البداية السريعة تعنى بداية العد التنازلى

البداية البدرى اوى دى تعنى بداية نزول المنحنى ... و تعنى ان العد التنازلى قد بدأ

....

 الناس بدأت تعد يا جنرال 

الناس على آخرها و لو  صبرت على التعديلات الاقتصادية مش ح تصبر على الظلم 

.. و الأم مش ح تصبر على قتل ولادها 

.....

الوضع يفرض نفسه بضرورة تغير عقيدة رجالك و منهجهم فى التعامل مع الناس 

الغلبان مش بلطجى 

و اللى باين عليه اثار الارهاق من الجرى ورا اكل العيش مش بلطجى

_________________

عندك قانون  لازم تلتزم بتطبيقه و إلا اصبحت انت البلطجى

لمونة الثورة بتدور بقالها تلت سنين

ثم دارت اللمونة
دورة كاملة......ثم داخت
ثم جه إخوانّا و لامونا
ثم ان الثورة باخت
ثم هما هما برضه
اللى باعوا الطول و عرضه
يصحوا يتخانقوا و يعارضوا
ثم إن الريحة فاحت
ثم مش نازلين معاكوا
ثم إن الجيش حمونا
ثم قال حنزل لوحدى
ثم دقن ف كل حتة
ثم يعمل مليونية
ثم يمشى الساعة ستة
ثم يعمل فيها عنتر
ثم ياخد علقة سخنة
ثم حيخزوقنا عسكر
ثم يطلع من نافوخنا
ثم دارت اللمونة
دورة اكبر ...ثم دخنا
ثم فجأة الكل يتعب
ثم إن الجيش حيقتل
ثم إحنا حمارنا يغلب
ثم جيم الدومينو يقفل
ثم مصر عاوزة زقة
ثم ناس ما تقولش لأه
يركبوا ع الثورة تانى
ثم نخسر.....ثم نكسب

الشاعر مصطفى ابراهيم

صفحة الشاعر مصطفى ابراهيم

ايها الثوار - ربنا يخيب ظننا و يسخره لخدمة البلد و يبهرنا

للثوار الشرفاء الذين يريدون كل الخير لمصر : لا تحزنوا

بكرة بلدنا ح تبقى أحسن ... صحيح دايما اللى على راسها  سايب نفسه لعبة فى ايد امريكا و بينفذ اوامرها و ما بيهتمش بمستقبل بلدنا ولا بشبابها  ... لكن برضه بكرة بلدنا ح تقوم

صحيح البدايات هى مقدمات للنهايات ... و البداية بتقول  ان كل الدنيا رصدت 9 مليون مصوت فى انتخابات الرياسة المصرية 2014.. إلا مصر و اعلامها رصدوا 26 مليون ناخب .. لكن بالهنا والشفا

صحيح اعجاز العسكر قدر يجمع بين النقيضين ، جمع بين  اللجان الفاضيه و الصناديق المليانه ....... لكن ده مش موضوعنا  ، لأن رصد معجزات العسكر كتيرة و لا تنتهى  و على رأسها علاج الكفتة

لكن متأكدة ان بكرة مصر ح تقوم .. لأن ضعف المشاركة فى الانتخابات و مقاطعة الشعب لها المفروض انها وصلت للجنرال رسالة ... المفروض انها قالت له الثورة فركة كعب منك .. ضعف المشاركة بتقول للجنرال خليك حذر .. اتعامل مع الشعب بحذر ...خليك فاكر ان الشعب اللى فوضك فى يوليو سحب التفويض  ايام الانتخابات .. لو ما اتحركتش فى اتجاه الشعب و حل مشاكل الناس ، الناس مش ح تتعاون معاك

لو اعتمدت اسلوب القمع مع الناس عامة و الثوار خاصة فالقمع مش ح يحل مشاكلك لكن ح يعقدها .. القمع  ح يشحن الناس ... لو اتبعت نظام تلفيق التهم و تشويه السمعة لازم تعرف ان الظلم جند من جنود الله خلقه لتحقيق العدل فى الأرض .. يبقى من يعتمد على القمع و الظلم نهايته محتومة و ح تكون اسرع م اللى قبله

لو القطاع الأمنى فضل يصورلك ان كل المعارضة اخوان و طاح فى الناس و بدأ يقتل و يحبس الناس ؛ ظلم ... اعرف انك بتظلم نفسك و بتكتب نهايتك - لو صدقتهم و ما طهرتش مؤسستك -

افتكر دايما انك معاك:

-        المؤسسة العسكرية - الجيش .

-        الشرطة و . أمن الدولة

-         القضاء .

-        المخابرات العسكرية والمخابرات العامة .

-         الاعلام .

-        معاك مجلس الشعب اللى غالبا انتخاباته ح تكون شبه الانتخابات الرئاسية ... و طبعا ح يدولك كل  الصلاحيات    اللى ح تتحول لصالحيات مطلقة  ماحدش ح يدفع تمنها غيرك.

لكن كمان افتكر انك من غير الشعب ، كل مؤسساتك و افرادك ح تنقلب عليك .. ارجوك ما تنساش ان الانتخابات و ارقامها مجرد خيال علمى ... و الأرقام الحقيقة شبه انتخابات مجلس الشورى .
 لكن كمان ممكن تصدق ان قدامك فرصة ذهبية ... و انك ممكن تبدأ من جديد مع شعبك .. تحتويه .. وتطمنه ... تطمنه بحل مشاكله مش بالكلام الناعم و الفح ... الناس مش ناقصة وعود .. الناس محتاجة تنفيذ و حلول للمشاكل .. وقتها بس ممكن يصدقوك و يشاركوك المسئولية .

ارجوك خيب ظنى وتوقعاتى فيك

____________________________________________

رسالة لكل اخوانى مصر يستحمر:
المقاطعين للانتخابات هما اللى سحبوا التفويض..وطبعا انت ما فوضتش من الاول .. فما تنسبش لنفسك فضل المقاطعة ... و ان كنت ناوى تندس بين المعارضة يبقى تلتزم بالسلمية و تنسى الجماعة و تفتكر انك مصرى هدفك مصلحة البلد ... لا التنظيم و لا من يمولون التنظيم

______________________

رسالة للمنبهرين بنتيجة الانتخابات : انا منبهرة من انبهاركو .. مش فاهمة اتفجئتوا بايه ؟؟ ما تعرفوش انها مسرحية من الأول  .. ابهار العالم ايها المنبهرون عمره ما كان بالرقص والطبل قدام اللجان .. الابهار الحقيقي هيحصل لما تتحقق العدالة الاجتماعية ونقضي علي الفساد ونحقق العدل و نساير التقدم العلمي .. ده لو حضرتك عايز تنبهر .. ... الظريف بقى ان ماحدّش ح ينبهر خالص لمّا يشوف الموازنه العامه بتاعه السنه دي ... ده لو الرقص و السهوكه عملك انبهار ، ابقى كلمنا عن انبهارك بسبب الموازنة العامة للدولة

 ..... و نصيحة اخيرة للمنبهرين : اللى يفرح بالنجاح بالغش يبقى مش طبيعى 

.. فلا تخسروا أنفسكم حتى لو تظاهرتم بالنجاح ... الصدق ابقى ايها المنبهرون

_________________________

و اخر كلامى للثوار ..  الثوره ندا .. بيسمعه الشعب و بتجمعه ... و اللى ح ينزل يبقى سمع الندا .. و رغم انى حاسة اننا قريب راجعين تانى ... لكن يمكن ربنا يخيب ظننا و يسخره لخدمة البلد و يخليه يبهرنا بجد مش بالاعلام الكداب

يمكن ربنا يخيب ظننا و يسخره لخدمة البلد و يخليه يبهرنا بالافراج عن المعتقالين بسبب قانون التظاهر ... و يلغى قانون التظاهر ويلغى  المحاكمات العسكرية للمدنيين

سمر العـزب

رد فعل الصحف الاجنبيه للمسخره اللى حصلت فى مصر - انتخابات 2014

رويترز :

اللجنة العليا للإنتخابات تمد التصويت ليوم ثالث لإنقاذ السيسي .

CNN :

اللجان الانتخابية المصرية خاوية .. وأعداد رجال الجيش والشرطة داخل المقار الانتخابية أكثر من الناخبين

.
فوكس نيوز :

الإعلام المصري صنع بطلا من ورق ؛ والمصريون لا يثقون في الصندوق

.
الجارديان :

الدولة المصرية تنقذ السيسي بمد التصويت ليوم ثالث .. وصباحي يقرر سحب المندوبين واعلان الانتهاكات والتجاوزات والمخالفات

.
المصري اليوم :

مصر تبحث عن صوت

الإندبنت :

مقاطعة الشباب المصري لا تبشر بالخير .. هل ينتوون القيام بثورة ثالثة ؟

.
BBC :

فشل كل محاولات اللجنة العليا للانتخابات المصرية لتصدير صورة مشرفة للانتخابات .

تقارير وفود المراقبة تتناقض .. وفود الدول العربية تجامل النظام المصري .. والاتحاد الأوروبي يلتزم الصمت ويتابع بترقب وحذر !!

من شواهد ان الناس قاطعت الانتخابات و رفضت الإجراءات اللى قام بها النظام : 
- فرض غرامة قيمتها 500 جنية

-        تهديد الموظفين

-         مولات  تم قفلها

-         اغراء الناخبين بنشر سيدات و آنسات ترقص علي عربيات بتلف في الشوارع و توزيع ميه معدينة

-        مد فترة التصويت  ثلاث ايام بعد من يومين

-        القبض على مندوبين حمدين صباحى و تعذيبهم

الشعب عاوز رئيس يحترمه و يصدقه مش يخاف منه ... زمن الخوف انتهي ... لكن العباء لا وطن له

القبض على أعضاء حملة صباحي في "الأميرية" .. قال انتخابات نزيهة قال

القبض على أعضاء حملة صباحي في "الأميرية"
====================================
ألقت الشرطة الليلة القبض على 14 من أعضاء حملة المرشح الرئاسي حمدين صباحيفي مناطق المطرية وعين شمس والأميرية عقب انتهاء اجتماع لهم بمقر الحملة بالمطرية.

وفوجيء اعضاء الحملة اثناء استقلالهم سيارة ميكروباص، باعتراض طريقهم من أفراد المباحث المسلحين ، وأجبروا سائق الميكروباص الى التوجه الى قسم الأميرية ، وفى القسم وجهت لهم الشرطة تهم قطع الطريق والتظاهر وسب الداخلية .

وتطالب الحملة بالافراج عن اعضائها وتندد باستهدافهم من قبل قوات الشرطة

يذكر أن من بين المقبوض عليهم:

1. جهاد محمد

2. محمد عبد العزيز

3. محمد عبد العظيم

4. محمد احمد عبد الونيس

5. اسلام

6. أحمد تهامى

7. كريم محمد

8. ابراهيم مدكور

9. محمد مفتاح

10. مينا جرجس

انقذوا عبد الله الشامي و محمد سلطان

انقذوا عبد الله الشامي و محمد سلطان!
------------------------------------------------------
دي صفحة الشكاوى بتاع المجلس القومي لحقوق الانسان اكتبولهم يتحركوا لانقاذ عبد الله الشامي و محمد سلطان
http://www.nchregypt.org/index.php/complaint.html

مع التنويه ان موقع المجلس القومي ممكن يقولك صقحة الشكاوى error
جرب ده:
ادخلوا على الموقع http://www.nchregypt.org/ دوسوا على "مكتب الشكاوى" بعدين انزلوا لاخر الصفحة تحت و دوسوا على "تسجيل شكوى"

لو مانفعش ممكن تكلمهم تقولهم شكوتك بنفسك على تليفون مكتب الشكاوى
رقم هاتف (مكتب الشكاوى) 37610638 202+

رقم الفاكس (مكتب الشكاوى) 37624229 202+

اعملوا دوشة ... عبد الله الشامي و محمد سلطان في خطر

و دي معلومات عن الشابين 

https://docs.google.com/forms/d/18rgXCouHcc6YTbAqOuxvBRl7sdNLH11kx6iDKSo-fkg/viewform

التزوير على ودنه - فى اول يوم مافهوش حضور

زورنى اكتر زورنى

الثورة بكرة تنورنى

_________________________

ما تزورينى يا ماما ، اوام يا ماما

ده السيسى ح يآخدها بالسلامة يا ماما

سامعة - الثورة جاية على علشانه

شايفة - كلبش ماسك ف ودانه

مخلوع مخلوع

اهو ده الموضوع

مخلوع يا ريس

جاى بتزوير