مقاطعة انتخابات الاعادة واجب وطنى .. بس المقاطعة المرة دى ح تكون ايجابية

ح نستمر فى المقاطعة و مش ح ننزل نتخب بس المقاطعة المرة دى ح تبقى ايجابية و ح نثبت لكل من يدعم التزوير انهم مكشوفين و بيلعبوا  لوحدهم و ح نفضح أصواتهم المزورة ... كنا قبل كدة بنسكت على التزوير لكن المرة دى لأ ، لن دم الشهدا لسة حى و بينبض و بيفكرنا فى  كل لحظة اننا مش لازم نسلم مصر تانى للنظام الفاسد

و عشان كدة  لا للاستبن ، و لا للبلوفر .... الاتنين وجهين لعملة واحدة ، بس واحد بايع للامريكان ،   و التانى بايع للى ح يدفع أكتر ، و إللى جاهزة دلوقتى للدفع قطر ... الاخوان هما النظام الفاسد و شفيق هو مبارك ... الاخوان هما الوجه الآخر لمبارك : بس واحد بيحكم على الوش ، و التانى بيحكم من تحت الأرض

 ح نقاطع انتخابات الاعادة بس المقاطعة ح تكون ايجابية :

ح نعمل واقفة احتجاجية نعلن فيها رفضنا للانتخابات المزورة دى ... سواء مزورة بدفع رشاوى للناخبين الفقرا إللى بيستنوا موسم الانتخابات عشان يلموا العدية و هما مش فاهمين انهم بيدفعوا من لحمهم الحى مش بيآخدوا  ...و المرشح اللى استغل الأصوات الانتخابية المصنوعة من الفلوس لا يصلح ان يكون رئيسا لمصر، المرشح   اللى استباح الرشوة لا يمكن ان يكون رئيسا لمصر لأنه استغل حاجة العاطلين والسذج والمرتزقة و طبعا مش ح ننسى مقطوعى الرأس و مضيعى العقل و مطيعوا مكتب الارشاد.
 

ده بالنسبة للتزوير بعيدا عن الصندوق الشفتششى ، لكن لو اتكلمنا عن الاصوات المزورة مع سبق الإصرار و الترصد و هو مثبت فى عدة بلاغات مقدمة للنائب العام

بلاغ من نور الدين عبد الصمد يؤكد تزوير الانتخابات - اضغط هنا -

و ده البلاغ التانى :  

مقدم من النقيب عبد الرحمن منصور النشار من قوات الأمن المركزى؛ للنائب العام يتهم فيه مجموعة من ضباط الشرطة قاموا بإصدار 900 ألف بطاقة لأفراد شرطة  سواء كانوا أمناء  أوعساكر للتصويت لشفيق

و التزوير المرة دى ما جاش من الصندوق البلا - البلااستيك -  لكن جيه من كشوف الانتخابات ... إللى موجودة فى مصر الحديثة من ايام ما اخترعوا الانتخابات ، و لأننا شعب نعشق التاريخ فحتلاقى فى كشوف الانتخابات الرسمية المصرية اسامى كل الحبايب حتى لو اكل عليها الدهر و شرب ... تقدر فى كشوف الانتخابات المصرية تقابل كل اللى نفسك تشوفهم من اول مرضعة قلوون لحد كل آخر شخصية من معارفك و قرايبك اللى مش ممكن تقابلهم إلا فى الاخرة

لكن مصر بلد المعجزات و تقدر على احياء الموتى لحد ما يصوتوا فى الانتخابات و يرجعوا تربتهم آمنين سالمين 

لكن البلاغ المقدم للنائب العام بخصوص استخرج 900 الف بطاقة رقم قومى مزورة للتصويت لشفيق على ايد عساكر و امناء الشرطة ، و اللى مش مصدق و عامل نفسه فهيم  و ح يتمتطع و يتلوى زى علامة الاستفهام و يقول بقلاطة
: " اول ما القاضى ح يلاقى صاحب البطاقة من افراد العسكر ح يرفض يديله حق الانتخاب "


و هنا  ح اقولك يا فلوط يا فكيك بالأوى : البطاقات الجديدة تم استبدال فيها مهنة العساكر والضباط بمهن تانية لزجهم فى صفوف الناخبين و تحويل شفيق من مضروب بالأحذية إلى  مرشح الرئاسة القادر على احياء النظام السابق ، قال و يدخل الاعادة

و إللى مش مصدق حكاية البطاقات المزورة يقدر يوصل لمكتب النائب العام و يتطلع على البلاغ المقدم من النقيب عبد الرحمن منصور النشار من قوات الأمن المركزى ... هناك ح يلاقى صور من البطاقات القديمة للعساكر والضباط وصور للبطاقات الحديثة، بالإضافة إلى صور لكشوف من دفاتر السجل المدنى تثبت استخراج تسعمائة ألف بطاقة من محافظة الجيزة.

و خوفا على مصر و على الشرفاء إللى دعموا الثورة  ، و خوفا على الثورة لازم نقاطع انتخابات الاعادة ، بس المرة دى المقاطعة تبقى ايجابية ، لازم  نوقف  انتخابات الاعاده حتي الفصل في مخالفات شفيق باختراق الصمت الانتخابي اول يوم للتصويت ... لازم نوقف انتخابات الاعادة لحد ما نحقق فى كل البلاغات المقدمة ضد شفيق ...

و ده كله يؤكد اننا لازم نقاطع ، بس المرة دى ح تبقى مقاطعة ايجابية و خطواتها هى :

-        وقفة احتاجية لرفض الانتخابات المزورة

وقفة احتجاجية ضد تزوير الانتخابات - اضغط اللينك لتنضم إليها

- تقديم  طلب بوقف انتخابات الاعادة ، و التقدم بشكل فورى بدعوي لمجلس الدوله لوقف الانتخابات حتي انتهاء التحقيق مع شفيق ومرسي في المخالفات التي نسبت لهم من لجنة الانتخابات الرئاسيه

-        جمع توكيلات من كل الرافضين لوصول الاستبن و البلوفر لجولة الاعادة ، و المطالبة باستبعداهم لإفساد العملية الانتخابية ، و الإصرار على تغير الارادة الشعبية فى اختيار رئيس مصر بارادة حرة ، فاحداهما لجأ للرشوة و التانى لجأ لتزوير الأصوات

-        مقاطعة الانتخابات لكن المرة دى ح ننزل اللجان و نقعد خارج اللجنة و نرصد و نصور كل اللى داخل و خارج و ح نقارن كل الصور على مستوى المحافظات لإثبات عملية التزوير و التأكيد على ان بعض الاشخاص يترددون على أكثر من لجنة فى أماكن مختلفة

-        و ليكن شعارنا الفترة القادمة "   لا للاستبن ، و لا للبلوفر  ... الاخوان هما النظام الفاسد و شفيق هو مبارك ... الاخوان هما الوجه الآخر لمبارك : بس واحد بيحكم على الوش ، و التانى بيحكم من تحت الأرض  "

و ما تنسوش ان هذه الانتخابات تأتيكم براعية 2000 شهيد ومفقود... و 8000 مصاب وفاقد عين ومعاق و معذب ومكشوف على عذريتهن و 13000 معتقل