عفوا وزير الإعلام لقد رسبت فى اول امتحان

يا اهللالا يا إللى مسئولين عن الإعلام ما حدش قالكم ان لنقل المحاكمات  مغزى سياسى و اعلامى .

المغزى السياسى اننا نؤكد للجميع داخل مصر و خارجها ان مصرسباقة و التاريخ بيتكتب من  هنا  .. نفهم الكل برة و جوة ، اشقاء و لسة ما اتشقوش ان  بلدنا اصل الحضارة ، بلدنا السباقة لأنها البلد الوحيد القادر على محاكمة نظام فاسد حكمها لمدة 30 سنوات و مع ذلك ما قدرش يكسرنا و لا يقتل الانسان جوانا  .. و طبعا نقل المحاكمات بيأكد على انجازات الثورة و نجاحها ف محاكمة هؤلاء اللى واقفين خلف القفص .. و لأن الثورة قام بيها الشباب المصرى و كملها الشعب المصرى ، و المحاكمات بيقوم بيها القضاء المصرى فطبيعى انه ينقلها التلفزيون المصرى .. و بس المصرى

و فى الحالة دى مش من حق وزير الاعلام انه يشيل لوجواالتلفزيون المصرى من على المحاكمات دى .. لأن لازم كل تلفزيونيات العالم تآخد عن تلفزيون المصرى ، تلفزيون الشعب المصرى .. الأشقاء و الأعدقاء ، و الغريب و القريب ، و العدو و الحبيب كله ينقل و يتحرك بناء على إشارة تلفزيون الشعب المصرى = التلفزيون المصرى .. مش يطلع لنا قرار فلوطة يقولنا إللى يدفع ح نشيله اسم التلفزيون المصرى و يحط اسم محطته  .. على كدة ما إللى يدفع عشان يشترى الهرم نوصلهوله دليفرى و بالسلاطات كمان

وجود اسم التلفزيون المصرى على محاكمات المخلوع يثبت تواجدنا الاعلامى جمب التواجد السياسى .. تواجد اعلامى فى كل انحاء العالم يا بتوع الاعلام الحكومى .

حد يوطى الراديو إللى جايب صوت أنور السادات و هو بيقول و قد تولى أمرنا إما جاهل أو فاسد 

سيبكم من السادات و خليك معايا فى المغزى السياسى و المغزى الإعلامى

تيجوا نفصص التواجد الإعلامى أكتر : التواجد الاعلامى للتلفزيون المصرى ليه اختيارين و كان لازم شعب الإعلاميين فى ماسبيرو يطالبوا بيه .. كان لازم تلفزيون الشعب  يحتفظ بلوجو التلفزيون المصرى على المحاكمات لنؤكد على توجدنا الإعلامى ... و ان كنت طمعان فى المكسب المادى فما تستعجلش ، ح يجى بعد شوية .. فالتواجد الإعلامى ما يتعارضش مع المكسب المادى لأن بعد شوية قنوات العالم ح تحتاج المحاكمات دى لإستخدام موادها فى برامج و أفلام و فى سى ديهات ، و فى الحالة دى تبقى حققت التواجد الإعلامى و المادى .. لكن انك ترفع لوجو التلفزيون المصرى للي يدفع تبقى خسرت التواجد الإعلامى و المادى و أصبحت المحاكمات ملكا أصيلا للقنوات إللى دفعت مقابل رفع لوجو التلفزيون المصرى و من حق القنوات دى انها تضع المواد دى على النت فى المواقع الخاصة بقنواتها و يستخدموها فى برامجهم و كل دى فلوس لو ما عندكش فكرة .. و كله كسب و حط اللوجو بتاعهم إلا حضرتك

يا ريت إللى عايز يبقشش يبقشش من جيبه مش من جيب الشعب 
و يا ريت اللى عايز يبعد اسم الشعب المصرى عن مكتسباته يدينا آمارة لسبب هذا الرفع .. قال يرفع اسم التلفزيون المصرى من على بث محاكمات المخلع 

الحكاية محتاجة رؤية اعلامية .. و  بكدة الوزير خسر نقطة فى الإختبار الأول .. و فاضلك زلطة و تطلع برة 
 ضيعت التواجد الإعلامى و المكسب المادى مع بعض 

فى حد جمبى بيقولى : " وزير الاعلام مش من حقه يبيع لأنه ما اشتراش " و بالتالى يبقى التليفزيون المصري مش من حقه بيع المحاكمات ولا يستطيع ذلك هو أو غيره..

الوزير ما اشتراش صحيح لكن المحاكمات دى ملك الشعب ، و هو حر التصرف فيها ... و عشان كدة المحاكمات دى من حق الشعب إللى اتسرق ، من حقه ان اسمه و اسم تلفزيونه يفضل على المحاكمات دى ، و لو المواد ح تتباع فى يوم من الأيام تبقى بتتباع بلوجو التلفزيون المصرى الوكيل الوحيد عن الشعب المصرى .. أظن واضحة : لو المحاكمات دى تباع لصالح الشعب .. و الفلوس توضع بخزينة الدولة .. مش تقولى القنوات الفضائية دفعوا حق إيجار الكاميرات و استئجار الفنيين و الفنانيين

 هو انتوا تفتكروا التلفزيون المصرى خد حق نقل المحاكمات ليه ؟ ماهووو عشان هو تلفزيون الشعب .. عشان كدة هو الوحيد إللى خد حق  نقل المحاكمات .. و فى الحالة  هو وكيل عن الشعب  ــ إللى الله وكيله ــ و التلفزيون المصرى يقدر يقوم بكل  إجراءات البيع او حق استغلال هذه المواد لأن وزارة الاعلام هى الجهة المنوطة بتلك الأمور و المفروض وزير الاعلام هو اللى يوضحها لباقى الجهات  

عفوا وزير الإعلام لقد رسبت فى اول امتحان 

ينفع  نبقى بلد علينا ديون و نبقشش على قناة الجزيرة و البى بى سى و باقى القنوات العالمية ... و يقولك اصلهم دفعوا حق استغلال الكاميرات ، يعنى كمان  نسمحل لهم انهم يطلعولنا لسانهم و يقولنا ما احنا مأجرنكم عندنا .. بقى الإبداع إللى شفناه فى الصورة ده و عبقرية التصوير و الاخراج فى نقل المحاكمات تبقى مقابل تأجير !!!!!!!!!!!!!!!!!!!! و لا ده جهد و ابداع شعب تم اهداره من قبل من لا يملكون أى رؤية اعلامية و اهدروا حق الشعب و حق الإعلاميين

و اتعامل معاهم على انهم قابلين للاستئجار لمن يدفع اجر استئجار العمال و الكاميراات

و اللى بيقارن بين محاكمات صدام و محاكمات المخلوع اقوله حاااااسب عندك .... مصر بتحاكم نظام فاسد حكمها ، لكن صداع حاكمه عدو اغتصب ارضه و الموقف مختلف بكل الاشكال

كفايانا سكرتارية بتنفذ التعليمات ، عايزين قيادات عندها رؤية و فكر و هدف تسعى لتحقيقه و اللى مالوش رؤية يتنحى يتخلى يدلى يتبلى .. و لو مستنى يتملا يحل عن سمانا و يبعد عنا  

ملحوظة : سرقة البلد لن يعتمدها  الشعب المصرى كرؤية و هدف لأى مسئول قادم  ... عشان ماحدش يقولى النظام السابق كان عنده رؤية " كيف تسرق مصر فى اسرع وقت و بابسط شكل كأنها شكت دبوس