لاع يعنى نو NO

لاع يعنى نو  دايما كانت باقولها ..

لما حد يوقفلى شغلى عشان أديله رشوة ، كنت أصرخ فى وشه : لاع

لما حد يظلم حد ؛ مستغلا ً منصبه ، و كل إللى حواليه واقفين يتفرجوا ، كنت أقولهم : لاع لا ع لاع

لما حد كان يحاول يشوة صورة حد كنت بأدافع عن اللى غايب و اقول فى وش اللى بيشوه :لاع ، انت ما عندكش ولاية

mais ca ne vaut pas dire que je suis Kingkong

No Jamais

لكن ده مش معناه انى كينج كونج .. ده انا كان بيطلع عينى و عين السادة الأفاضل اللى اتكرموا و اتعطفوا و جابونى للدنيا ... و كان طلعان العين  له طابع مختلف عن أى طلعان  ، كان كل طالعة و التانية ولا طلعة سواق غشيم على الصحراوى ساعة القيالة ، و كانت الحالة دى بتخلى "لاع" إللى باقولها بتلعلع بس ما بتلعلعش غير على العبد لله ، لحد ثورة 25 يناير إللى كشفت كل فساد و أى فساد ... كنت طول عمرىح تجنن من حجم الفساد إللى مالى بلدنا ، لنى حاسة انى لوحدى ، لكن يوم 25 يناير لقيت كل البلد معايا ومن اول يوم للثورة بدأت لاع تأخد أجازة ، لأنى كنت موافقة على كل انجازتها 

لحد  يوم 19 مارس قررت "لاع " تخرج من القمقم ، و كان ليه وقع مختلف .. أصل ده يوم الإستفتاء على التعديلات الدستورية .. و لأن القرار المرة دى بيحدد مستقبل مصر أم الدنيا مش بيحدد مصيرى انا و شغلى و حياتى و بس .. و بدأت أذاكر و افهم و أسمع عشان اعرف"نعم " ح تودينا لفين و "لا" آخرتها ايه

وبعد تلت ساعات من الوقوف فى طابور المواطنين المصوتين ؛ و مع صرخات بناتى الرضع تمكنت بحمد الله الوصول لأرض لجنة الإقتراع و مصافحة السيد صندوق اللجنة عبر وضع استمارة لإستفتاء فى فمه بعد ما قلت فيها  " لاع  و لاع  يعنى نو "

و ظهرت النتيجة و كانت " نعم "

و بدأ عقلى يرجع مارش أريار march arierreا

خصوصا لما الناس بدأت تقول : " مهما كانت نتيجة الإستفتاء ـ ف الفائز هو الشعب المصرى"

و عشان ما أقولش  " لاع " للجملة إللى فاتت ، لقيت نفسى بأقول

لاع يعنى نو : للاستعجال فى ان يوم الإستفتاء يبقى يوم 19 رغم عدم الترتيب الكافى لعملية الإستفتاء و إجراءتها .. و  ده  كان واضح وضوح الشمس للكفيف حديثا ، ف عدد اللجان و الصناديق و الموظفين و المراقبين و القضاة يتناسب و ربع محافظات مصر و الباقى المصوتين كانوا محتاجين  أجازة عارضة لحين توفير النجارين إللى ممكن يعملونا صناديق كفاية و بالمرة موظفين خشب ما يتعابوش من العدد الرهيب إللى وفد على اللجان .. لدرجة ان معاد وضع الإستمارات فى  الصناديق خلص و الإستمارات خلصت و الناس ما بتخلصش ، و كأن المواليد بتزيد فى طوابير الإستفتاء  .. و إللى خلص قب الصناديق و الإستمارات هو الموظف الغلبان إللى كان مكلف بتابة كل بيانات المصوتين لوحده و ما عندوش حد يناوله كباية ماية و لا لقطمة فاضية.

لاع يعنى نو : لوضع قضاة متوفين على بعض الصناديق .. هو صحيح ان سلو بلدنا ، اننا نذكر محاسن موتاكم ، لكن لما نعرف ان القاضى الفلانى ماجش اللجنة عشان مات ، تفتكروا ممكن نذكره بإيه ؟!!! خصوصا بعد تخليه عن بلدنا فى ظروف زى ديه ، ممكن نغفرله غلطته بحجة انه ميت ، لاع ، يلعب غيرها

لاع يعنى نو : ان اصحاب الدقون و النقاب هما من ينظم دخول الناس و يحمل علبة مناديل ليهمس فى أذن كل داخل " نعم " ان شاء الله .. و انت لو كنت من حزبه ح تقول طعا ان شاء الله ، و لو من حزب أما نعيمة ح تقوله " نعمين " .. و انت لو من حزب لاع ؛ ح تقول لنفسك  لو كنت أعرف ان ده يونيفورم المنظمين ، كنت أركب دقن و أروح لأبوها أقوله أدى دقنى أهيه لو فلحتم .

لاع يعنى نو : اننا نلاقى دفتر لتسجيل المصوتين على الإستفتاء مرمى فى الشارع ، ليه هو دفاتر هلفوت ، فاكرينه دفتر من دفاتر الشوارع ، دفتر لقيط .. لاع و ألف لاع ، ده دفتر مأصل ، ده واحد من ابناء المجلس الأعلى للقوات المسلحة و مكتوب باسمه بحكم  شهادة الميلاد رقم17 لسنة 2011  طبقا لأحكام المادة (1) من المرسوم رقم (7) لسنة 2011 .. يعنى دفتر مأصل و من عيلة ، و زى  ما  حضرة الدفتر المحترم ما له أب ، له أم ، هى  السيدة  س.ف فكرى  : لاع مش فكرى انا ؛ ده فكرها هى .. كدة يا س. ف ، كان فكرك فين لما رميتى ضناكى فى الشارع و ولاد الحلال شالوه و حطوه فى الجامع ، لأ و سايبة كمان معاه رزمة من ورق الإستفتاء .. هو ده الأدب إللى رباكى عليه " ف " عبد الحميد ..و لو فرضنا ان ف.عبد الحميد ما عرفش يربيكى ما صعبش عليكى الـ 270 نفر إللى موقعين فى الدفتر  .. لو مش ح تظهرى يا "س.ف" و تعترفى عملتى كدة ليه ح نخلى حيطان اللجنة الفرعية رقم9/4 تشهد عليكى زى ما شهدت عليكى استمارات الإستفتاء و قالت انها جاية من لجنة مدينة نصر قسم اول و كان معها استمارات من لجان تانية زى 36/3 و 29 /3 .. دول يا أختى كانوا سايبين لجنتهم و رايحين يتفسحوا فين كدة فى نصاص الليالى .. و الصندوق المسكين إللى قاعد مستنيهم  يا ترى مين خد كانهم فى قلبه .. اكيد استمارات تانية ، و الشيطان منه لله بيقولى اناصحابهم ما كانوش ناوين يقولوا لاع ، ليه ؟!!!! عشان

 زى ما احنا عارفين " لاع يعنى نو "