للى عايز يقبل اعتذار الخنازير - يروح يقرا التاريخ

الحُر .. حُر .. مهما يدوق الشقا والمُر
ليه أنخ و ليه اطاطى .. وانا سلاحى تحت بطاطى


يا مشير دول جنودك .. عاوزين نعرف فين حدودك
يا مشير يا مشير .. على شرفنا احنا بنغير


يا سفير إسرائيل .. مصر خلعت العميل 


دى كانت هتافات الشباب عند السفارة الملعونة

ـــــــــــــــــــــــــــــــــــــــــ

مين ده إللى ح يقبل اعتذار .. و بأى صفة و بأى ذمة و بأى دين .. ده القاتل مش بس عتيد فى الإجرام ، لأ ده عدو من يوم ما ظهر على وش الأرض .. عدو للبشرية كلها بشكل عام و لمصر بشكل خاص 

هى لسة حكومة الثورة مش فاهمة يعنى إيه ثورة ؟ و لا عارفين الثورة ليه قامت ؟؟ قامت يا حضرات عشان ترجع لكل مصرى كرامته ، ثورة بتأكد على ان دم المصرى غالى .. ثورة ضد أى حد ممكن يهين أى مصرى فى أى مكان

و الموقف اللى مش مفهوم هو موقف المجلس العسكرى ، دول ولادك  إللى اتقتلوا على الحدود ، انت اكتر واحد كان لازم تدافع عنهم ، و تأكد على الجميع ان دم ولادك مش رخيص .. بتقبل الإعتذار ليه ؟ هى الجريمة دى حصلت غلط و لا عامدة متعمدة و متكررة … إزاى تقبلوا تحاكموا المدنيين فى محاكم عسكرية لمجرد انهم انتقدوكم  انتقاد يعنى شوية كلام طار فى الهوا شاشى .. و إزاى  تتهانوا مع العدو الرسمى الشرعى إللى انت شغلتك فى الحياة الوقوف قصاده و التصدى له  … إزاى تحكم على المدنيين بالسجن  بتهمة إهانة المجلس العسكري ، طيب هو قتل جنودنا على الحدود مش اهانة للمجلس

و بعدين هو حد طلب منك تدخل فى حرب ، عشان ماحدش يطلع يقولنا احنا مش مستعدين لحرب ، احنا كل إللى طلبينه هو طرد الكلب .. اطرد الكلب   واستدعى سفيرنا المصري .. استخدم كارت التصعيد الدبلوماسي لتعديل بعض ينود اتفاقية كامب ديفيد بشأن انتشار القوات المصرية في سيناء  ، حماية لك و لولاد ، بلاش حافظا على كرامة الشعب إللى انت مش معتبر نفسك منه

تانى باقولها و ح افضل أقولها لحد ما أموت : دماء شهدائنا مش رخيص   ، و مش ح يروح هدر .. ماحدش يستهون بالمصريين ، احنا شعب طيب لكن عنده كرامة ، و يا ويل إللى يحين كرامتنا .. و كلامى للجوة و للى برة .. ماحدش يستهون بالإرادة الشعبية ؛ هى الأولى بخضوع لها، و ماحدش يقولى أمريكا و سيط و ح يعلم الصهاينة الأدب .. روحوا اقروا التاريخ يمكن تتعلموا منه حاجة

دم ولادنا إللى حموا الحدود فى رقبة  المجلس الأعلى للقوات المسلحة ورئيس مجلس الوزراء .. 

هو الاعتذار إللى ح تقبلوه بخصوص أى جريمة من تلاتة :

• ح تقبول اإعتذار عن الإتهامات الباطلة إللى قالها عنك و ادانك بيها قدام المجتمع الدولى ، و ادعى بالكذب انك اتوغلت فى اراضيه
• ولا ح تقبل الإعتذار  عن دخول الصهاينة أرضك بدون وجه حق 
•  و لا ح تقبل الإعتذار عشان ضرب جنود و قتلهم  ؟؟

يا ريت تشوفوا تقرير " أو إف إم " إللى بيرصد مخالفات الكيان 

الصهيونى عند العلامة الدولية 79 الموجودة بمنطقة النقب بوسط سينا


ـــــــــــــــــــــــــ

و يا إللى عندك كرامة و كرامتك وجعاك لدرجة خلتك تقبل الإعتذار ، تقدر تقولى  شكله إيه الإعتذار إللى ممكن يعوضنا عن مواطن مصرى بيحب بلده ؟؟؟؟؟... شكله إيه الاعتذار إللى قادر يعوضنا تمن الدم إللى سال من غير ذنب غير الغل و الكراهية ؟؟؟؟ ... قيمته إيه الإعتذار من كيان متسلط متبجح 


ويقولك معلش تقبلوا الإعتذار المرة دى ، لاممكن اعتذارهم ينزل الأرض أبدا  و يعيشولنا درو " عبد الفتاخ القصرى فى فيلم  ابن حميده " .


و لما تحب تناقش إللى رضى و قبل الإعتذار يقولك : " نحن لم نقبل الاعتذار من الكيان الجاهل المتغطرس ، نحن لا نعول عليه ، احنا نعول على الطرف بتاعتنا و هو امريكا "


الأوامر بقت بتجيلك رسمى م امريكا .. هو ده القانون إللى كان ماشى عليه المخلوع و انتوا لسة بتطبقوه ، يقولك لأ دى أمريكا ح تضغط على اسرائيل ... هاهاها ، ده مين العبيط إللى مكن يصدق حاجة زى كدة ، و احنا عارفين ان فى انتخابات رئاسية فى امريكا و المرشحين على استعداد لمسح جزم اسرائيل مش لضغط عليها

ــــــــــــــــــــــــــــــــــــ

المصريين يتظاهرون امام سفارة الكيان الصهيونى

بقى  الصهاينة يقوموا الدنيا من سنة 2006م و لحد دلوقتى عشان "جلعاد شاليط " ، و قصاده قتلوا 13 مصرياً و 2 ظباط وأصابوا العشرات، غير الذين سبقوا منذ عام 2000م  

و آدى بيان باسمى الشهدا إللى اصابهم رصاص العدو

• نوفمبر 2000 أصيب مواطن مصري يدعى سليمان قمبز وعمته برصاص إسرائيلي حينما كانا يجمعان محصول الزيتون بميدان صلاح الدين برفح سيناء
• أبريل 2001 أصيبت سيدة مصرية بطلق ناري إسرائيلي أثناء وجودها بفناء منزلها القريب من الحدود مع غزة في مدينة رفح سيناء
• أبريل 2001 قتل شاب مصري يدعى ميلاد محمد حميدة برصاص جنود إسرائيليين عندما حاول الوصول إلى غزة عبر بوابة صلاح الدين في رفح سيناء
• مايو2001 أصيب مجند مصري يدعى أحمد عيسى برصاص إسرائيلي عندما كان يؤدي عمله على الحدود في رفح بِ شمال سيناء
• مايو2001 أصيب مواطن مصري يدعى زامل أحمد سليمان (28 عاما) بنيران إسرائيلية في ركبته أثناء جلوسه بمنزله فِي رفح سيناء
• يونيو 2001 قتل مجند يدعى السيد الغريب محمد أحمد بعد إصابته بأعيرة نارية إسرائيلية في الحدود الفاصلة بين مصر وإسرائيل
• سبتمبر 2001 أصيب ضابط مصري برتبة نقيب يدعى عمر طه محمد (28 عاما) بطلق ناري وعدة شظايا في الفخذ اليسرى بنيران إسرائيلية برفح
• نوفمبر 2001 أصيب ضابط الشرطة المصري الرائد محمد أحمد سلامة بالرصاص الإسرائيلي أثناء دورية له في منطقة الحدود برفح
• ديسمبر 2001 أصيب الشاب المصري من أهالي رفح سيناء محمد جمعة البراهمة 17 عاما في كتفه بطلق ناري إسرائيلي
• فبراير2002 أصيب الطفل فارس القمبز (5 سنوات) بشظية نيران إسرائيلية في فخذه أثناء لعبه وحده بفناء منزله في رفح سيناء
• نوفمبر 2004 دبابة إسرائيلية تقتل ثلاثة جنود مصريين على الجانب المصري برفح على الحدود مع غزة
• ديسمبر2007 قتل المجند المصري محمد عبد المحسن الجنيدى بطلق ناري إسرائيلي في رفح سيناء على الحدود مع غزة
• يناير 2008 قتل المواطن حميدان سليمان سويلم (41 عاما) من رفح سيناء برصاص إسرائيلي أثناء ذهابه لعمله
• فبراير 2008 قتلت الطفلة سماح نايف (14 عاما) برصاص القوات الإسرائيلية أمام منزلها على الحدود قرب معبر كرم سالم
• مايو 2008 قتلت القوات الإسرائيلية المواطن سليمان عايد موسى (32 سنة) بحجة تسلله داخل الأراضي الإسرائيلية قرب كرم سالم
• مايو 2008 قتل عايش سليمان موسى (32 عاما) برصاص الجيش الإسرائيلي عند منفذ العوجة
• يوليو 2008 قتل الضابط بالجيش المصري محمد القرشي بنيران القوات الإسرائيلية برصاص إسرائيلي على الحدود
• سبتمبر 2008 قتلت القوات الإسرائيلية المواطن سليمان سويلم سليمان (26 عاما) من منطقة القسيمة بوسط سيناء بحجة أنه حاول التسلل
• ديسمبر 2008 قتل فلسطيني وضابط مصري في تبادل لإطلاق النار عند معبر رفح بعد محاولة العشرات من سكان غزة اقتحام المعبر هربا من قصف إسرائيلي، وقالت مصر إن الضابط قتل برصاص حركة حماس.
• أغسطس 2009 قال الجيش الإسرائيلي إن جنوده أصابوا بالرصاص جنديا مصريا بعد أن ظنوا خطأ أنه "عدو يحاول التسلل عبر الحدود"

بيان حركة ثوار ماسبيرو حول ترقية رجال صفوت الشريف و أنس الفقى على يد اسامة هيكل

بيان حركة ثوار ماسبيرو

تعلن الحركة عن رفضها التام للعبة الكراسى الموسيقية "أو  ما أسماها وزير الاعلام " حركة تنقلات وترقيات باتحاد الإذاعة والتليفزيون" حيث إن ماحدث اليوم  هو التفاف واضح وصريح على  مطالب التطهير والتى نادى بها ثوار ماسبيرو منذ اليوم الأول.

كما هو التفاف واضح وصريح  ايضا على ما أعلنه ر ئيس الوزراء من  تطهير مؤسسات الدولة من رموز الفساد، بداية من الاعلام وهو مالم يحدث على اطلاقه.

          إن التغيرات التى حدثت اليوم جاءت مخيبة تماما للآمال ومخالفه لما وعد به وزير الاعلام فى مقابلاته مع بعض أعضاء حركة "ثوار ماسبيرو"، حيث أعلن لهم عن نيته إجراء حركة تغييرات جذرية وشامله فى قيادات ماسبيرو ولكن من الواضح أنه كان يرمى بهذه الأقوال إلى تهدئة الثوار ولم تكن هناك نية حقيقية لهذا التغيير.

          لذا نحن نرفض وبشده  أن يظل ماسبيرو رهن  قيادات أثبتت فشلها مرات ومرات وساهمت بشكل او بآخر فى افساد الحياة المهنية ، وافساد الذوق العام وتردى مستوى ومحتوى الخطاب الاعلامى فى السنوات الماضية.

كما أنها قيادات بعيدة كل البعد عن نبض الثورة المصرية العظيمة والتى ضحى فيها الشعب بالدم والشهداء من أجل اسقاط نظام فاسد جثم على قلوبنا ثلاثين عاما وللآسف مازلت ذيوله وبقاياه ترتع فى جهازه الاعلامى الوطنى

لذا فنحن حركة ثوار ماسبيرو  نعلن أن الحركة مازالت على عهدها ولن تهدأ بالا حتى يتم تطهير هذا المبنى من كل رموز الفساد وبقايا الحزب المنحل  ممن أفسدوا الحياة الاعلامية المصرية ، وأضاعوا تاريخ هذا المبنى العريق وأبعدوا المواطن المصرى عن اعلامه الوطنى .

وتدعو الحركة كل الشرفاء من أبناء ماسبيرو إلى الاعتصام أمام مكتب وزير الاعلام وذلك يوم الأحد فى الساعه الواحده ظهرا للإعلان عن رفضهم لهذه التغييرات.

عاشت ثورتنا مستمرة

حركة ثوار ماسبيرو

القاهرة

18-8-2011

الحلقة 13 من مسلسل الحاجة ايفون - اسر الشهدا عند مسرح البالون

تختلف حلقة النهاردة عن باقى الحلقات السابقة ، لأن زينب و ايفون ماكنوش عايزين يدخلوا بصدم بأى شكل و لا يأى توع مع أى جهة من الجهات ، لكن خوفهم على ولادهم اضطرهما للنزول معهم و شاهدوا بأنفسهم ماساة أسر الشهدا إللى حصلت عند مسرح البالون .. لكن الموقف تصاعد بزينب و ايفون و قرروا " كلاكيت تانى مرة 25 يناير "




الحلقة 13 من مسلسل الحاجة ايفون - اسر الشهدا عن..., posted with vodpod

اسماء محفوظ بيتحقق معها عشان الفيس بوك و التويتر و كان ردها حققوا مع الروينى

خرجت أسماء محفوظ النهاردة بالليل بعد تحقيق استمر تلت ساعات ، و خرجت من النيابة بالليل بعد دفع كفالة قدرها 20 ألف جنيه فى القضية رقمم 55 لسنة 2011 ادارى عسكرى .. وقالت أسماء ان التحقيق معاها كان بسبب بلاغ مقدم من المجلس الأعلى للقوات المسلحة ضدها، يتهمها بسب المجلس، والجيش، والمشير طنطاوي، واللواء حسن الرويني قائد المنطقة المركزية.


اثناء التحقيق مع اسماء كانت الواقفة الإحتجاية بالخارج و المتضامنة مع اسماء تهتف و بتقول " مش ماشين ، مش خايفين .. هاتوا الشرفا م الزنازين "

ده إللى كان برة النيابة ، جوة النيابة بدأت التحقيق مع اسماء و اشرف على التحقيق مع أسماء ظابط برتبة عقيد في القضاء العسكري و كانت كل الأسئلة بتركز على تصريحات أسماء بعد موقعة العباسية، والتي اتهمت فيها المجلس العسكري بالتخاذل عن حماية المتظاهرين والتواطؤ مع البلطجية، وأكدت أنها تعهدت بتسليم النيابة العسكرية «سيديهات» تثبت كل ما تقول ، كما طلبت التحقيق في بلاغات حركة 6 أبريل ضد اللواء «الرويني».

أما عن الإتهام إللى بيقول ان أسماء دعت لعمليات مسلحة و«زعزعة الأمن العام» ، أكدت أسماء ان الإتهام ده مالوش أى أساس  من الصحة، وأنها كانت بتحذر المجلس العسكري من أن «سوء الإدارة وغياب العدالة سيؤديان إلى الفوضى

 الغريب ان كل التهم المنسوبة لإسماء كانت  معتمدة بشكل أساسي على كتابتها على «فيس بوك» و«تويتر»... و هى الصفحة الشخصية على الفيس بوك و التويتر تعد أدوات تهم ؟!!!! و لا ده التطوير السريع للحاجة الصاقعة ؟!!!

وعن اتهام أسماء بسب اللواء حسن الرويني واتهامه بـ«الكذاب»، رد اسماء قائلة : " إن«الرويني» نفسه اعترف بذلك،  في برنامج «صباح دريم» إنه كان «يطلق شائعات عن القبض على رموز النظام لتهدئة ميدان التحرير أثناء الثورة»، مشيرة إلى أنه اتهم شباب الثورة بـ«البلطجة».

وأضافت أنها طالبت النيابة العسكرية بسرعة التحقيق في البلاغات المقدمة ضد «الرويني»، والتي تتهمه بالتحريض ضد المسيرة السلمية التي حاولت التوجه إلى المجلس العسكري وتعرض المشاركون فيها لاعتداءت من بلطجية في العباسية بعد إعلان «الرويني» في وسائل الإعلام أن المتظاهرين «يحملون زجاجات مولوتوف ويريدون تخريب المنطقة».

أكدت أسماء محفوظ انها مش خايفة، ومش ح تسكت، و تفضل  تنزل للشارع، و ح تفضل تنتقد أى خطأ ح تشوفه ،  وأكدت أنها تعهدت بتسليم النيابة العسكرية «سيديهات» تثبت ذلك، كما طلبت التحقيق في بلاغات حركة 6 أبريل ضد اللواء «الرويني».

و المفروض أن القضاء العسكري يحدد معاد لمحاكمة اسماء خلال 15 يوماً ، لكن مش ده إللى شاغل اسماء لكن إللى لفتت نظرها هو الكلام إلى قاله بعض ضباط القضاء العسكري قالوا لها خلال التحقيق إن «مبارك كان ضعيفا، وفيه ناس في الشعب ما بيحسوش وما ينفعش التعامل معاهم إلا بالمحاكمات العسكرية، ومش هتقدروا تغيروا حاجة».

الثورة مستمرة على التويتر و الفيس بوك رغم ان من ضمن الاتهامات الموجهة لإسماء محفوظ انها كتبت على التويتر

إللى يشوف تويتت غيره تهون عليه التويتة بتاعته

كان يا مكان يا سعد يا اكرم بيقولك انك ممكن تتحبس بسبب فكرة تكتبها على فيسك ، فالفكرة تطلع من على البوك و تلطشك على  فيسك أى وشك .. و يا سلام لو كنت بتكتب على التويتر ح تتقفش يعنى ح تتقفش .. كله يآخد سات من التويتر  و  كلمة السر أسماء محفوظ اللى بتتحاكم بسبب توتة كتبتها 


ـــــــــــــــــــــــــــــ


معروف ان الشباب المصرى عنيد فضرب الخوف علقة سخنة و قرر مواصلة المعركة عن طريق تويتر .. و الثورة مستمرة و برضه لسة شعارها سلمية فكهاية و شك فى الحيط يا ابو صباع و قفاك ليا 


رغم ان النشطاء السياسين و الثوار و المتضامنين مع اسماء محفوظ و المتعاطفين معاهم قدروا يجمعوا الكفالة المطلوبة لإخراج أسماء من النيابة لكن ده ما منعش أن معظم الشباب على الفيس بوك و التويتر يكونونا مستكترين قيمة الكفالة إللى دفعتها "اسماء محفوظ " و بيقارنوا بينها و بين كفالة عائشة عبد الهادى المتهمة في قضية موقعة الجمل .. و آدى سيل التديونات على المواقع الإجتماعية :

1.   يعني أيه كوكاكولا زيرو .. كفالة عيشة عبد الهادي 10 الاف جنيه في موقعة الجمل .. وكفالة اسماء محفوظ 20 الف جنيه في تويتات على تويتر .
2.  كلنا نجمع العشرين الف جنيه كفالة شلنات قديمة و نبعتهم للمجلس علشان يعدوهم
3.   متأكد جملة زي دي إتقالت في التحقيق كفالة 20 الف جنيه؟ .. بمناسبة ايه؟ .. بمناسبة التمويل الخارجي اللي بتاخدوه يا ولاد الـ.. ’’
4. المجلس أول ماتعلم تويتر شاف تويتايه وعمل استدعاء للي كاتبها. . يا مصيبتنا  أول مايتعلموا يعني ايه هاشتاج
5. هو اللي يتوت ضد المجلس بيتم استدعاءه ويدفع عشرين الف كفاله.. طيب اللي ريتويت إيه نظامه؟؟ .
6. نشكر المجلس العسكري رضي الله عنه لأنه بيحمي الثوار بوضعهم في السجن الحربي عشان يضمن لهم حياة أفضل .
7. أنا أتضامن مع كل مدني يحاكم عسكريا حتى لو كنت مختلفا معه, أكلنا يوم أكل الثور الأبيض .
8. التويتر والفيس بوك مواقع للتواصل الاجتماعى بين النشطاء السياسيين والنيابه العسكرية... هو ده التطور الطبيعى للحاجه الساقعه
9. الشعب يريد دعم الكفالة
10. - هى أسعار التويتة الواحدة إيه اليومين دول يا ميشو
11. - شكرا لفرقة ابو صباع إللى بتأكد ان الشعب هو السيد : السيد احمد عبد الجواد
12. - قال الملك المشير .. لعصام شرف الوزير .. ائتني بألف بعير .. قال له مافيش غير بتوع ستة أمشير .. اللي كانوا عاملين دوشة في التحرير .. قال الملك المشير .. مش دول اللي خلعوا مبارك الراجل الأمير ؟؟ .. دول لازم يتعلقوا و يتضربوا بالجنازييي ير .. و هنا أدرك شهرزاد الصباح .. فسكتت عن الكلام المباح .. و فضل الكلام بعد كده غير متاح ولا مباح .. و إحنا آسفين يا صلاح....
    .منقول... وده علشان ماندفعش الغرامه مش للأمانه
13. عسكر شاكله مش راجع المعسكر .. و سلملى على هنيدى
14. التسعيرة الجديدة :
    تويت = 20000
    ستاتيوز = 15000
    عدد 2 تويت + 3 ستاتيوز = 25000 فقط
    أو يمكنكم الحصول على خصم خاص على الباقة الشهرية
15. لثوار حائرون.. يتسائلون.. هل العسكر باقون... أم سيرحلون.. وان كانوا قاعدون فهل على حلل تيفال سيلتصقون. أتعرفون الرد ايها الفيسبوكيون
16. تفتكروا مين إللى حمى الثوره(بفتح الحاء) أو ( بضم الحاء وتشديد الميم ) أو بمناسبة المصايف وهوا المصايف (بفتح الحاء وتشديد الميم ) !!!
17. و ماحدش جاب سيرة الريتويت ليه ، فين اسعار الـ Retweet ؟؟
18. الريتويت متوفرة فقط مع الباقة الشهرية ب 100000 فى الشهر بدون حد اقصى 
    * تطبق سياسة الاستخدام العدل و لمزيد من المعلومات يرجى الدخول على 
    Alsegn Alharbi.com

•  تميم البرغوثي في تدوينه له اليوم على تويتر قال :  التحقيق مع أسماء محفوظ عيب والغرض منه إخافة الناس
•   وائل قنديل الصحفي بجريدة الشروق في تدونه  كتب : أسماء محفوظ واحدة ممن قال فيهم المشير : الذين خرجوا يوم 25يناير ، نبت طيب من أرض مصر، تبنوا مبادىء سامية ونبيلة أكدت إحساسهم الوطنى ’’

بيان هام من حازم صلاح أبو إسماعيل بيقول فيه

" كلنا أسماء محفوظ وسيكون لهذا الأمر ما بعده إن شاء الله" 

تضامن مع اسماء محفوظ و لؤى نجاتى

النهاردة الساعة عشرة الصبح التحقيق مع اسماء محفوظ الناشطة السياسية و المدون لوئ نجاتى  ..

و ده بعد ان قررت النيابة العسكرية  استدعاء الناشطة السياسية أسماء محفوظ العضو بحزب التيار المصري للتحقيق ، الغريب ان مافيش  سببب واضح للاتهام و ده بحسب ما ذكر ائتلاف شباب الثورة إللى أكد أن الاستعداء جاء بصيغة تهديد من جانب الضابط الذي  قام بتسليم البلاغ لوالد أسماء و قال له '' لو عايز تعرف معلومات عن الموضوع تروح بكرة بدل ما تتعرض لمشاكل أكبر ''.

اضغط هنا للتضامن مع اسماء محفوظ ، ادخل و شير الصفحة من فضلك

و كمان لؤى نجاتى عنده تحقيق فى نفس اليوم لكن فى موضوع تانى يخص اسر الشهدا و أحداث البالون ، و مع انى كنت فاكرة ان نجاتى لما خرج من النيابة العسكرية بعد دعوات التضامن معاه كان خلاص كدة براءة ، لكن اتضح ان هو كمان مطلوب الساعة 28 " الساعة 8 فى س28 نيابات عسكرية

اضغط هنا للتواصل مع أخو لؤى او للدخول على صفحة التضامن مع لؤى نجاتى

 على الفيس بوك

للتضامن مع لؤى نجاتى

 و فى واقفة احتجاجية النهاردة الأحد 14 أغسطس الساعة عشرة الصبح '' س 28 نيابة عسكرية  '' للتضامن مع الناشطة أسماء محفوظ

بس فى حاجة غريبة حصلت ، الناس إللى مش قادرة تنزل الواقفة الإحتجاجية عشان ظروف الصيام ؛ بصوا عملوا إيه 

و إللى لقى خطه وحش راح اشترى ختم مكتوب عليه نفس الكلام .. حاجة غريبة ، حاجة غريبة - على رأى السيد عبد الحليم حافظ  فى أغنيته الشهيرة مع السيدة الجميلة صوت مصر الحقيقى : شادية

الحلقة 12 من مسلسل الحاجة ايفون - قولوا لأمن الدولة يرجعلى ابنى –

يرن التليفون فى منزل ايفون و تعتقد انه ابنها مجدى الذى اختفى فجأة و بدون اى مقدمات .. لكن المتصل هى الفرنسية صديقة رانيا و إللى عايزة تنزل مصر عشان تساهم فى تنشيط السياسة بعد الثورة ، لكن ايفون ترفض استقبال حد عندها فى بيتها لأن الضيفة لا مكان لها غير اودة مجدى .. هنا تتدخل زينب لحل الموقف الذى يتصاعد و يصل إلى ابواب مبنى أمن الدولة
اسمعوا الحلقة و قولنا رأيكم
مسلسل الحاجة ايفون للمخرج أيمن عبد الرحمن -- تأليف سمر العـزب -- بطولة سميرة عبد العزيز -- انعام الجرتلى -- فايق عزب -- منال سلامة -- ايهاب فهمى




الحلقة 12 من مسلسل الحاجة ايفون - قولوا لأمن ا..., posted with vodpod