لجنة الدراما بالاذاعة تأمر بمواصلة سياسة الإلهاء:
الشيشتاوى رئيس الاذاعة ُمصر على تفعيل قوانين الفلول بكل حذافيرها ، بداية من تهميش دور الشباب و رفضه المستمر لتدعيم الثورة كما تنصل من ان تكون الاذاعة المصرية هى اذاعة الثورة كما طالبه ثوار ماسبيرو.. ليس هذا فحسب و انما قرر الابقاء على الفاسدين و المعروف فسادهم باوراق رسمية فى مناصبهم .. ليه يا شيشتاوى كدة ؟!!!!!!!!!!! انتوا مش عايزين حتى تبيضوا وشكم ؟!!! يمكن يكون للتلوث متعة .. و عشان ما نجاوبش بالنيابة عن حد ح نسيب الاجابة للى جابوا الشيشتاوى من الاقليميات لرئاسة للاذاعة فى الفترة الحرجة دى
و لم تقف انجازات الشيشتاوى عند هذا الحد بل انه قام بتشكيل لجنة الدراما و قرر السير على نهج النظام الفاسد ، لذلك قرر استبعاد الشباب من لجان الدراما لتبقى الاذاعة المصرية رافعة راية التخلف يا ولدى .
ف ابعاد الشباب عن لجنة الدراما مش بس يوجد فجوة بين شباب المستمعين و الإذاعة لأنهم كان ممكن يبقوا حلقة وصل بين الشباب المتواجد بكل محافظات مصر و المنتشرين على التويتر و الفيس بوك ، لأ ده كمان الشباب قادر على بث الحيوية فى الاذاعة التى اصبحت جثة هامدة بعد ان كانت كهلة غير قادرة على مسايرة الجيل الجديد الذى فرر إلى الأنترنت و الفضائيات .. و الان تحاول كل مؤسسات الدولة التقرب من الشباب و التواصل معهم إلا الشيشتاوى و إذاعته و لجنة الدراما التى شكلها بنفسه .
و كان تشكيل لجنة الدراما من كهول الاذاعة و كان اصغر رجال لجنة الدراما من شباب سن الستين او اقل بسنتين عشان نبقى ما بنكدبش على ربنا.. و ليسوا كهول فحسب و انما اصحاب أفكار عتيقة غير قابلة لمسايرة الأحداث و المتغيرات .. و أكتر متمرد فى هذه اللجنة يغشى ان يهش الذباب عن وجهه فقد يكون هذا الذباب قريب فلان صاحب المركز الفلانى او نسيب علان شاغل المنصب العلانى ...
نيجى بقى لطريقة قراءة النصوص الدرامية من عناصر كهول لجنة الدراما .. بيقروا بطريقتين .. و كل طريقة بتختلف على حسب انت جاى من أى سكة :
اولا : المسلسلات القادمة من وكلات السمنة و الزيت لا تعرض على لجنة الدراما لكن تنزل بيزتها و سمنتها من العلبة مباشرة إلى استوديو الهوا ؛ و من الاستوديو إلى ودن المستمع المسكين .. ح تسألنى مين وكالات السمنة و الزيت ؟؟ ح أقولك الوكالات الإعلانية .. ف من حق الوكلات دى انها تقول إللى هى عيزاه فى الاذاعة المصرية بدون قيد او شرط ، تستخدم الفاظ خادشة ، حوار منحط ، موضوع بذئ مش مهم .. دى وكالات ح تدخل فلوس للاذاعة و لازم نشيلها على راسنا ، حد يكره ان راسه تبقى كلها زيت .. ان شا الله المسلسلات دى تشتم فى المجلس الأعلى لفريق زمباوى لكرة القدم .. و يوقعونا فى مشاكل مع زمباوى .. مش مهم .. لأن الشعار المرفوع الآن فى الاذاعة ، انه لا حياة بدون سمنة .. و سمنى تجدنى ــ على وزن أبجنى تجدنى ــ
الطريقة التانية التى تتبعها لجنة القراءة و هى الخاصة بالأعمال الدرامية التى تنتجها الإذاعة :
1. ح ندفع ملاليم لأى حد عايز يشتغل فى الإذاعة المصرية خصوصا لو كنت شاب .. و لأن الشباب هدفه أنبل و اسمى و مش هامه المادة فما بيهمهوش المدفوع
2. الاعمال الدرامية التى تقوى الشعور بالثورة و تساهم فى المطالبة بالحق و تساعد على رجوع الحق لأصحابه مرفوضة .. لكن عايزين تهزروا و تهرتولوا مافيش مانع .. فشعار لجنة الدراما بالاذعة ادينى فى الهياف و انا اجبك يا فننس ــ بيدلعوا الفن ــ
و عشان ما نقولش كلام مرسل نديكم مثال حى : قرر السيد / محمد مرعى البالغ من العمر 76 سنة عرقلة احد النصوص الذى ينتصر لأسر الشهداء و ينتصر للشهيد.. ضاربا بعرض الحائط كل القرارات المساندة للشهيد .. و ده ليه لأن السيد "مرعى" تلميذ اذاعة صوت العرب اللى اتعودت على نظام القمع فى الستينات .. السيد " مرعى " من بتوع " مصر وقعت 20 طيارة ، لأ وقعنا 200 طيارة " ـــ و بعدين نكتشف ان طيرانا هو اللى انضرب فى 67 .. بنفس المنطق " مرعى " أدى اوامره بأن ماحدش يجيب سيرة الطماطم المسرطنة اللى الصهاينة بتبيعها فى السوق المصرى ..
و ده المسمع إللى السيد / محمد مرعى شايف انه خطر على بيع الطماطم فى البلد
أحمد طنط أحمد طنط | تعرف ان المصريين بيتقال عليهم خير أجناد الأرض .. أصل أنا بأحب الحديث إللى قاله الرسول : صلى الله عليه و سلم : وصى علينا و قال على المصريين خير أجناد الأرض" .. تفتكر يا أحمد خير أجناد ممكن تضيع مجهودها و طاقتها فى حب بنت .. أنا مش عايزة أغتابها و اجيب سيرة حد.. لكن ينفع خير اجناد الأرض تآكل طماطم مسرطنة أو ترتبط و تتجوز من اشخاص مسرطنة |
تفتكروا يقصد إيه السيد / مرعى انه يخبى موضوع الطماطم المسرطنة إللى كل وسائل الإعلام اتكلمت عنه .. يمكن يكون الراجل قصده يزود عدد الشهداء فى مصر لأنه شغال من الباطن تبع نظام تنظيم الاسرة . . و لأن الإجابة مش عندنا فاحنا بنحول السؤال للسادة إللى جابوا " مرعى" عضو فى لجنة الدراما
فى حلقة تانية مإللى بيعرقلها مرعى بتحكى إن "بطل المسلسل بيتخانق مع أحد حراس الأمن فى نوادى احدى النقابات " .. هنا اترفز جدا مرعى و طلب من مخرج العمل تغير هذه المسامع لأنها بتسئ للأمن العام .. و هو مش عايز توتر مع الداخلية .. تفهمه ان حارس النقابة مش تابع للداخلية و ده يقولك لأ ، انتوا بتحاولوا تضللونا . . و راسه و ألف راس تانية من بتوع الفلول ان الحارس ده رمز للداخلية .
و بتهيقلى بالشكل ده ممكن السيد محمد مرعى يترقى و يبقى مستشار وزير الاعلام لشئون الفلول .. و الله الموفق
معلومة خاصة للفاهمين فى الدراما : المشكلة و الكارثة ان السيد محمد مرعى رافض ان كل شخصية تتكلم بلسان حالها و عايز كل الشخصيات تتكلم كأنها ملايكة من السما و ما نعملش إلى اعتبارات لفوراق اجتماعية و لا سنية و أدبية و لا أى حاجة عندما تتحدث الشخصية.. و ده فى الدراما ما ينفعش ، ما تبقاش دراما تبقى برنامج ، و برنامج أهبل كمان .. و بنفس المنطق الراجل ده حارب الكثير من المواهب و دفع بمن لا يملكون أى مواهب و الدليل الجوايز إللى كان بيدعمها فى كل المهرجانات إللى كان مسؤل عنها من عشرين سنة و لحد السنة إللى فاتت .. و المستندات موجودة فى مكتب رئيس الاذاعة و فى مكتب الأمين العام لمهرجان الاعلام العربى و فى مكتب وزير الاعلام
رسالة إلى السيد / مرعى ، ابشر ، لديك مؤهلات رئيس قطاع الإذاعة .. نوعدك بالمنصب بس بعد اعادة الهيكلة .. دمر كما يحلو لك يا مرعى
و كفاية ان الاذاعة بتنتج مسلسل لعمرو عبد السميع " يبقى إزاى ح تحط جمبها أى حاجة بتتكلم عن الثورة .. ده حتى السفرة يبقى شكلها بايخ .. كلوا كلوا من غير هنا و لا شفا لكل إللى استحل فلوس المصريين للانفاق على الفلول
المشاركات
ليست هناك تعليقات:
إرسال تعليق