ايها الثوار - ربنا يخيب ظننا و يسخره لخدمة البلد و يبهرنا

للثوار الشرفاء الذين يريدون كل الخير لمصر : لا تحزنوا

بكرة بلدنا ح تبقى أحسن ... صحيح دايما اللى على راسها  سايب نفسه لعبة فى ايد امريكا و بينفذ اوامرها و ما بيهتمش بمستقبل بلدنا ولا بشبابها  ... لكن برضه بكرة بلدنا ح تقوم

صحيح البدايات هى مقدمات للنهايات ... و البداية بتقول  ان كل الدنيا رصدت 9 مليون مصوت فى انتخابات الرياسة المصرية 2014.. إلا مصر و اعلامها رصدوا 26 مليون ناخب .. لكن بالهنا والشفا

صحيح اعجاز العسكر قدر يجمع بين النقيضين ، جمع بين  اللجان الفاضيه و الصناديق المليانه ....... لكن ده مش موضوعنا  ، لأن رصد معجزات العسكر كتيرة و لا تنتهى  و على رأسها علاج الكفتة

لكن متأكدة ان بكرة مصر ح تقوم .. لأن ضعف المشاركة فى الانتخابات و مقاطعة الشعب لها المفروض انها وصلت للجنرال رسالة ... المفروض انها قالت له الثورة فركة كعب منك .. ضعف المشاركة بتقول للجنرال خليك حذر .. اتعامل مع الشعب بحذر ...خليك فاكر ان الشعب اللى فوضك فى يوليو سحب التفويض  ايام الانتخابات .. لو ما اتحركتش فى اتجاه الشعب و حل مشاكل الناس ، الناس مش ح تتعاون معاك

لو اعتمدت اسلوب القمع مع الناس عامة و الثوار خاصة فالقمع مش ح يحل مشاكلك لكن ح يعقدها .. القمع  ح يشحن الناس ... لو اتبعت نظام تلفيق التهم و تشويه السمعة لازم تعرف ان الظلم جند من جنود الله خلقه لتحقيق العدل فى الأرض .. يبقى من يعتمد على القمع و الظلم نهايته محتومة و ح تكون اسرع م اللى قبله

لو القطاع الأمنى فضل يصورلك ان كل المعارضة اخوان و طاح فى الناس و بدأ يقتل و يحبس الناس ؛ ظلم ... اعرف انك بتظلم نفسك و بتكتب نهايتك - لو صدقتهم و ما طهرتش مؤسستك -

افتكر دايما انك معاك:

-        المؤسسة العسكرية - الجيش .

-        الشرطة و . أمن الدولة

-         القضاء .

-        المخابرات العسكرية والمخابرات العامة .

-         الاعلام .

-        معاك مجلس الشعب اللى غالبا انتخاباته ح تكون شبه الانتخابات الرئاسية ... و طبعا ح يدولك كل  الصلاحيات    اللى ح تتحول لصالحيات مطلقة  ماحدش ح يدفع تمنها غيرك.

لكن كمان افتكر انك من غير الشعب ، كل مؤسساتك و افرادك ح تنقلب عليك .. ارجوك ما تنساش ان الانتخابات و ارقامها مجرد خيال علمى ... و الأرقام الحقيقة شبه انتخابات مجلس الشورى .
 لكن كمان ممكن تصدق ان قدامك فرصة ذهبية ... و انك ممكن تبدأ من جديد مع شعبك .. تحتويه .. وتطمنه ... تطمنه بحل مشاكله مش بالكلام الناعم و الفح ... الناس مش ناقصة وعود .. الناس محتاجة تنفيذ و حلول للمشاكل .. وقتها بس ممكن يصدقوك و يشاركوك المسئولية .

ارجوك خيب ظنى وتوقعاتى فيك

____________________________________________

رسالة لكل اخوانى مصر يستحمر:
المقاطعين للانتخابات هما اللى سحبوا التفويض..وطبعا انت ما فوضتش من الاول .. فما تنسبش لنفسك فضل المقاطعة ... و ان كنت ناوى تندس بين المعارضة يبقى تلتزم بالسلمية و تنسى الجماعة و تفتكر انك مصرى هدفك مصلحة البلد ... لا التنظيم و لا من يمولون التنظيم

______________________

رسالة للمنبهرين بنتيجة الانتخابات : انا منبهرة من انبهاركو .. مش فاهمة اتفجئتوا بايه ؟؟ ما تعرفوش انها مسرحية من الأول  .. ابهار العالم ايها المنبهرون عمره ما كان بالرقص والطبل قدام اللجان .. الابهار الحقيقي هيحصل لما تتحقق العدالة الاجتماعية ونقضي علي الفساد ونحقق العدل و نساير التقدم العلمي .. ده لو حضرتك عايز تنبهر .. ... الظريف بقى ان ماحدّش ح ينبهر خالص لمّا يشوف الموازنه العامه بتاعه السنه دي ... ده لو الرقص و السهوكه عملك انبهار ، ابقى كلمنا عن انبهارك بسبب الموازنة العامة للدولة

 ..... و نصيحة اخيرة للمنبهرين : اللى يفرح بالنجاح بالغش يبقى مش طبيعى 

.. فلا تخسروا أنفسكم حتى لو تظاهرتم بالنجاح ... الصدق ابقى ايها المنبهرون

_________________________

و اخر كلامى للثوار ..  الثوره ندا .. بيسمعه الشعب و بتجمعه ... و اللى ح ينزل يبقى سمع الندا .. و رغم انى حاسة اننا قريب راجعين تانى ... لكن يمكن ربنا يخيب ظننا و يسخره لخدمة البلد و يخليه يبهرنا بجد مش بالاعلام الكداب

يمكن ربنا يخيب ظننا و يسخره لخدمة البلد و يخليه يبهرنا بالافراج عن المعتقالين بسبب قانون التظاهر ... و يلغى قانون التظاهر ويلغى  المحاكمات العسكرية للمدنيين

سمر العـزب