القوات المسلحة المصدر الرئيسى للتشريع SCAF

بدات اقرا فى المبادئ الأساسية لدستور الدولة المصرية الحديثة .... اضغط على اللينك عشان تقرا معايا و لو فاهم حاجة تقولى .. سيبك من كل المواد إللى فى الأول دى منقوشة من الدساتير إللى قبل كدة خليك مع المادة (9)  و (10) 

النص الكامل لوثيقة اعلان المبادئ الأساسية لدستور الدولة المصرية الحديثة

المادة (٩) بتقول :


الدولة وحدها هى التى تنشئ القوات المسلحة، وهى ملك للشعب، مهمتها حماية البلاد وسلامة أراضيها وأمنها والحفاظ على وحدتها وحماية الشرعية الدستورية ولا يجوز لأية هيئة أو جماعة أو حزب إنشاء تشكيلات عسكرية أو شبه عسكرية.

ويختص المجلس الأعلى للقوات المسلحة دون غيره بالنظر فى كل ما يتعلق بالشئون الخاصة بالقوات المسلحة ومناقشة بنود ميزانيتها على أن يتم إدراجها رقماً واحداً فى موازنة الدولة، كما يختص دون غيره بالموافقة على أى تشريع يتعلق بالقوات المسلحة قبل إصداره.

ورئيس الجمهورية هو القائد الأعلى للقوات المسلحة ووزير الدفاع هو القائد العام للقوات المسلحة، ويعلن رئيس الجمهورية الحرب بعد موافقة المجلس الأعلى للقوات المسلحة ومجلس الشعب.

وعشان ما نبقاش حرمنكم من حاجة  آدى كمان المادة (١٠) :


ينشأ مجلس يسمى "مجلس الدفاع الوطنى" يتولى رئيس الجمهورية رئاسته ويختص بالنظر فى الشئون الخاصة بوسائل تأمين البلاد وسلامتها، ويبين القانون اختصاصاته الأخرى. والدفاع عن الوطن وأرضه واجب مقدس ، والتجنيد الإجبارى وفقاً للقانون، كما تنظم التعبئة العامة بالقانون.

نرجع للمادة (9) :

مش فاهمة إيه الكلام المطاط ده : يعنى إيه الدولة وحدها هى التى تنشئ القوات المسلحة .. الدولة دى كيان اعتبارى ، لازم يتوضح ابعاده عشان ده الكيان الوحيد إللى من حقه انشاء القوات المسلحة .. و إللى فى إيده الانشاء فى إيده الإلغاء .. يبقى مين الفاعل المجهول ده .. و لا ده زى ضمائر النحو فى الثانوية العامة ، ضمير مستتر تقديره هو 

و بعدين يعنى إيه انشاء القوات المسلحة ؟؟ مقصود إيه بكلمة إنشاء دى ؟؟ يعنى  مقصود بيها المنشئات و المبانى ولا المعدات و الأسلحة ؟؟ و لا القوات و الأفراد ؟؟ ولا الخطط و توزيع الأسلحة .. و لا كل ده مع بعض.. و لو مش ده المقصود ، يبقى يعنى إيه القوات المسلحة ملك للشعب ؟؟؟


اه و الله ده اللى مكتوب فى المادة 9 من المبادئ الأساسية من دستور الدولة المصرية الحديثة 

يمكن يقصدو ان القوات المسلحة ملك الشعب يعنى الشعب له حرية التصرف فيها بالفك و الاحلال و التبديل و التغير.. يعنى الصبح ممكن الشعب تكبر فى دماغه و يقولك مش عايز قوات مشلحة السنة دى


 ولا الملكية دى تفسيرها القانونى يبقى إيه ؟؟؟ و حدودها لحد فين ؟؟ يعنى هل يجوز للشعب استبدال القوات المسلحة و الاكتفاء بالقوات بس .. و لا ممكن الشعب يكتفى بالتسليح و يوزعه على نفسه و يقولك انا ح أتحمل مسئولية حماية الوطن - حاجة كدة زى اللجان الشعبية ايام الثورة - 

نيجى بقى للميزانية ، هو مش رئيس الجمهورية القائد الأعلى للقوات المسلحة ، يبقى إزاى القائد ما يعرفش حاجة عن الميزانية .. طيب هى الميزانية دى جاية منين ؟؟ من فلوس الشعب ولا لها مصادر تمويل تانية ؟؟ و مصادر التمويل التانية ليها علاقة بمصر ؟؟؟ و شعب مصر إللى احنا قلنا أساسا ان القوات المسلحة ملك له .. طيب إزاى المالك ما يعرفش حاجة عن اللى بيملكه ؟؟!! دع يبقى مالك طرطور ، ده حتى مابيعرفش ملكه بيصرف إيه و منين ؟؟؟

و مين إللى ح يعين وزير الدفاع ؟؟؟ الدولة ؟؟ ولا رئيس الدولة ؟؟؟ طيب و لو رئيس الدولة أخل بالشرعية الدستورية ؟؟ الجيش ح يتصداله .. طيب لو وزير الدفاع طمع فى السلطة ؟؟؟

وعشان رئيس الدولة يضمن ان ماحدش يطمع فى السلطة يجيب وزير دفاع ضعيف ، و نبدأ سلسلة من الضعف .


 و لا وزير الدولة ح يجى بشكل انتخابى حر ، ف ح يجيب وزير دفاع قوى و حر هو كمان ؟؟؟؟ولا وزير الدفاع ح يكون موجود و هو إللى ح يجيب رئيس الدولة ؟؟ عشان يضمن انه ما يحصلش تعدى على الشرعية الدستورية ؟؟

طيب بلاش دى

نكمل باقى المادة إللى بتقول رئيس الدولة ما يقدرش يعلن قرار الحرب إلا بسؤال المجلس الأعلى للقوات المسلحة ، طيب كمان ما يقدرش يعقد أى اتفاقيات إلا بإذن المجلس ؟؟

يعنى مصر ح يبقى فيها اربع رؤساء .. رئيس الدولة ، رئيس المجلس الأعلى للقوات المسلحة، رئيس الحكومة ، رئيس مجلس الشعب .. ح تقولى و إيه مجلس الشعب إللى يتقارن بالمجلس الأعلى للقوات المسلحة ح أقولك أصل مجلس الشعب ده فيه نواب الشعب ، و الإنتخابات ما كانتش مزورة ح يبقى مجلس بجد بيحكم باسم الشعب بجد ، و بيتصرف فى ممتلكات الشعب زى ما الشعب عايز ، و المادة 9 بتقول ان القوات المسلحة ملك للشعب يبقى فى الحالة دى مجلس الشعب يبقى حر التصرف فيها 

صح الكلام ؟؟


لو الكلام غلط يبقى إيه المقصود من المادة (9) و المادة (10)  ؟؟ ان القوات المسلحة تبقى دولة جوة الدولة ؟؟ لو الكلام ده غلط ؟؟ يبقى قادة المجلس الأعلى للقوات المسلحة لازم تخضع هى كمان للانتخابات الحرة و يتم اختياراها من رجل الشارع بانتخابات حرة نزيها ؟؟

ده مش كلامى ده اول كلام المادة (9) إللى بتقول أن القوات المسلحة ملك للشعب 

و لأن الموضوع خاضع لفكرة البيضة و لا الفرخة .. هنا ح أضطر اخلص الكلام

و اخيرا ح أقولكم الجملة إللى قرتها على صفحة كلنا خالد سعيد و بتقول : " وثيقة المبادئ فوق الدستورية اللي بتدي صلاحيات للمجلس العسكري تفوق صلاحيات الرئيس ومجلس الشعب:

المجلس العسكري من "تسليم اللسلطة للمدنيين" .. إلى "تسليم السلطة على المدنيين" "