 |
 |
| مسيرة العباسية للتحرير فى جمعة تقرير المصير |
الميدان كان مابين ممتلأ و خاوى ... فاضى و مليان ، بيقول و ما بيقولش ... لكن الخلاصة ان العسكر قدر يبالغ فى تشويه الاخوان عشان الناس تتجه لهم و تنسى جرايم العسكر و الحكومة ... و الاخوان قدروا يفتتوا الميدان و يمزقوه و يقسموه .. و انصار ابو اسماعيل يبحثون عن أى شئ يعبر بهم منطقة الكبت السياسى الذى أصابهم منذ ان اطلقوا اللحا
و فى النهاية :
الثورة تايهة ، لا هى عارفة تحقق مطالبها و لا قادرة تجيب حقوق شهدائها و لا حتى عندها رغبة فى الانطفاء
و بما ان الثوار مش ح يقبلوا إلا باستمرار الثورة و نجاحها ، فلازم نلاقى طريقة لطرد كل من حاول تفيت الميدان و التشويش على صوته بعمل منصات و همية تهتف بأى كلام طاير فى الهوا شاشى و لا يعبر عن المبادئ إللى الثوار نزلوا عشانها
و من الهتافات الفلصو إللى اتقالت :
و من الهتافات الفلصو إللى اتقالت :
" الشعب يريد اسقاط اسرائيل " ... و منصة تانية تدعو لإلغاء المادة 28 بعد ما قالولها نعم يا حبيبى نعم ، ف لما الحبيب اداهم على قفاهم قالوا كدة طيب عليا و على الأعداء ، و ح نلغى المادة 28 عشان خاطر الشاطر حسن و أبو سماعين ياسين ... و بدؤا فى التعامل مع المادة 28 على انها رجس من عمل الشيطان .... مش انتوا إللى قلتوا نعم للتعديلات الدستورية يا ايتها القوة المتأسلمة ، مش انتوا إللى قلتوا ان الكفرة بس هما إللى " لأ " على التعديلات ، حصلكم إيه اعلنتوا الكفر اخيرا ، أأقصد الكفر بالعسكر لأنى مش من انصار اقحام السياسة فى الدين و لا الدين فى السياسة
______________________________
فكرة لم الشمل فكرة رومانسية حالمة لا تصدر إلا عن ثوار شرفاء ، لكن كل من رفع صور مرشحى الرياسة فى الميدان قد خان الميدان ، و ركب الثورة و باع البلد من أجل مصالحه ، و فاكرين الناس أغبية و ح تتحالف معاه و تدعم مرشحهم
و عشان كدة لازم الخاين يطرد من الميدان ... عشان نقدر نقرر مصير الثورة ... اطردوا اللى بيحكم مصالحه على مصلحة البلد ، اطردوا إللى دلدل من رقبته صورة مرشحه الاستبن ، اطردوا إللى بيتاجر بكرسى رياسة مصر و بيبيع مرشح الرياسة بجنية لو كارت و خمسة لو تى شيرت .... اطردوا كل من وافق يشترك فى مسرحية قارعة اسمها " انا مختلف مع العسكر "، و هو من تحت الترابيزة بيلاعب العسكر عشان يطلع باكبر مكاسب على حساب البلد و الثورة و الشعب
...
زى ما انا رافضة للانتخابات الرئاسية تحت حكم العسكر و رافضة وضع الدستور فى وجود برطمان الاخوان ... بنفس المنطق و القوة أطالب بتطهير الميدان ، من كل من دلدل من رقبته صورة مرسى الإستبن ... و ح اعمل على توعية الغلابة بتوع حازمون فقد اصبحوا اضحوكة الناس برة و جوة بسبب القصة الغير محكمة بتاعة امه " .... كلمة " امه " كانت زمان شتيمة ، دلوقتى حازمون عملوها منطق سياسى
لازم نطهر الميدان عشان نتفرغ للعسكر اللى اقسم على البقاء فى السلطة بشكل ابدى و السذج يقولولك لا و الله هما ماشيين .. العسكر اللى بيضغط بايديه و سنانه على الناس الغلابة التى لا تنتمى لأى قوى سياسية و حتى بيخافوا يقولوا انهم من حزب الكنبة ليكون ده مش مسموح بيه ، و مع ذلك ماحدش راضى يقدر ضعفهم و لا بيحترم احتياجتهم ولسة بيساومهم على حريتهم و مطالبهم للحياة ..... و لسة العسكر و حكومته بيفتعل لهم ازمات وهمية زى البنزين و انبوبة البوتجاز و رغيف العيش
لكن ده ما يمنعش ان الميدان رغم تفتيته اجتمع على :
- رحيل العسكر
- رفض ترشيح الفلول فى منصب رئيس الجمهورية
و الثوار طالبت بالاتى :
- رحيل العسكر
- رفض الانتخابات الرئاسية تحت حكم العسكر
- رفض كتابة الدستور تحت حكم العسكر
- القصاص للشهداء
المشاركات
ليست هناك تعليقات:
إرسال تعليق