لجنة الإستماع فى الدور التاسع تنصب باسم العاملين بماسبيرو - فاحذروها

عصام الأمير عامل لجنة وهمية اسمها لجنة الاستماع حاطت فيها تلاتة من اتباعه ، و التلاتة بينشروا بين العاملين فى ماسبيرو ان دى لجنة استماع لطلبات العاملين ... شوفوا المسخرة اللى خرجت بيها اللجنة و كذبها و نصبها باسم العامليين بماسبيرو

بيان اللجنة :

-        تقدم عدد من العاملين باتحاد الإذاعة و التلفزيون  بمجموعة مقترحات لجنة الاستماع التي تناقش الإعلاميين في التصور النهائى لقوانين الإعلام المرئى والمسموع في المرحلة القادمة أهم المقترحات التي وضعها العاملين وحصلوا على  وعد من لجنة التشريعات الإعلامية بوضعها في الاعتبار و الإهتمام بها ..  ومن أبرز هذه  المطالب ضرورة إستقلالية هيئة اتحاد الإذاعة و التلفزيون وتمويله

النصبة الأولى : 

لجنة النصب بتتكلم عن هيئة الاذاعة و التلفزيون يعنى ماسبيرو بقنواته اتحلوا و البهوات رضيوا بالحل و تشريد العامليين و الاعلاميين و بيتكلموا عن هيئة الاذاعة و التلفزيون و تمويلها
... و كمان العاملين فى الاذاعة و التلفزيون موافقين و بيناقشوا تمويل الهيئة الجديدة ... 

 ...دى اول مصيبة تحملها اليكم لجنة الإستماع

اللى ما قالتش عدد العاملين اللى رفعوا توصيتهم للجنة الاستماع بالدور التاسع

نستكمل باقى طلبات لجنة النصب – الشهيرة بالاستماع

"  ضرورة ملكية إدارة الترددات الأرضية والفضائية، وحقهم في الحصول على جزء من التمويل من خزانة الدولة على اعتبار أنها هيئة خدمية. "

النصبة الثانية : 

-        ده ايه ده بقى  ده نصب ولا اسمه ضحك على الدقون ؟؟؟  انت عايز تبقى مالك ؟؟ و لا عايز جزء من التمويل من خزانة الدولة ؟؟؟ و لا ح تسرق على الوشين ؟؟ و تأخد من خزينة الدولة و ما فيش مانع تبيع الترددات دى و تلهف فلوسها و تقول انه تم انتاج بيها برامج و صرفت اجور للعاملين اللى انت ح تطالب انهم يقبضوا فلوسهم من وزارة المالية مش من عندك لأنهم موظفين فى الدولة  .... كمان السرقة ح تبقى قانونى ، هايل

نكمل باقى طلبات لجنة النصب – الشهيرة بالاستماع 

" كما طالبوا بعدم تدخل السلطة التنفيذية في إدارة الهيئة، وتخفيض ساعات البث الإذاعى والتليفزيونى، مع إجراء إستطلاع رأى بصورة دائمة للمستمعين والمشاهدين لتقييم العمل وتطويره.  "

النصبة الثالثة و الكبيرة : 

-        هما مين اللى طالبوا ؟؟ انت عايز تسمى الخمسين سستين واحد اللى انت طمعتهم انكم ح تشغلوهم فى هيئة الاذاعة و التلفزيون بعد ما تشردوا باقى الاعلاميين و البرامجيين - انت بتسمى دول العاملون بماسبيرو و بتقول انهم طالبوا

- لما تحب تتكلم عن العاملين يبقى تتكلم عن الأربعين ألف موظف او على الأقل يبقى هناك من يحمل توكيل منهم للتحدث باسمهم

- نتكلم فى  موضوع تخفيض ساعات البث :                        بقى العاملين اللى بيقبضوا على الانتاج  ح يطلبوا بتخفيض ساعات البث ، و لا عشان انت ح تسرحهم ف ح يبقى ما عندكش عدد ساعات من الانتاج فقررت تخفض ساعات البث

- و استطلاع رأى ايه الى انت عايز تعمله للمشاهدين ؟؟ ما انت عارف رأى الناس فى انتاج ماسبيرو و مع ذلك لا رفعت سقف الحرية و لا طورت انتاجك و سايب ماسبيرو يخرب عشان تحوله لهيئة الاذاعة و التلفزيون - و على فكرة ده مشروع انس الفقى و دلوقتى عصام الأمير جاى يكمله

الخلاصة :

عصام الأمير و اعضاء لجنة الاستماع يمارسون الكذب على العاملين بماسبيرو و ينشرون كلام  باسمهم

احذروا هذه اللجنة الافاقة التى تعمل لحساب الأمير و رجاله الفاسدين

 و لا تعمل لصالح اعلامى ماسبيرو و لا موظفينه و لا تعمل لصالح الاعلام بأى شكل ... بل كلها مصالح شخصية يقودها عدد من المنتفعين

اللهم بلغت اللهم فأشهد