صلب اهداف الثورة نسقوا مع الثوار ولاتتحركوا بمفردكم حتى لا ينفرد بكم الطغاة¬¬¬
المشاركات
ليست هناك تعليقات:
إرسال تعليق