تهمة اونطة يا أنيس العسكر - إلعب غيرها

تم تأجيل التحقيق مع شرفاء ماسبيرو إللى كان معاده امبارح الأربعاء 22 فبراير الساعة واحدة بالشئون القانونية برئاسة اتحاد الإذاعة و التلفزيون ... و خرجت الدعوات تدعو شرفاء الاعلام للتضامن مع شرفاء ماسبيرو الذين يتحقق معهم زوراًً و بهتانا .. و كانت الدعوة بالتظاهر فى الدور التامن برئاسة الاتحاد حيث تجرى التحقيقات ... و خرجت دعوات أخرى تطالب بالتظاهر امام ماسبيرو . ...

و فجأة و بدون أى أسباب تم تأجيل التحقيق مع شرفاء ماسبيرو و قالوا لهم خلونا على ميسدكول .. الأغرب ان أحمد أنيس قرر ان يستعين ببعض رجاله لينسب إليهم أمر تحويل شرفاء ماسبيرو للنيابة ... و قالك إيه ؟ قالك آه ، قالك قرب يا جدع  وشوف احدث تقليعات ماسبيرو فى تلفيق التهم .. قال إيه رئيس القناة الأولى بعت لرئيس قطاع الامن يقوله معلش متأسفين ما قدرناش نذيع حلقة برنامج "استوديو 27" عشان كان فى ناس وحشين متظاهرين قدام الأستوديو و خربوا و كسروا و حطموا الأخضر و اليابس .... قال رئيس القناة الأولى يعرف آخبار الأمن و يكتب بيها تقارير و يبعتها لرئيس قطاع الأمن .... و الأدهى و الأمر ؛ رئيس القطاع إللى عنده فى كل تواليت كاميرا ما يعرفش بعصابة القناع الأحمر المنتشرة فى المبنى .. و يا حينى اول ما وصله تقرير من مجدى لاشين رئيس القناة الأولى قhم فورا بتحويل التقارير للنيابة ؛ بس قبلها قام بتفريغ شرايط كاميرات الأمن الداخلى فى ماسبيرو و اكتشف اللهو الخفى إللى منع ظهور برنامج "استوديو 27" ، و طلع اساميهم  و بعتها للنيابة .... و طبعا مافيش حاجة اسمها ان المتظاهرين كانوا عايزين يطلعوافى البرنامج للمطالبة برحيل أحمد أنيس ، و لا اعترف مجدى لاشين انه خاف من ظهور صوت المعتصمين فى البرنامج  خصوصا و هما بينادوا برحيل احمد انيس عن ماسبيرو ، و الأكيد ان تقرير مجدى لاشين مافيهوش ان الجيش تهجم على المتظاهرين السلميين  ، و لا فى ان الأمن عطل الأسنسيرات عشان المتظاهرين ما يعرفوش ينزلوا من الدور 27 .... كل الأحداث دى مجدى لاشين ما كتبهاش فى تقاريره ، هو قدم اعتذار لرئيس الأمن عن عدم اذاعة حلقة من البرنامج .. يا حينى يا ولدى .

اول مرة اعرف ان رئيس الأمن مسؤل عن الخطة البرامجية للتلفزيون ... أول مرة أعرف انه لما برنامج يتعطل و ما يظهرش يروح للأمن اعتذار ... أول مرة أعرف ان الأمن ما يعرفش حالة الأمن جوة ماسبيرو و بيستنى تقارير رؤساء القنوات ... اول مرة أعرف ان المستشارين إللى فى المبنى بيآخدوا نص مليون جنية شهريا كل واحد على الفاضى و هما مش قادرين يسبكوا تلفيق قضية ضد ثوار و شرفاء ماسبيرو ... اول مرة أعرف ان المطالبة بتطهير الاعلام و القضاء على الفساد سبب من اسباب التحويل للنيابة

إلا إذا كان على رأس المؤسسة فاسد و يرى ان المظاهرات ضده هو شخصيا و صوتها لو طلع ح يمشى يعنى ح يمشى ... لأن بقائه سيعلن عن فساد إللى جابه و لسة سايبه فى مكانه

إلى من يهمه الأمر :
بيانات البلاغ المقدم من أنيس ضد ثوار ماسبيرو الين طالبوا بتطهير الاعلام
 المحضر فى نيابه بولاق أبو العلا الكلية
رقم المحضر إدارى397 لسنة 20122
رقم الحصر 103 لسنة 2012
رئيس النيابه على داوود
محرك الدعوه القانونية

علاء حافظ رئيس الشئون القانوية باتحاد الإذاعه والتليفزيون 

و اخيرا : سبحان الذى عفنا  وعفا شرفاء ماسبيرو مما ابتلى بيه قيادات هذا المبنى العجيب

للتعرف على انواع التهم الباطلة و الملفقة لشرفاء ماسبيرو - اضغط هنا -

للتعرف على شرفاء ماسبيرو الذين تظاهروا لتطهير الاعلام فحولهم أنيس العسكر للنيابة - اضغط هنا -

البينة على من ادعى يا أنيس العسكر

بيان مركز عين لحرية الاعلام يدين انتهاكات
احمد أنيس ضد شرفاء ماسبيرو

اسماء جديدة اضيفت إلى شرفاء ماسبيرو التى يلفق لهم أحمد أنيس تهم ما أنزل الله بها من سلطان

الأسماء الجديدة هى :

1.   المخرج ياسر الشربينى

2.   تامر جلهوم

3.   نشوى عاشور - مذيعة

4.   حازم الشناوى - مذيع

5.   مديحة الدسوقى - محررة بقطاع الاخبار

- اضغط هنا - لو عايز تعرف اول خمس اسماء ماسبيرو بدأ فى تلفيق التهم لهم

التهم الخرافية:

- قيادة المظاهرات

- التخريب

- الاستعانة بعناصر يسارية

- تكدير الأمن العام

- تعطيل استوديو 27

- خسارة مالية 35 الف جنية مقابل تعطيل اذاعة حلقة من برنامج " استوديو 27 "

كلها تهم تستحق ان يقف امامها التاريخ بالفحص و الدرس .. و ده ليه ؟!!! لأنه إذا عرف السبب بطل العجب

ف الكل يعلم ان الأوامر العليا فى ماسبيرو معظمها يكون شفويا ، و ده كان أهم أسباب إيداع أٍسامة الشيخ السجن انه نفذ اوامر عليا و لكنه ما قدرش يثبت انه كلف بيها شفويا .. و الحل الوحيد إللى كان ممكن ينقذه انه يقطع ودانه و يسبها للتحاليل و الفعص و القرص عشان تعترف بما وصلها من اوامر غير مسجلة إلا فيها

و دى اول رسالة بابعتها لكل من قرر ان يشهد الزور ضد شرفاء ماسبيرو .. شرفاء ماسبيرو الذين يطالبون بتطهير الاعلام و تظاهروا من اجل الحرية و العدالة الإجتماعية ، شرفاء ماسبيرو الذين تظاهروا من أجل القضاء على الفساد ... شرفاء ماسبيرو الذين تظاهروا من أجل رحيل أحمد أنيس أحد أهم اسباب تدهور الاعلام المصرى الحكومى و الخاص ، احمد أنيس احد ابواق الاعلام لبرلمان أحمد عز – ايوة حديد عز -

الرسالة التانية بابعتها لأحمد انيس رجل العسكر بماسبيرو المملوك للشعب المصرى لكن الظاهر ان الشعب اتزنق فى قرشين  قام  مأجر ماسبيرو قانون قديم لمن يرأس الحكم مهما كان لونه او شكله أو  حتى جنسيته : مصرى – صهيونى – هندى - ماليزى

رسالة إلى أنيس العسكر : البينة على من ادعى يا سيادة الانيس و بعرض الشرائط التى سجلتها كاميرات ماسبيرو سيتضحك ان كل التهم المدرجة فى قائمة الاتهامات باطلة ، و لن يتبقى منها غير شهادة الزور التى  ستطوق رقبة رجالك إللى يا ريت يحطوا صورة اسامة الشيخ قدام عيونهم لعل يكون فيها العبرة

البينة على من ادعى يا سيادة الأنيس ...  يعنى لازم تقدم الدليل على التهم الباطلة اللى بتحاول لصقها بشرفاء ماسبيرو و منها :

اول تهمة زور : هى تكدير الأمن العام .. هو  أنيس العسكر مايعرفش يعنى إيه الأمن العام ... هو كوريدور فى ماسبيرو يبقى اسمه الأمن العام ... امال فين المستشارين اللى عاملين ازمة مالية فى ماسبيرو و بيآخدوا كل واحد فيهم نص مليون جنية شهريا عشان تلفيق التهم للشرفاء .. ولا يمكن التهمة اسمها تكدير مزاج الأمن العام بالمبنى

تانى تهمة زور : الإستعانة بعناصر يسارية فى التظاهر .. و إللى ما يعرفش مين المقصود بالكلمة دى أحب أقوله ان سيادة النائب سعد عبود كان موجود فى ماسبيرو و انضم للمتظاهرين لما عرف انهم بيطالبوا بتطير الاعلام ....  نفهم من شكل التهم ان ملفقى التهم فى ماسبيرو ح يطلبوا من سيادة النائب يبقى معاهم ؟؟ و لا ضدهم ؟؟ ... و لأن سعد عبود نائب شريف و صاحب تاريخ فأحنا عارفين ح يكون مع مين

التهمة التالتة الملفقة : إللى ح تفضح تدليس  و كذب سيادة الأنيس هى " تهمة التخريب " .. يسعدنا عرض شرايط كاميرات الأمن بماسبيرو  ما يفيد تخريب أى شئ .. و لو الشرايط دى ظهرت يبقى المتهم الأول فيها هو رئيس قطاع الأمن .. لأنه دوره المحافظة على المنشائات .. فاحنا يهمنا نشوف الشرايط دى ...  ملحوظة : اى محاولة لتزوير أى شرايط ح تتكشف و ح تخلى شرفاء ماسبيرو يرفعوا عليكم قضية تعويض للضرر النفسى و الأدبى إللى ألم بهم

تهمة الزور الرابعة : تعطيل استوديو 27 ، و طبعا دى تهمة اتفه من ان الواحد يقول عليها باطلة و اى طالب فى كلية حقوق سنة اولى ح يكتشف انها كذبة و الدليل ان الأمن  ما قربش من استوديو 27 ، مما يعنى ان التظاهر كان سلمى و ما حصلش تعطيل من أى نوع ... و الشهود بيأكدوا انهم اتصلوا بمسؤلي البرنامج للظهور به و فضح انتهاكات أحمد أنيس فى المبنى  لكن مجدى لاشين خاف من ظهور صوت المتظاهرين إللى بيهتفوا ضد رئيسه .. يبقى الأولى بهذا التعطيل هو من امر باذاعة حلقة قديمة و رفض ظهور صوت المتظاهرين السلميين ، و ده ليه ؟؟؟ لأن ماسبيرو مش معترف انه ملك للشعب ، لأن قياداته لو عندها  القناعة دى كان سجل مع المتظاهرين و سجل مع انيس و ترك الأمر للى جاب أنيس يحكم فى الأمر سواء بالتفاوض مع المتظاهرين او برحيل سيادة الأنيس عن ماسبيرو


و هنا ممكن حد من مشجعى الدرجة ااتالتة يسألنى يا كابتن لطيف ، انت بتقول شهود ؟ شهود مين إللى ممكن تشهد مع شرفاء ماسبيرو ... ح أقولك باقى المتظاهرين ، أصل أنيس العسكر لفق التهم لعشرة بس و فى 200 لم يتم العبث بسمعتهم بعد .

-     التهمة الزور الخامسة : خسارة 35 ألف جنية بسبب عدم إذاعة حلقة من برنامج "استوديو 27" .... طبعا دى آخر نكتة ... و على العموم الفلوس دى يتكلفها من رفض اذاعة الحلقة ... و ان كنت ارى ان لا مبرر ان يدفع أى شخص أى شئ ، لأن البرنامج ما فيهوش اعلان عن حتى دوا صراصير ، لأن ماسبيرو هرب منه المعلنين بعد  ما .... ما انتوا عارفين ح اوجع دماغكم على إيه

البينة على من ادعى يا انيس العسكر ... و سياسة التخويف يا انيس العسكر لا تصلح مع الشرفاء ، لا تصلح مع الثوار اصحاب المبادئ فهم خلقوا من اجل احياء المبادئ و الموت لخدمة مبادئهم ...فهم لا يعرفون التنازل عنها مقابل أى شئ مهما كانت المغريات من منصب او مال أو سلطان

و اخيرا : سبحان الذى عفنا و عفا شرفاء ماسبيرو مما ابتلى بيه قيادات هذا المبنى العجيب ... و نصر الله شرفاء ماسبيرو من قدروا على قول كلمة حق عند أنيس ظالم

تهمة اونطة يا انيس العسكر - إلعب غيرها - اضغط و اقرا

تضامنوا مع شرفاء ماسبيرو إللى طالبوا بالتطهير فحولوا إلى النيابة بتهمة جرائم ضد الأمن القومى

تضامنوا مع شرفاء ماسبيرو إللى طالبوا بتطهير الاعلام فتم تحويلهم إلى النيابة بتهمة جرائم ضد الأمن القومى

قبل ان يمر اسبوع واحد على مظاهرة الإعلاميين الشرفاء و معظمهم من القناة الثالثة و قطاع الأخبار و قطاع الانتاج و اقلية من الاذاعة لفقت لهم القضايا و تم تقديم بلاغ  ضدهم عند النائب العام 

و لأنهم وقفوا يهتفون داخل ماسبيرو و يطالبون بتطهير الاعلام و القضاء على الفساد المتحكم فى ماسبيرو بشكل فاضح ، كما تظاهروا مطالبين بحرية الاعلام و تنفيذ قواعد العدالة الاجتماعية ؛ لفقت لهم القضايا بكافة الأشكال و الأنماط .

و رغم مشروعية الطلبات و سلمية المطالبين إلا ان أحمد أنيس الوزير العسكرى قرر تلفيق التهم لشرفاء ماسبيرو  لأنهم طالبوا برحيله عن المبنى  و  من تلك التهم :

- التخريب

- تعطيل العمل

- تنفيذ جرائم ضد الأمن القومى

و ابلغ مكتب احمد أنيس وزير العسكر داخل ماسبيرو  المتظاهرين ان كل من تجمهر للمطالبة بتطهير الاعلام تم تقديم بلاغ ضده عند النائب العام ، كما اخضعهم للتحقيق فى رئاسة اتحاد الإذاعة و التلفزيون ....لكن ثوار ماسبيرو رفضوا الخضوع للتحقيق لحين وصول اخطارات رسمية لهم ، فلن يقبلوا المثول امام محققى ماسبيرو و الخضوع لأى اجراءات بناء على أمر شفوى .

و لأن عدد المتظاهرين كان كبيرا فقام أمن ماسبيرو بتفريغ الشرائط التى صورتها كاميرات ماسبيرو الداخلية و استخرجوا منها ست اسامى فقط للتحقيق معهم و تلفيق التهم لهم و هم : 

1. على ابو هملية
2. عبد اللطيف أبو هميلة
3. عصام سعيد
4. هبة عز العرب
5. خالد العشرى

لذلك نرجو من كل الحقوقين و منظمات المجتمع المدنى و رجال القانون و رجال مجلس شعب التضامن مع شرفاء ماسبيرو الذين اتهموا بالباطل و لفقت لهم القضايا ، و آخر ما لفق لهم و اتهموا به باطلا ؛ هو قيامهم بمنع ظهور برنامج استوديو 27 من الظهور على الهواء .. و الحقيقة ان من منع البرنامج هو المخرج مجدى لاشين رئيس القناة الأولى لخوفه من خروج صوت المتظاهرين داخل ماسبيرو فى خلفية البرنامج الذي يذاع مباشرة على الهواء ؛ خاصة و ان المتظاهرين ينادون بتطهير الاعلام و القضاء على الفساد و رحيل احمد انيس عن المبنى.

للتواصل مع شرفاء ماسبيرو الاتصال بالمخرج عبد اللطيف ابو هميلة على موبيل 01005022832

كل مكان بينادى برحيل العسكر

الميدان هتف ضد العسكر و قال بكل عزة و كبرياء :

" ايوة بنهتف ضد العسكر – احنا الشعب الخط الأحمر " 
و طالب الجميع بالقصاص و ده  كان كان قبل كارثة بورسعيد ... دلوقتى بعد ماتش الأهلى و بورسعيد مبقاش فيها وجهات نظر و اخد و رد ، و كان مجلس الشعب إللى بيقولوا عليه منتخب و قال بانتخابات الست نزيهة و اختها شريفة ؛ كان المفروض المجلس يآخد قراره و يطالب باستلام السلطة حفاظا على استقرار مصر و حقا لدماء المصريين . 

لكن لأ ... مافيش سلة ح تتسلم .. ليه كدة يا عمنا ... أصل بدل ما المجلس يدافع عن الشعب وقف جمب العسكر و قالك مش مستلم اى سلطات و اللى عايز يبعتلى السلطة يبعتها مسجلة بعلم الوصول ، انا ماليش دعوة بقى لو تاهت فى السكة  ... و تمادت عملية الاهدار فى حق الشعب و بعد ما كان مجلس الشعب ملاذ لأى مواطن للتعبير عن مطالبه لنواب الشعب ، قرر مجلس الاخوان منع اى حد من التواجد بالقرب من مبنى القبة ... و ده يا ترى ليه ؟؟؟
لأن تحت القبة شيخ و الشيخ متوضى و هو ما يضمنش إللى ح يقدموا مطالب دول ناس متوضين و لا لسة خارجين من الخلاء


و نسى اعضاء البرلمان ان المؤسسة الوحيدة اللى مش محتاجة لحراسة هى بيت الأمة .. لكن واضح انه بقى بيت الأم و شويشة ح يبقى بين الجماعة ... مجلس الشعب إللى يحتاج حماية من الشعب يبقى فقد تمثيله للشعب و يبقى ما بيمثل غير الحبر إللى انطبع عليها استمارات الاعضاء ، و الورق ممكن يبقى عصير يساعد على عصر الهضم لو حد بطنه ماشية و عايز يربطها و يخليها محلك سر .

و لو كان بإمكانى عمل حوار مع قمة البرلمان لسألتها إيه اكتر عجب شوفتيه فى حياتك النيابية ؟؟؟ يا ترى العرق سوس إللى اتشرب فى صحة الشهدا ؟؟ و لا ظهور " جماعة " من الأغبياء جندوا شبابهم للوقوف ضد مسيرات شعبية بتنادى بتسليم السلطة لــ " قياداتهم " !!

جماعة الإخوان اعتدت علي حق قانوني ودستوري للشعب المصري لتوصيل طلباته للبرلمان ويجب أن يتم التحقيق فى الواقعة دى .

حاميها حراميها








الشعب يرديد اعدام المشير